30-та Годощина Лемко-Союза

С концом 1959 року перешла в вічну историю 30 годовщина народной, культурно-просвітительной политичной и економичной организации Лемко-Союза в Соєдиненных Штатах и Канаді.

Лемко-Союз организовали емигранты в Канаді и Соєд. Штатах, походящы из обох сторон Лемковины, то єст из Галицкой Лемковщины в Польші и с Пряшевщины — в Чехословакии. Вспольными силами, при помочи доброжелающых братов из Подкарпатской Руси и другых территорий русской земли, котры порозуміли великы и добры идеи, вложены в основу Лемко-Союза, они помогли кріпити и розвивати нашу народну организацию.

Организовали лемкы тот Союз длятого, штобы при його помочи, на основі традиций и культуры, створеной нашыми предками, боронити нашых прав на свободне житья, розвиватися и подноситися культурно и поступати вперед к новым достижениям с прогрессом другых народов. В 1959 року минуло полных и округлых тридцет роков той организации.

Народна діятельность, котру Лемко-Сбюз провюл за тых тридцет роков, не дастся описати подробно, ани в єдной статьи, ани в цілом Календарі. Тота діятельность описана остала и то не вполні в тридцетьох подобных Календарях и в тридцетьох рочниках, найперше газеты “Лемко”, а потом “Карпатска Русь”. Зато и наш опис той годовщины сможе охватити лем важнійшы моменты діятельности и то дуже поверховно.


ПРИЧИНЫ, ЯКЫ ПОБУДИЛИ ОРГАНИЗАЦИЮ
ЛЕМКО-СОЮЗА ДО ЖИТЬЯ

Каждый, кто знає историю житья нашого народа, тот знає, што он жил в дуже трудном положению так економично, политично як и культурно. Економично жили нашы лемкы трудно по причині бідноурожайной, каменистой горской земли, котра хоц скупа на обыльность плодов, но все такой она была люблена лемками за свою красоту, и шанувана, яко отцовске и прадідне наслідство. Хоц бідный, але то был наш власный край. Политично, яко отмінна етнографична группа меже большыма народами, Лемковщина была вічно пригнетена и переслідована своима большыма сусідами, котры и по свому пробували богатіти, розростатися и кріпнути коштом лемков. За своє “я” лемкы терпіли віками и переносили на собі всякий утиск и пригнетение. По той самой причині лемкы оставали бідны культурно, бо владіючы над нами народы, знали, што найлекше тримати в покорі и неволі народ тогды, коли он непросвіщеный. Длятого для лемков не давали школы и старалися их тримати в темноті и бідноті. Народна организация до борьбы против тых всіх кривд была недопустима под их властью.

Зато лемкы, вырвавшися на емиграцию, где нашли ширшу свободу, познали, што розрішити тоту проблему може лем организация народных сил и длятого рішили створити свою народну организацию. Штобы было всім ясно, о котрый народ точно иде бесіда, они рішили назвати свою организацию Лемко-Союз.


ПОЧАТКЫ ЛЕМКО-СОЮЗА

Hazelton
Отділение Лемковского Комитета в Вест Газлетоні, штат Пеннсильвания, организованый Михаилом Шостаком и Стефаном Шкимбом 1-го января 1923 року. На фотографии в первом ряді сідят от ліва: Кондрат Шкимба, Николай Шкимба, Василь Кеселичак, Тимко Коцур, Филимон Патловский, Григорий Коцур, Василь Смарж. В другом ряді от ліва: Стефан Шкимба, Иван Дубовик, Радион Бакич, Михаил Шостак, Григорий Дровняк и Игнатий Синявский.


Cleveland
Представление традицийного Лемковского Весіля в Кливланді, поставленого 26-го октября 1926 року, в гали Кореня, то єст в теперішньом домі Лемко-Союза.

Gladik
Пок. Виктор П. Гладик, лемковский пионер в Америкі перед основанием Лемко-Союза.

