Американский Лемко-Парк

Американский Лемко-Парк, то найновша по свому содержанию и найвартостнійша маєткова институция нашой емиграции на всю Америку и Канаду. Набыта она остала в середині минувшого 1959 року.

Понеже тота институция по свойом характері єст для нас нова, многы нашы люде хотят ліпше познати вартость и ціли той институции, и то хотят знати якнайбольше аккуратно. В момент сего писанья можна уж много информаций подати, но в поровнанию до того, як може розвиватися Лемко-Парк, то буде можна лем малу окрушину пояснити, бо втот момент Лемко-Парк ледво четвертый місяц в нашых руках. Но початкова история Лемко-Парка надзвычай дивна и интересна, а тот великий интерес нашых людей до него предвіщує му счастливу судьбу його будучности.


Entrance
АМЕРИКАНСКИЙ ЛЕМКО-ПАРК, МОНРО, Н. Й.
Входный Павильон, то центральна будова нашой новой здравниці Лемко-Парку. Кромі комнат, в домі єст кухня, ідальня из трьох комнат, бара, офис, телевизийна и дві фронтовы світлиці, и конференцийна світлиця.


Уж высше десят літ на каждом головном съізді Лемко-Союза делегаты подносили предложения, штобы Лемко-Союз постарался для членов свойой организации и вообще для нашого народа набыти фарму, где нашы люде могли бы сходитися в часі вакаций, а дакотры старшы люде, котры найдутся без притулку, могли и на все там замешкати, и доживати свойой старости в кругу свого народа, приятелей, знакомых и краянов. Тоты бесіды не были даремны и пусты, бо делегаты выберали на каждом съізді новый фермерский комитет або понукували старый комитет розвити акцию глядати фармы и купити єй. И тот фармерский комитет в промежутках меже съіздами отвиділ пару, або кілшадцет такых фарм, но все надармо. Были фармы, котры на єдно были добры, а на друге недобры, были тані фармы, котры потребували не то поправы будовы, але будовы от фундаменту. А тоты фармы, котры уж могли бы быти приспособлены для выгоды и потреб нашого членства, были так высокы в ціні, што то убивало охоту до покупкы комитету, а потом и делегатам съізда, коли они давали справоздания из свойой роботы. Но помимо того, послі такых справозданий делегаты съіздов ище с большым натиском требували от фармерского комитета погвиватися и поглядати дашто таке, абы всім членам придалося и абы было под силу нашым фондам.


Auxiliary
АМЕРИКАНСКИЙ ЛЕМКО-НАРК, МОНРО, Н. Й. — Надпоточный дом с 9 комнатами, над Глубокым Купальным Озером, тоже вполні пригодный для замешканя в літі и в зимі.

Помимо того, што нашы бывшы лидеры мали велику віру в наш народ, то и так не рішилися підти с ділом покупкы парка вперед, а приміняли тактику “обождания”, або як то гварят, отповідвых условий.

— Часы непевны, — объясняли они. — Може через пол рока, може и днеска до вечера придти крах и вшиткы маєткы упадут в ціні, а тогды нам треба лем придти и взяти...


Directors
ПЕРШИЙ КОМИТЕТ И ДИРЕКТОРЫ ЛЕМКО-ПАРКА, котры нашли и выбрали и завершили покупку Американского Лемко-Парка. З ліва на право: Директор и менажер Парка Яр. Кобан, Рек. Секр. Теодор Рудавский, Предсідатель Антонь Каня, Дир. Яков Филяк, Кассир Иван Малютич, Дир. Стефан Геренчак, Дир. Захарий Мерена, Дир. Иосиф Ющак и Секретарь Теодор Фучила.

Покупку такой фармы они тісно связували с международном ситуациом во світі, но тоты их предвіщания николи не сполнилися. Крах не наступил до днеска, а всьо, што єст материальне незвычайно набрало свойой ціны, а просто удвоило и потроилося в ціні.

