Фундамент Лемко-Союза

Недавно зашол в нашу редакцию представитель єдной карпаторусской фирмы и в бесіді с нами спросился: “Яку нечисту силу Вы мате в собі, же теперь, коли другы нашы карпаторусскы организации и всі их діла на очах упадают, а Вы роснете. Лемко-Союз, то єдина организация, котра в теперішный момент робит прогресс.

“Основаны зме на добром уставі”, — коротко зме отповіли.

Як он, тото дальше порозуміл, або ци порозуміл, не знаме, но мы увірены, што розвитию нашой организации треба завдячити то, што она основана не на нечистой силі, а на правді и на справедливости, основана на добром уставі, котрого члены, хоц их не так много, тримаются и выполняют. Бо устав не лем нашой, але каждой другой организации, то як фундамент под домом. Єсли фундамент добрый и прочный, то и будову мож на нем добру и прочну поставити. А як фундамент планный, то хоц бы якы добры материалы потом в будові уживалц, то он ся завалит.

Як відомо, фундамент нашой организации не давали ниякы профессоры, дипломаты, адвокаты, або политикы. Дали го нашы с чистым розумом хлопи с мозолистыми руками. Им завдячаме теперь и розвитие нашой организации.

История того нашого устава коротка, и першы його точкы были дуже короткы, но ясны и каждому лемку зрозумілы.

А сталося то 9 января 1929 року, тридцет літ тому назад, в домі Теодора Кохана в Виннипегу, в Канаді. Теодор Кохан родом из села Флоринкы, пов. Новый Санч. Мал он не дуже школы, но в Америкі, як был, то служил в армии и принимал участие в войні против Испании в 1899 року. В Виннипегу он был учительом и городскым урядником. Тот благородный старик здравствує ище и днеска. Он єст 80-літным стариком и жиє в городі Сент-Бонифас, коло Виннипегу. Найже Всевышный благословит го на дальше добрым здоровьом.

Встрітившыся с молодыми повоєнными емигрантами, он разом с нима завязал перший отділ Лемко-Союза, котрому стал предсідательом. Владимир Цисляк был першым членом отділа и першым секретарьом того першого отділа Л. С. Они тот отділ основали на такых точках:


Ціли Лемковского Союза

Ціли моральны: а) Ширити взаимну любовь и згоду меже лемками; б) Старатися о бурсы, школы, читальни и другы пожиточны институции для народа, ци ту, ци в старом краю.

Ціли економичны: а) Помочи члену в нужді, хоц бы потребна была коллекта; б) Помочи крайне бідным студентам.

Ціли политичны: а) Соєдиняти в єдну мысель всіх лемков с обох соторон Карпат; б) Защищати свой край от гибели и народ Лемковины от вынародовления; в) Голосити світу, што мы были, єсть и должны остатися русскыми людьми.

Тот перший устав был розробленый и поширеный и теперь складатся из 67 параграфов, занимающых 24 сторонкы друку.

В теперішньом Уставі Лемко-Союза уж подробно розложено, якыми способами тоты ціли наша организация выполнят и як она сама собом должна управити. Автором того поширеного Устава был Др. Александр Телех, родом из села Лосье, Горлицкого повіта, проживающий тогды в городі Акрон, О., близко города Кливланд, О., где в тоты часы издавалася гцзета “Лемко”.

Но и тот поширеный Устав не остал в той самой формі, а был дальше поправленый и розробленый делегатскыми съіздами Лемко-Союза, котрых, як уж знаме до того часу было двадцет. На каждом съізді были точкы, додаваны, або зміняны, согласно до потреб и условий зміны часов и условий положения в світі. Но головна ціль, вложена перший раз в 1929 року, николи не была змінена. Тота ціль была так потребна тогды, як она потребна єст днеска, и тота ціль не лем тримат Лемко-Союз при житью, але дає му силу розвития, чого не лем мы сами свідками, но на што маме доказы.

Так наш Устав дає нам силу вести нашу народну программу вперед и мы єй ведеме с очевидными успіхами.




[BACK]