Як уж повысше сказано, лемкы не мали доступу до высшых школ, то и интеллигенции было мало среди них, то и организацию Лемко-Союз не организовали жадны политикане для своих цілей, а организувал го сам простый народ, котрый чул необходимость такой организации. Лемко-Союз был организованый в 1929 року, в місті Виннипегу в Канаді. Но он не впал несподіванно, як метеор на землю с пространства. Он мал свого предтечу, не єдного, а многых. Но найбольше відомым для всіх был Виктор Гладик, родом из села Кункова на Лемковині. Хоц без высокых наук, он представлял перед ріжныма народностями Америкы, тоту бідну, але прекрасну лемковску народну культуру, його звычаи, обычаи, фолкльор, співы и бесіду. Он голосил, што свойой культуры не треба ся встыдати, лем розвивати на высший степень. Ище в Америкі ани не было нашых потом передовых руководителей, як Д-р С. Пыжа из Вапенного, ани Дмитра Вислоцкого, из Лабовы, як по гдекотрых містностях уж были организованы місцевы Лемковскы Комитеты, котры хоц не были объєдиненны єдном программом, но зато существовали, розвивалися культурно, и розуміючи, што лем школа може нашому народу помочи, складали фонды на поддержку бурс там в краю, штобы діти нашых лемков мали можность ходити в школу, образоватися. И тоты бурсакы дуже помогли народному ділу, но были безжалостно уничтожены в часі Першой и Другой світовой войны.

Pysh
Пок. Д-р. С. Пыж, долголітный редактор газеты “Лемко” и “Карпатской Руси”.

Такы Лемковскы Комитеты, як тот в Газлетон, Па., котрого фотография с 1922 року поміщена на иншом місци сего Календаря, было уж больше так в Пеннсильвании, як и в Нью Йорку місті, Пассайку и другых містах. Такы представления, як тото Лемковске Весіля в Кливланді, котрого тоже фотографию ту поміщаме, составлене простыма женщинами, як Мария Телех и Пелягия Сидоряк из села Воловец, ставилися по многых лемковскых містах в Америкі ище перед I Світовом войном. Газета “Лемковщина” выходила ище в 1922 року под редакторством В. Гладика, а потом Д-ра С. Пыжа. Коли позднійше переіхал в Соєдиненны Штаты с Канады Дмитро Вислоцкий, то Лемковский Комитет передал на помочь и оборону бурс на Лемковщині пару тысяч долларов.

Vislotsky
Димитрий Вислоцкий, основатель, издатель и редактор газеты “Лемко”.

Остальны фонды того комитета были потом переданы Д. Вислоцкому на издание газеты “Лемко”, котру он начал в Нью Йорку, а потом в Филадельфии выдавати. Не были то великы фонды, но на початок издательства, то была добра помочь. Так што коли Лемко-Союз организувался в Виннипегу при участи Теодора Кохана из села Флоринка, Владимира Цисляка, Ваня Похны, Нестора Волчака, Теодора Пейка из Устья Русского и сознательных лемков с другых сел, то он уж начал рости на приготовленом грунті. Всяди признали, што Лемко-Союза треба для нашого народа, што без него сліды за нашым народом пропадут, што без Лемко-Союза лемкы будут знищены физично и вынародовлены. Тогды началася история розвития Лемко-Союза на объєдиненной программі. Начали основуватися отділы, созыватися съізды и издавалася газета и друга литература на народной, зрозумілой каждому лемкови бесіді.


КЛИВЛАНД — КОЛЫСКА ЛЕМКО-СОЮЗА

Ище до днеска гдекотры люде называют Кливланд колыском Лемко-Союза, бо хоц он не родился в Кливланді, но в своих дітинячых роках он там рос и розвивался. История подиктувала так, што в тоты початковы часы найбольший ентузиазм к народной организации выявился среди великой лемковской колонии в том громадном индустриальном центрі Америкы. В місцевый отділ записалося высше 150 членов, и они, тоты члены, были в стані дати и дали громаднійшу поддержку изданию газеты “Лемко”. Нашлися там жертвенны люде, котры не лем пожичили большы суммы, але просто жертвовали на прессу, так што цілком натуральном річом было перенести издательство газеты “Лемко” до Кливланду, што и сталося в 1930 року. Тут была покуплена печатня, тут переселился редактор, а коли организация окріпла, то прислала и менажера и другого редактора. Газета выдавался раз на тыждень, а кромі газеты за час выходил журнал для молодежы на английском языку, начали печататися представления с народного житья, котры оживили цілу организацию, бо при представлениях лекше было устроювати предприятия, на котрых можна все было видіти громадну силу народа и слідовательно тоты предприятия приносили материальный приход на удержание газеты и организации.