Дорожизна наступала крок по кроку, грошами, за котры мы думали рок тому заплатити половину такой фармы, уж было мало на задаток. Было принято съіздом основати тоту фарму на членском взносі и начати сбор на фонд покупкы фармы. За два рокы тот сбор показался неудачным. Всього было зложено членского кільканадцет тысячов и большинство в том и так были лем грошы не от приватных членов, а от отділов и головной кассы Лемко-Союза. Минул ище єден съізд, а результаты ище слабшы. Новый фармерский комитет был припертый до стіны. Он начал созывати свои засідания, но выходу не было ани взад, ани вперед. Начали являтися фармы, подходящы для потреб нашого народа, не конечно были выставлены на продаж, но за добру ціну можна было их купити. Делегаты выбрали фармерский комитет, но грошей не дали, и нераз тот комитет лем торгувал, но грошей не мог дати, бо фондов не было.


Kamyanka
Американский Лемко-Парк, Монро, Н. й. — Дом Камянка с наймо- дернійшым устройством и найбольшыми выгодами для жиющых в ньом. Внутрі 9 комнат зо всіма украшениями для занятия в літі и в зимі

На рочном собранию Карпаторусского Американского Центра в маю 1956 року, где был присутный и цілый фармерский Комитет, по долгых дискуссиях было рішено змінити форму фармерского комитета из членскых взносов на членскы уділы, то єст шеры. Шеры, то єст така система, же они можут быти звернены их властителю тогды, коли членске не можна выбрати зо жадной организации. В тот сам час было надане имя корпорации — “Американский Лемко-Парк”.


Lake
Американский Лемко-Парк, Монро, Н. Й. — Купальне озеро в ужитку, но сей зимы буде поправлене для полной операции на літо.

Послі заведения той зміны до рока часу фонд фармерского комитета подвысшылся из 13 тысяч до высше 40 тысяч долларов. Но ціны гляданых маєтков находилися гдеси в по сусідству около 200 тысяч долларов. Єсли бы кто хотіл брати на себе такий переважаючий моргич с задатком 40 тысяч, по ньом могли проходити горячы, нервны дрожи, и не спати днями и ночами. Так, в комитеті, як и меже членами Лемко-Союза ишли споры, за яку ціну фарму купувати, бо загладити на планной, а таньой фармі и тых 40 тысяч долларов было рисковно. Што буде, єсли никто тото не полюбит, єсли буде неприступне, далеке, неподходяще. А тым часом красивы маєткы, на котры комитет мал око, усувалися о рынку. Их купували люде, або для свого бизнесу, або для перепродажы за добру прибыль.

Но найбольше полюбился, Комитетовым Лемко-Парка літный готель, здравниця под именом Зиндорест, в 50 милях по експрессной дорогі Трувей с Нью Йорка, в місцевости Блуминг Гров (Рзвивающийся Гущик) в громаді Монро, повіті Орендж с повітовым містом Гошен. Єст то містность близко границ, найгустійше нашым народом заселеных штатов Нью Джерзи, Пеннсильвания и Коннектикат, но сама находится в штаті Нью Йорк, котрый можна сміло назвати найдемократичнійшым штатом под каждым взглядом меже всіми другыми штатами Америкы.

В осени 1958 року был зділаный поновный натиск на покупку шеров. Было рішено, што єсли Парк не буде купленый до рока, то грошы, положены в шеры будут повертанні своим властителям, а организация Лемко-Парк — розвязана. В газеті “Карпатска Русь” были отложены на бок всякы другорядны справы, а на перше місце ступила объяснительна кампания о практичных возможностях, котры може для добра нашого народа дати будуща институция Лемко-Парк.


Fountain
Американский Лемко-Парк, Монро, Н. Й. — Студник, водна трискавка в Долинці, єдна из многых прикрасок Парку.

