Пятого сентября 1959 року в честь 50-літного юбилею супружества Сильвестра и Марии Гончарь было устроєне веселе торжество. Торжество устроили им их семеро дітей, дві донькы и пять сынов и тринадцетеро внуков.

Сильвестер и Мария женилися пятдесят років тому назад — 7 сентября 1909 року, в Карнеги, Па. Шлюб брали в русской церкви свв. Петра и Павла.

Сильвестер Гончарь єсть родом из села Квятоня, Горлицкого повіта, на Лемковині, а жена Мария рождена в селі Шкляры, того самого повіта. С першого их весіля были присутны лем єден дружба и єдна дружка, так их зять Стефан Войтович взял місце старосты.

Староста привитал всіх гостей и особливо юбилянтов и пожелал им дожити счастливо до 75-рочного юбилею. Слідувала дуже богата гостина. Подавали каждому, што кто лем запросил, а народа так было, што ся не могли до гали помістити. Дуже людей было с подальша, с Саут-Сайд Питтсбурга, Па., из Детройт, Мич., Нью Кенсингтон, Па., Прайсдейл, Па., Ембридж, Па., и другых плейзов.

По обіді на просьбу староста всі гості отспівали “молодятам” многая літа, а так оркестра заграла. Єдны танцували, другы співали и так бавилися до пізна в ночы.

Я подошол до “молодого”, ци бы не позволил дакус собрати на пресс-фонд “Карпатской Руси”. Мр. Гокчарь казал мі зачекати, же ся звідают фамилии. Як пришли назад, то мі повіли, жебы не старатися о пресс-фонд, же фамилия ся посберат сама, жебы покрыти кошта в “Карпатской Руси”. На другий день юбилянт Сильвестер Гончарь принесли да мене 40 долларов, жебы написати допись и послати до Лемко-Союза.

“Молодята” складают подяку всім гостям за численну участь и подарункы, а я от себе складам велику подяку фамилии Гончарь за их щирый дар на нашу газету и желаю молодой парі прожити счастливо и весело до 75-рочного юбилею супружества.

Юбилейный гость