ЛЕМКОВСКЫ РЕКОРДЫ, КОНТЕСТ, ФИЛЬМ И ЛЕМКОВСКЫ РУСАЛЯ

Газета “Лемко”, до котрой дописували лемкы зо всіх сторон и представления и другы предприятия по всіх містах Америкы дуже помагали розвити организацию. Но были и такы события в тоты часы, котры не звычайно вплывали на поднятие ентузиазму и розвитие Лемко-Союза, а тыма событиями были лемковскы співы на рекордах, а потом по радио под способным до того руководством Стефана Шкимбы, родом из села Воловец, громаднійше потом ним и Стефаном Геренчаком из Тыльовы родом, устройство контесту лемковской красавицы, приготовление механиком Михаилом Дужым, родом из села Перегримкы, представления “Лемковске Весіля” на фильм и начало рочных торжеств “Лемковскых Русаль” на фармі Макария Геряка из села Регетова, в Стамфорд, Конн.

Skimba
Стефан Шкимба, пионер лемковского фолклору в Америкі, издатель рекордов, радио музыкы, лемковскых весіль.

Стефан Шкимба начал выдавати лемковскы рекорды ище перед основанием Лемко-Союза, ище мало котра чужа народность в Америкі выдавала их. За ним послідовал В. Гладик, М. Дужий, братья Голутякы и Кузяны зо Саноцкого повіта. Они разом передали на рекорды, котры продавалися по цілой Америкі высше двасто лемковскых співаок и мелодий, так што они стали извістны цілой Америкі. При том М. Дужий готовил собрати “Лемковске Весіля” на фильм. Шкимба и С. Геренчак в 1932 року устроили контест “Лемковской Красавиці” в Джерзи Сити, Н. Дж. Яке громадне заинтересование было в том контесті, можна судити, хоцбы лем с того, што в контесті приняло участие высше 70 лемковскых, майже всі рождены в Америкі дівчат. Красавицом была избрана Мария Костик из Стювартсвилл, Н. Дж. В Стамфорд на фармі Геряка началися отбывати каждого року традицийны Лемковскы Русаля, котры все выходили манифестацийно, бо на них сходилися лемкы из близшых и далекых околиц автами, автобусами и по желізной дорогі.

Duzy
Пок. Михаил Дужий, инициатор фильма “Лемковске Весіля” и поддержуватель литературы.

Так як в початку великы місцевости в околици Нью Шорка ище не двинулися до организации, так теперь тот надзвычайный рух примусіл нашу редакцию переселитися из Кливланду в Нью Йорк, бо там не можна было гармонизувати діла организации. Народный рух инде и главна канцелярия организации инде. Длятого то в 1935 року наша редакция переносится из Кливланду в Нью Йорк.


С’IЗДЫ ЛЕМКО-СОЮЗА

Штобы дати перегляд того, як, где и коли отбывалися съізды Лемко-Союза, мы поміщаме меже рядками той статьи фотографии делегатскых съіздов. Тых съіздов до минувшого року было двадцет, но мы не маме лем 13 фотографий. Под нима подписано, где и коли отбывалися, но ту треба сказати и того, где и коли решта нашых съіздов отбывалися. С Першого съізда Л. С., котрый отбывался в Кливланді 22 февраля 1931 року, в Манникер Гали при Старкведер и 10 ул. (теперь там єст газолинова обслуга), ани не было брато фотографии. Съізд тот отбывался лем єдно пополудни, а вечером такой в той гали лемковский кружок из Акрон давал своє представление. II Съізд отбывался в Питтсбургу, Па., в 1933 року, III Съізд в Юнкерс, Н. Й., в 1934 р. IV Съізд был в Олифанті, Па., в 1935 року, V в Пассайку, Н. Дж., в 1936 року, VI Съізд в Нью Йорку, Н. Й. Тот съізд, с котрого ніт фотографии, отбывался 3, 4 и 5 сентября 1937 року, в Клубі Лемко-Союза, котрый поміщался под ч. 35 Ист 2 улиця, на першом поверху. На том съізді было рішено будувати Карпаторусский Центер в Юнкерс, Н. Й.

