Симеон и Анна Костишак
Симеон и Анна Костишак

9-го августа 1959 г. исполнилося 50-літие супружества Симеона и Анны Костишак. По тому поводу их донька Мелания, разом зо своим мужом при помочи веце родины, устроили богату гостину, як то называют “Золоте Весіля”. Угощение отбылося у парафиальной школі. Народа не было дуже богато запрошено по причині, што поміщение замале ка більшу публику. Были приглашены близка родина, сусіде, а разом с нима члены Лемко-Союза. Гостина была дуже богата под проводом весільного старосты Василя Сташенко и дружкы Параскы Кода. Забава была дуже весела с гучными лемковскыми співами, выглядало совсім, як бы то было в краю, приємно. Старшы люде припоминали старый край, а при том было богато бесіды. Весільный староста покликал до бесіды Георгия Иштвана, Т. Гончарика, И. Штеклю. Всі говорили за прошле, як то всьо переходит в житью и добре и зле — всьо треба принимати. При том было спомянуто за газету “Карпатску Русь”, што таке предприятие, як пятьдесят літие добре поміщати в свойой газеті, а и в Календарі, у свойой книжкі добрі поміщати такы фамилийны фотоаграфии на памятку своим дітьом и внукам. Так на пресс-фонд газеты “Карпатска Русь” было собрано 40 долларов.

Симеон Костишак походит родом из селя Мушинка, Новосандецкого повіта на Лемковині. До Америкы приіхал в 1905 року. Ту познакомился в Ньюарку, Н. Дж. с дівчином и там поженилися в 1909 року, и в том року переіхали до Стамфорд, где жиют дотеперь. Анны Костишак родиче походили из села Білцарева, повіт Грибов, писалися Василь Горощак. У Костишаков фамилия: єдна дочка Мария и 2 внучкы, имено Капцюк. Всім жертвователям щира и сердечна подяка, а нашым юбилянтам желаме прожити многая и благая літа.


Присутный Гость.
Стамфорд, Конн.



[BACK]