До того часу Лемко-Парк ріжны люде представляли собі по свому. Єдны представляли собі, што то ма быти фарма, на котрой буде годуватися скот и домова птица, што там треба працувати ходити за тым и продукцию роспродавати. Многы люде, што полишали фармы, або сами ище господарили на них бесідували, што им того не терба и ани не интересовалися тым. В газеті было объяснено, што така фарма, котру купує Комитет Лемко-Парка, буде в роді готелю, где нашы люде с цілой Америкы и другых держав, а навет и старого краю можут приізжати ту на свои вакаций, наберати здоровья. Из близкых міст можут приізжати на конец тыждня в субботу и неділю и на праздникы. Старшы пенсионеры можут ту замешкати на стало, подобно, як в свойом лемковском селі. Для молодежи ту буде свободне місце в домах, на полю и при озерах для их спорта и розвеселения. Єдным словом — здравниця в роді нашой славной Крыниці. То буде єдине місце, єдиный центер, где будут сходитися нашы люде, як в свойом селі.


Lakeside
Американский Лемко-Парк, Монро, Н. й. — Заозерный Дом с фронту, найбольше вмістимый, бо має 19 комнат на 40 особ, готовый до замешканья. Многы предлагают отдати тот дом в ужиток нашым лемкам-пенсионерам.

Такий парк был купленый. Задаток был даный ище в апрілю місяци, но был даный лем под тым условием, єсли Лемко-Парк буде мати право перебрати законно всі позволения на ведение діл такой институции разом с реставрантом и на продаж напитков. Таке право Лемко-Парк получил, но процедура выданы такых документов, як звычайно быват, заберат много часу в урядах и лайснес на открытие бизнесу был полученый аж в половині місяца июля.

Легально Лемко-Парк был перебраный в нашы рукы аж 21-го июля о 1 годині в полудне. Рано того дня в Нью Йорку был полученый лайснес, а в тот сам час друга часть директоров, разом с бывшым властительом Парка переберали маєток Парка.

Официально Лемко-Парк был открытый аж 14, 15 и 16 августа, тридневным торжеством. На открытие Лемко-Парка зышлося невидане в нашых условиях количество народа с цілых Соєдиненных Штатов и Канады. Из большых місцевостей пришло 13 громадных автобусов, заполненых народом и 700 автомобильов. Ище иншы пришли ишными видами транспортации. С того часу ніт дня, штобы до Лемко-Парку не приіздило пару машин с далекых околиц и далекых штатов. Каждый хоче видіти Парк, околицю, будовы, землю, озера и ліс, и все послі такых оглядин купує шера. Покупка шера, то печать признательности, што Лемко-Парк полюбился, што он вартат свои грошы.


EnchantedWell
Американский Лемко-Парк, Монро, Н. И. — "Заворожена Студня”, то ище инша прикраска Парку. Просто за студньом ест Полянка, на котрой находится платформа до танцев.

Бо и податкова ціна Лемко-Парка была 210 тысяч долларов, а Парк был купленый за 175 тысяч. Як признался сам бывший властитель Зиндорест Готелю делегатам ХХ Голов. Съізда Л. С., котрый уж отбывался в Парку, што он продал Готель лем зато, бо уж так надоіли директоры Лемко-Парку своима торгами и своим частым навіщанием, што он рішил продати им. Кампания за шерами была так успішна, што уж тогды при переборі Парку властительови было дано 83 тысячы долларов. Остало долгу 92 тысячы, но до двох місяцев послі того уж было новых шеров закуплено на 25 тысяч, а до часу, як прийде выплатити слідуючу часть моргичу, то напевно нам ище приде другых 25 тысяч. Тогды всього моргичу остане нам 42 тысячы долларов. Тых 42 тысячы, то уж буде лем четверта часть цілой вартости маєтку Парка и при нашом добром усилии и тото удастся выплатити в недалеком часі. Так представятся образ ціны, покупкы и выплаты Парка. Условие єст так зроблене, што єсли бы нам явилися несподіваным способом грошы, то властитель обовязуєся приняти остатный выплат моргичу, коли лем мы готовы його выплатити.