С того часу всі слідуючы съізды аж до 1947 року отбывалися в КРА Центрі в Юнкерс. С першых трьох съіздов в Центрі сут фотографии. С дальшых не было, бо они не были браты. Головна причина, то были головно воєнны рокы, многы делегаты не могли получати отпуск из роботы, бо робили на оборону, а и транспортация была дуже утруднена, так и съізды не были многочисленны делегатами. По друге, в часі войны больша увага была звернена на Карпаторусскы Конгрессы, бо тогды здавалося так, же то скорше поможе ділу лемков, так Лемко-Союз был оставляный на задном плані, помимо того, што выполнял дальше найтяжшу роботу.

Слідуючы съізды отбывалися в Юнкерс, Н. Й., в такых роках:


VII Съізд отбылся 27, 28, 29 и 30 октября 1938 року;
VIII Съізд 28, 29 и 30 декабря 1939 року;
IX Съізд 30 и 31 мая, 1941 р.
X Съізд 29 и 20 мая 1942 р.
XI Съізд 23 и 24 дек. 1944 р.
XII Съізд 23 и 24 дек. 1945 р.

Перший повоєнный 13-й съізд отбывался в Кливланді 30 и 31 августа 1947 року, в малой гали только, што набытого теперішнього Лемковского Дома. Фотографии того съізда не было брато.


XIV Съізд отбылся в Ансонии, Конн., 4, 5 и 6-го сентября 1948 року.
XV Съізд в Юнкерс 2, 3 и 4-га сентября 1950 року.
XVI Съізд в Кливланд, О., 1,2 и 3 сентября 1951 р.
ХVІІ Съізд в Юнкерс, Н. Й., 5, 6 и 7-го сентября 1953 року.
XVIII Съізд в Юнкерс, Н. Й., 24, 25 и 26-го декабря, 1955.
XIX Съізд в Юнкерс, Н. Й., 31 августа и 1 и 2 сентября 1957 р. и остатный XX и юбилейный съізд перший раз в Американском Лемко-Парку, в Монро, Н. Й., в днях 5, 6 и 7 сентября 1959 р.


2nd Congress
2-ий Лемковский Съізд отбывался 11 и 12 февраля 1933 року, в готелю Килькири — 9 ул. и Пеннсильвания Аве., в Питтсбургу, Па.

3rd Congress
3-ый Гол. Стьзід Лемко-Союза в 1934 року, в гали Чешской Соколовни, 220 Юнкерс евню, Юнкерс, Н. Й. Теперь тот дом належит карпаторуссам под именем РАМП.

4th Congress
4-ый Гол. Съізд Лемко-Союза, 30 и 31 мая и 1 июня 1935 року в Конкорд Готелю, Олифант, Па. Предприятие в честь делегатов было в Олифант Гай Скул.

5th Congress
5-ый Гол. Съізд Лемко-Союза 3 и 4-го сентября 1936 р. в Русском Народном Домі: 159 — 4 ул., в Пассайк, Н. Дж.

7th Congress
7-ый Гол. Съізд Лемко-Союза 27, 28, 29 и 30 октября 1938 р. в Карпаторусском Американском Центрі: 556 Юнкерс евню, Юнкерс, Н. Й. Дата была установлена так, абы съізд мог уж отбытися под дахом новопобудованого Центра. За делегатами видно голы муры Центра.

8th Congress
8-ый Гол. Съізд Лемко-Союза 28, 29 и 30 Декабря 1939, в КРА Центрі в Юнкерс, Н. Й.

9th Congress
9-ый Гол. Съізд Лемко-Союза 30 и 31 мая 1941 р. в К. Р. А. Центрі в Юнкерс, Н. Й.

14th Congress
14-ый Гол. Съізд Лемко-Союза 4, 5 и 6 сентября 1948 р. в Лемковском Домі: 109 Брод ул., Ансония, Конн.

15th Congress
15-ый Гол. Съізд Лемко-Союза 2, 3 и 4 сент. 1950 р. в К. Р. А. Центрі, Юнкерс, Н. Й.

16th Congress
16-ый Гол. СЪІЗД Лемко-Союза 1, 2 и 3 сентября 1951 р. в Домі Лемко-Союза 2337 Вест 11 ул., в Кливланд, О.

17th Congress
17-ый Гол. Съізд Лемко-Союза 5, 6 и 7 сентября 1953 р. в КРА Центрі в Юнкерс, Н. Й.

18th Congress
18-ый Гол. Съізд Лемко-Союза 24, 25 и 26 декан бря 1955 р. в КРА Центрі в Юнкерс, Н. Й.

