На Счестья, На Здоровя, На Тот Новый Рок! — Ваньо Русенко
NewYear

И на тот Новый Год
Вінчую, желаю —
Вшиткым лемкам повернути
До родного краю.

Треба нам уж раз знати
От Нового Года,
И план, реку, вы конати —
Для свого народа.

Збудувати сто два села
По двіста нумерів
На лемковской территории —
Не лем на папері.

Сто тысяч долляров
На пресс-фонд для “Руси”,
Як бы там не было,
Але быти мусит.

Ци от разу, ци на раты,
Ци молодый, або старый,
Каждый єден мусит дати
Не дуже, лем два доллары.

Товды буде и газета
И Календарь отповідный,
Бо теперь и на выгляд
И на зміст тыж доста бідный.

А за “Русь” най вшиткы платят
Тоты, што хцут єй читати,
Жебы, реку, ник не ходил
До сусіда пожичати.


—————o—————

Най же пише нам “Карпатска
Русь” о Лемковині,
Як там жиют нашы братья —
В Польші, в Украині.

В Чехах, в Австрии, на Мадьярох
В Ю-Ес-Ей и Канаді,
Ци рушаются наперед,
Ци плянчутся взаді.

Львовскы лемкы най не пишут
Ювилей — рекламы,
Тым особам, што забыли,
Же были лемками.

А и нашым вершикарям
Желаю успіху:
Пиште вершы нам на корыст,
Собі на потіху!

Часом ліпше не писати
Бодай якой шміры,
Кедь в тых вершах не мож найти
Ни сенсу ни міры.


—————o—————

А зас панкам-политикам
Тым, што з “Обороны”,
Най не кравчат на нас лемков,
Як тоты вороны.

А кедь мают добру волю
Тримати з лемками,
Най вступают до Союза
И идут в крок з нами.


ВАНЬО РУСЕНКО.
8. XI. 1959.



[BACK]