Теперь тымчасом в Парку открытый бизнес, реставрант, бара и рентуются комнаты. На початку, коли было уплачено першу рату бывшому властителю, комитет Лемко-Парка положил 10 тысяч долларов на покрытие біжучых росходов, то єст закупку товаров и выплаты робочым. Початковый бизнес пішол так добрі, же тых 10 тысяч долларов не были ище до днеска нарушены, и быти може, не будут аж по новом року для оплаты податков. В зимі треба сподіватися меньшых приходов, но лем в першой зимі, покаль бизнес нерозвитый, бо в слідуючы зимы Парк не лем оплатит свои росходы, но и даст приходы, бо он буде до того приготовленый.


KPACenter
Карпаторусский Американский Центер в Юнкерс, Н. Й., побудуваный в 1938 року сознательными членами Л. С. цілой Америкы и Канады.

В Парку єст 108 акров земли. Має быти ище додаточных 18 акров, котры правдоподобно будут одорваны от остальной массы земли. Тых 18 акров єст записано в “дидах”. Теперь, коли Комитет буде свободнійший, возме “сурвеєра”, котрый отнайде и тых 18 акров. Быти може, што они сут аж на горі, а быти може, што и при битой дорозі.

В Парку сут три озера, остатныма роками они запущены, так тоты два купальны озера, як и рыбне озеро на човны. Штобы их привести до порядку и полного ужитку, треба буде выдати кільканадцет тысяч долларов. Но направа тых озер поднесе ціну цілому Парку.

По самой середині Парку єст дом так званый Входный Павильон. В ньом устроєны офисы и выгодны отпочивальні, бара, ідальни, кухня и конференцийна світлиця. На горі карпетами выстеленых десят камнат с місцем на 30 лужок. Всі готовы до ужитку от першого дня.

Слідуючом будовом єст Камянка с девятома комнатами першой классы, с приватныма купальнями, зимном и горячом водом.

Через стежку от ней єст домик Зазулька, на 4 комнаты по три лужка, и за ньом Припоточный мотель стоянка с трьома комнатами. Над купальным озером єсть ище єдена стоянка Перечня зо 4 комнатами.

Напротив фасады Входного Павильона єст хижинка Щобик, с єдном комнатом, кухньом и ідальньом. Отдалено за озером стоит громадный Заозерный будинок с 19 комнатами по два лужка, а против него будинок Надпоточный с девят комнатами, а за потоком хижинка Медвежа с двома комнатами и кухньом.

При вході до Лемко-Парку стоит Робочий Дом, где до того часу мешкала услуга Парку на 9 комнат и друга хижина на 3 комнаты. Теперь, коли Лемко-Парк уж перебраный нами, на тоту зиму объявлено программу: тот будинок буде переробленый на модерный лад и отданый фамилиям для полного ренту. В упомянутой зимовой программі Парку єст тоже точка приведения до порядку, купльнього озера на літо. Для той ціли рішено купити трактор, при помочы котрого тота робота буде выполнена.

Всі упомянуты будинкы в добром порядку в середині, а гдекотры и с надвору, бо сут и новы будинкы меже ними, но як звычайно будинок потребує постоянной опікы, особливо с надвору.

Будинку Камянка держится так звана Стодольна світлиця, котру буде мож переробити на великий клуб для молодых, або забавню для старшых.

На полянці, недалеко от Входного Павильона єст уж отновлена нами платформа под ялицями без накрывы. В часі браку оркестры, грают голосникы, рекорды из Входного Павильона. Всі знают, што Лемко-Парк єст парком музыкы, здаєся, што ліс выдає музыку и хоровы співы.

Лемко-Парк заподненый деревином, гдекотра предвічна. Попід Полянку иде густый грубый ліс. Єсли в том лісі поробити стежкы и посыпати их дробным камінцом, то Парк не уступит тінистым лісам Крыниці. Центральна часть Парку, кромі другых дерев, засаджена том дорогом породом ялиц, котрых кончины голузей все здаются покрыты осінным инейом, што надає свіжости Парку круглый рок. Деревина заступат собом вид на головну дорогу “рут” 208 с центральной части Парку с будинками, што надає Парку атмосферу затишья и спокою.