19th Congress
19-ый Гол. Съізд Лемко-Союза 31 августа, 1 и 2 сентября 1957 року в КРА Центрі, в Юнкерс, Н. Й.

20thCongress
20-ый Гол. Съізд Лемко-Союза 5, 6 и 7 сентября 1959 р., в Американском Лемко-Парку в Монро, Н. И.

За час свого 30 літия до Лемко-Союза организовалося 79 отділов мужескых, 12 отділов женскых и 9 отділов молодежы. По ріжным причинам, а найбольше про брак лидерства, або уменьшенияся населения в многих місцевостях отділы заумерли. Єдны продержалися довше, другы коротше. Великий вплыв на неорганизованиеся отділов в больше містностях або и предвчасного замертья, то был страх перед прогрессивном политиком, котру вела наша организация и котру не любили по ріжным причинам так религийны, як и гдекотры світскы верховодители в тых містностях.


КАНАДСКА СТОРОНА В ЛЕМКО-СОЮЗІ

В число тых сто отділов Лемко-Союза включены уж и 12 отділов по канадской стороні. Канадскы лемкы не лем организовали перший отділ Лемко-Союза. Коли на першом съізді в Кливланді было выбране Головне Правление с Михаилом Баволяком, родом из Котани, яко Предсідательом, и Стефаном Ткач, родом из Устья Русского, яко Секретарьом, в котрых рукы перебрано верховодство Лемко-Союза, то канадскы лемкы организовали дальше отділы до Лемко-Союза на свойой территории. В своих початках канадскы лемкы, котры в большинстві складалися из молодой повоєнной емиграции мали безпримірный вплыв на розвитие отділов Лемко-Союза в Соєдиненкых Штатах. То за их инициативой и примірном жертвенностью и трудом газета “Лемко” начала выходити два разы в тыждень, и выходила так барже за десят роков.

1stCanaCongress
1-вый Канадский Съізд Лемко-Союза 19-го, 20-го и 21-го сентября, 1935 року, в Русском Клубі, 6 Денисон евню, Торонто, Онт., Канада.

2ndCanaCongress
2-гий Канадский Съізд Лемко-Союза 1936 р. в Лемко-Клубі 1465 Де Буллион стр., Монтреал, Кве., Канада.

3rdCanaCongress
3-ый Канадский Съізд Лемко-Союза, окт. 1937: 544 Кинг стр. В. в Лемко-Клубі в Торонто, Онт.

4thCanaCongress
4-ый Канадский Съізд Лемко-Союза, окт. 1938, 544 Кинг стр. В. в Лемко-Клубі, Торонто, Онт.

Понеже в тоты часы давался ясно запримічати рост фашизма в цілом світі, то штобы быти готовым на выпадок розрыва отношений с Америком, в 1935 року в Канаді был созваный I Съізд делегатов канадскых отділов Л. С. Такых съіздов отбылося четырі: І, III и IV в Торонто, Онт., а II в Монтреаль, Кве. На першом съізді был созданый Канадский Центральный Комитет Лемко-Союза, котрый рукрводил роботом там в рамках Канады. Предсідателями КЦК Л. С. были: Владимир Цисляк, Ваньо Ксенич, Теодор Полыняк и Николай Кузмочка. Организторами КЦК Л. С. были: Ваньо Похна, Нестор Волчак, Василь Чепа, Владимир Пейко, Ваньо Вансач и Николай Спяк. Слідує замітити, што членами Лемко-Союза в ровной части были нашы братья пряшевщане и красне число и емигрантов из Подкарпатской Руси.

Тоты подозріния о розрыві посвяте том в часі войны исполнилися. Канада побоялася организаций своих емигрантов и порадила им розвязатися. Вступ нашой газеты в Канаду был остановленый. Но сцентрализована организация не роспалася, бо єй місце заняло новоорганизоване Карпаторусске Общество, котре разом с канадскым народом проводило кампанию помочы союзным армиям, особливо армии Совітского Союза, котра приняла на себе головны удары фашистской машинерии. Так Лемко-Союз, його отділы жиют днеска под покровом Карпаторусского Общества. В великой колонии місті Торонто, благодаря тым людям, был организованый торговый кооператив, котрый потом розросся в Славянский Торговый Центер. В Торонто, Онт., и в Гамильтон, Онт., тото Общество днеска має свои власны Народны Домы. Предсідательом в теперішный час Карпаторусского Общества єст Михаил Капко, родом из Подкарпатской Руси, а Секретарьом Михаил Лукач, родом из Пряшевщины.


НАША МОЛОДЕЖЬ

Коли организувался Лемко-Союз, то молодежь нашой емиграции уж барже вся выросла и не получивши жадной программы от своих родителей, отошла и стратилася от нас. Но часть нашой молодежы ище остала при нас. Тота молодежь начала организовати свои молодечы отділы и помагала выдавати за пару літ Лемко Журнал, місячну книжечку для молодежы по-английски. В редакции помагал Теодор Горощак, тепер аптекарь в Патерсон, Н. Дж., Джюди Мирек из Детройта, Мич. За их часов отбылося пару съіздов молодежы, с котрых єден был в Кливланді и єден в Нью Йорку. Фотографии с тых двох съіздов тоже приведены в рядках той статьи. Но им не было уж дуже меже кым организацийну роботу розводити, по друге — финансы нашой организации были за скупы, абы уділити им столько, сколько ведлук провизоричных обчислений требувалося на таку организаторску роботу. Длятого около 20 літ тому съізд установил в газеті місячну страничку для молодежы, редакторьом котрой стала Анна Чачо Ющак, из Юнкерс, Н. Й. Помимо того, што страничка печаталася регулярно, молодежь николи не поинтересовалася помочы розвити єй, або организоватися при єй помочы.


NYYouth
Съізд делегатов молодых клубов Лемко-Союза в Лемко-Клубі 35 Ист, 2 улиця, Нью Йорк, Н. й., в 1937 року.

ClevYouth
Съізд делегатов клубов молодежы Лемко-Союза в Кливланд, О., 1037 Старкведер стрита, Кливланд, О.

Но мы зато не показалися дочиста без молодежы. Под руководством лидеров при нашых отдiлах по ріжных місцевостях организовалися не лем танцорскы группы молодежы, но и курсы родного языка. Такы школы велися роками в Торонто, Онт., под руководством Николая Цисляка и Владимира Пейко, в Юнкерс, под руководством Анны Чачо и Стефана Кичуры, в Монтреалю и другых місцевостях. Славны выступления нашой молодежы были в Канаді, особливо в Торонто, Юнкерс, Пассайку. В Нью Йорку под Предсідательством Н. Цисляка была славна діточа группа в часі войны, котра выступала не лем в місті, але и подальшых містностях, як Неварку, Джерзи Сити, Ансонии. В Нью Йорку тота группа меже иншым выступала в концертах другых народностей, як в величавом Мангаттан Центрі и славной Карнеги Голл. Послі войны така молодеча группа выступала разом с старшими в Международных фестивалях в Поблик Аудиториум в Кливланді, штат Огайо. Теперь такы группы существуют под проводом Стефана Милян в Пассайку и Софии Цисляк в Юнкерс. Во многых місцевостях ище и теперь можна организовати молодежь для отдельных выступлений. Мы надіємеся, што в нашом Лемко-Парку тота наша молодежь найде таку нову возможность и средства, якой до сего часу не мала для свойой организации.


ПОМОЧЬ РОДНОМУ КРАЮ

Помочь, котру оказал Лемко-Союз родному краю, в коротком описати не можна, бо то была помочь так политична, економична, як и культурно-просвітительна. Посредственно або непосредственно до краю было высылано кількаразово делегацию. В справі Лемковщины было заслано десятки ріжных заявлений, меморандумов, протестов, к ріжным правительствам и урядам. Не все и не всьо то помагало, но в даякой мірі улекшало положение нашого народа.

Помочом нашому народу уважаме и тоту нашу помочь, котру мы соберали и передавали в часі послідньой світовой войны и послі ней. Самых фондов через Русский Релифовый Комитет было передано 90 тысяч долларов. Понеже мы помагали, то тым дали примір и нашым церквам и другым организациям, клубам и братствам, котры по нашому приміру собрали 110 тысяч долл. На сам шпыталь Боткина в Москві было собрано 35 и пол тысяча. На молоко дітям на Украині 5 тысяч.

Канадска наша сторона кромі жертв закупила пару сто шпытальных лужок для воєнных шпытальов в Совітском Союзі. Кромі того было собрано около 200 тонн одежы для войном знищеного Совітского Союза.