LemkoHall
Народный Дом Лемко-Союза в Кливланд, О., набытый в 1945 р., находится на роздорожу пят улиц, майже в центрі передового индустриального міста в Америкі.

Так не може быте, штобы така красота не полюбилася каждому. Но властива вартость Парка не лем в красоті околицы, а в його программі и ціли, для якой он купленый. Важне ту тото, што он купленый народом и для народа. Ту єст подвойна корысть и для каждого лично, бо може порадуватися ту, и корысть народна, же мы маме дашто таке, яко народна группа. А то єст честь перед каждым и перед всіма.

Лемко-Парк должен теперь помочы выполнити из устава Лемко-Союза тоты точкы, где говорится о помочи попавшым в безвыходне положение краянам, котры не по свойой вині, то єсть не по недбальстві, нашлися в таком безвыходном для них положению и нашой молодежи так той ту в Америкі, як и в старом краю. Под молодежом розумієме и материальну помочь талантливым студентам нашого роду, котры той помочы потребуют.


CanadianHQ
Карпаторусский Народный Дом в Торонто, Онт., в Канаді, находится при головной Квин улици, близко центра, другого найбольшого міста в Канаді.

А єсли Лемко-Парк буде проводити таку роботу, то он выполнит громаднійшу благородну ціль, яку могла перед себе поставити наша емиграция.

Наш Лемко-Сощз гордится тым, што на його уставі так прекрасно розвилися культурны силы, нашого народа. Тоты культурны сознательны, просвіщенны нашом литературом люде помогли не лем поставити наше издательство на добрый и забеспеченый фундамент, но тоже многы отділы поднялися и економично, Многы из них набыли свои красивы маєткы и научилися ними управляти. При помочи Лемко-Союза был построєный красивый величавый Карпаторусский Центер в Юнкерс и поставленый на самооплачальны основы. Отділ Лемко-Союза в Ансонии, Конн., набыл собі свой Народный Дом с цілым кварталом приватных домов. Правда, тот маєток майже до основания зруйновала страшна буря в 1955 року. Самый Народный Дом им удалося наново привернути до порядку. Тот дом, як відомо, уступится на будову дорогы, но за выручены грошы, около 60 тысяч долларов, они сможут за тот час до половины літа с. р., найти и купити другий Народный Дом в місті Ансонии, або його окрестности. Могучом славом гордится и дом Лемко-Союза в Кливланд, Огайо штаті, котрый находится в центрі міста и провюл в свойой истории велику культурну роботу. Торонто, Онтарио в Канаді тоже має свой Карпаторусский Дом, котрый являтся культурным осередком нашой там емиграции. Кромі упонятых тут народных домов єст цілый ряд меньшых народных домов так в Америкі, як и Канаді. Тот економичный маєток пришол нашым отділам лем благодаря сознательности труду и вытревалости тых передовых загартованых нашых пионеров патриотов, членов, котрых судьба дала нашой организации.


Ansonia
Лемковский Народный Дом в Ансонии, Конн., набытый в 1936 року.

Теперь в 30 годовщину Лемко-Союза прилунился к нам Лемко-Парк институция, громаднійша за всі попередны. Тоты нашы институции поставили на постоянну роботу пару десяток людей, котры иншой роботы приняти на свои рукы не можут, лем выполняют народну роботу, а то укріпят цілу нашу организацию. Правда, што Лемко-Парк основаный на свойом уставі, а не на чартері Лемко-Союза, но так само и Карпаторусский Центер основаный не на чартері Лемко-Союза, но члены Лемко-Союза их побудували и без членов Л. Союза они не смогли бы долго удержатися. Длятого они сут нашы организации, бо належат до нашого народа не єдинично, а организацийно, коллективно. А што коллективне, то єст народне.

Так стараймеся допильнувати не лем выплачинья Лемко-Парка из моргичов, але стараймеся о його, обогащение, о розвитие до той степени, штобы он приносил пользу цілому нашому народу, а то выйде на нашу народну славу перед світом.




[BACK]