Сейчас послі войны при помочы Лемко-Союза повстал Лемковский Релифовый Комитет, котрый отразу начал громадну роботу и готовый был собрати пят миллионов долларов на отбудову родного краю Лемковщины. Примусове выселение убило тот план, и Релиф Комитет положил рукы на цілых десят літ. Теперь он отновил свою роботу, але уж в меньшых розмірах, народ даст настолько помочы, насколько буде виділ справедливости для лемков со стороны их там правительств. Мы дальше не покладаме рук и не положиме, а будеме домагатися справдливости и правды для нашого народа, котра ся му належит, яко народной етнографичной группі, в якой державі она бы не жила.


ЮБИЛЕЙНЕ ЗАВЕРШЕНИЕ

Початкы Лемко-Союза были трудны, не лем зато, што наш народ был слабо грамотный, поділеный на религии и розбитый народно, но и зато, што тоты початкы припали нам на час світового кризиса. Люде остали без цента и со страхом смотріли в будучность. Но завдяки великой жертвенности тых передовых людей и честному труду обох редакторов в тых початках, як и долголітному менажеру Антону Цисляку, котрый связувал концы с концами, тым робочым в редакции, котры больше дбали о организацию, як о свою плату и переносили всякы трудности ради ней. Благодаря им всім наша организация Л. Союз пережила трудны часы своих початков, а коли уж настали лучшы часы и организация поширена, то она смогла доконати тых великых діл, якы осталися за ньом и якы надіємеся выполнити в будучности.

Выпало так, што в тоту 30-ту годовщину Лемко-Союза наша емиграция высилилася на велике чудо. Она купила Лемко-Парк. Купила його на сплату, но наш народ, благодаря свойой сознательности, при помочы свойой газеты кинулся гасити моргич Парка, так як пожар сусідской хижы. Всі признакы указуют на то, што до єдного рока от покупкы того Парка там буде єден из найбольшых праздников, а то буде паленье моргичу на той величавой и прекрасной институции.

Набытие Лемко-Парку треба уважати за найбольше событие, яке нам на емиграции приключилося. При помочы того Парку мы надіємеся провести много такой народной роботы, котру до того часу мы не встані были выполнити. Лемко-Парк переводит нас в новы условия, в котрых мусиме глядати новых дорог в выполнению нашых цілей и нашой программы.


РЕДАКЦИЯ И ТИПОГРАФИЯ ЛЕМКО-СОЮЗА

Празднувати тридцетлітие организации, а не сказати ничого о том огниску, котре поддержує єй житья и розвитие, тот аппарат, при помочи котрого она двигатся вперед, было бы не точно и несправедливо, подобно, як устроити парадне весіля без музыкы. Редакция и типография, то єст гармония народного єдинства. И хоц тысячы членов и читателей были в редакции Лемко-Союза, виділи типографию, лайнотайп, прессы и другу машинерию, то десяткы тысяч читателей нашой газеты и Календаря, не мали нагоды быти в редакции, ани видіти, як печататся тота их народна газета, котру они так сердечно любят. Так редакция вышла и им на встрічу.


Printshop
ТИПОГРАФИЯ ЛЕМКО-СОЮЗА: Пресса. Печатник Алберт Дейвис печатат календарну часть нашого Календаря-Книжкы на 1960 рок. В боку на Лайнотайпі робит Стефан Кичура, а позаду розговорюют в якой-то справі — Николай Цисляк и Даниил Журав. Алберт Дейвис працуе печатником на прессовых машинах в нашой типографии больше 18 літ.

Дня 3-го ноября, на самы выборы, коли печатание Календаря уж кончилося, зашол в нашу редакцию фотограф місцевой газеты “Геральд Стейтсман”, Стефан Гонда, котрый соберал многы съізды Лемко-Союза в Юнкерс, и сфотографувал несподівано при роботі всіх роботников нашой редакции и типографии. Найперше, як добрый приятель нашого менажера Даниила Журава, то он його сфотографувал, як Журав зводил докупы отчет Лемко-Союза за місяц Октябрь на рахунковой машинкі. Нашого прессмана, Алберта Дейвиса, злапал на роботі на прессі, котрый печатал календарну часть Календаря на 1960 року; наборщика Стефана Кичуру, який только што отставил 43-тье число газеты “К. Р.” и брался до набору корректуры той самой части нашого Календаря. Експедиторку Анну Лизак, як она готовила адресы для высылкы 43 числа газеты “Карпатской Руси” и редактора Николая Цисляка, як он оглядал новонарожденный 43 номер газеты.


Printshop2
ТИПОГРАФИЯ ЛЕМКО-СОІЮЗА: Лайнотайп. На той машині набератся наша газета, нашы Календари и друга литература Лемко-Союза. Сотрудник газеты и наборщик типографии Лемко-Союза, Стефан Кичура, наберат статью, котру читаме о 30-той годовщині Л. С. Он наберат на тых самых ключах по-русскы и по-английскы, без ріжницы, што русскы и англ и йены буквы сут розложены в розличных місцях кажда. Стефан Кичура працуе наборщиком и печатным композитором, як тоже и на другых роботах в типографии Лемко-Союза 25 літ.

Так, як видите, выглядала редакция и типография Лемко-Союза в тридцетой годовщині єй основания. Тото не было рок або два тому назад, а пару тыждней перед готовым и оправленым Календарном на 1960 рок. То єст перший выпадок, што показали зме світу нашу лемковску типографию и нас самых, тых людей, от котрых залежит наша газета, абы была в Вашом домі каждого тыждня на час с новостями, котры в большинстві сами читатели пишут.


Printshop3
ТИПОГРАФИЯ ЛЕМКО-СОЮЗА: Експедиторка Анна Лизак, рожден в Скатсдейл, Па., а выхована в селі Ясюнка, Горлицкого повіта, на Лемковині, из роду Шведов. Муж Илья Лизак, родом зо Ждын Горлицкого повіта. Анна Лизак наклеює почтовы маркы и адресы на газету ч. 43 “К. Руси". Она працуе на той роботі больше 11 роков.

В слідуючой тридцетой годовщині тых людей уж ту не буде, они выйдут на пенсию, а их місце займут новы, молоды и енергичны заступникы. Та и сама редакция не буде така сама. Она буде мати модерне устройство. Машинерия, при котрой они будут робити, буде новійша и модернійша. Надіємеся, што и судьба того рода, за ліпшу судьбу котрого боремеся, буде инша, ліпша и счастливша. Надіємеся, што за тот час наш многострадальный лемковский народ получит свободу свого материального и культурного розвития, што в ньом буде много ученых, котры будут працувати для добра народов. Надіємеся, же за тот час світовы границі не будут такы тверды, як днеска, же народы придут до ліпшого порозуміния, научатся разом в згоді жити на земли и великым державам не буде страшно дати свободу каждому тому, кто лем єй хоче. Так и в нашой редакции на місце днешных роботников будут приходити нашы учены с краю на обмін роботом, а нашы діти с Америкы будут ходити на обмін роботом до нашых народных и культурных институций в старом краю. То уж не буде зватися помочь єдны другым, а просто обмін, счастлива кооперация.


Printshop4
ТИПОГРАФИЯ ЛЕМКО-СОЮЗА: Новый менажер типографии Лемко-Союза, Даниил Журав, в свойом офисі переглядат рекорды членов: Л. С. и читателей “К. Руси”. Тут он сводит отчет приходов и росходов за місяц октябрь 1959 р.

Народна робота подобна до сіятеля дробного зерна. Сіятель сіє добре зерно в землю с том надійом, што оно ея прийме, выросне и принесе плоды. Таке саме добре зерно сіє и наша организация, абы в будучности дождатися плодов радости и мира.


KPEd
РЕДАКЦИЯ ЛЕМКО-СОЮЗА: Редактор газеты “Карпатска Русь” Николай Цисляк в свойом офисі получат информации от ріжных людей и с ріжных місцевостей.

Бо мы надіємеся, што не лем наша редакция змінится, але што змінится и тяжке житья нашых лемков там на их родных землях, што никто не буде проклинал ани свою судьбу, ани свой край, што никто не буде боялся го, а каждый буде хвалил го и тяг ся до нього. За таке поліпшение мы все працували, боролися и страдали. За тоты самы ціли нашы отцы и діды ишли сміло на мукы и смерть. За таку будущу зміну на ліпше и мы на емиграции организовалися в Лемко-Союзі, абы вложити и нашу частку в тоту счастливу будучность. И мы єй внесли. Віриме, же тото, што было нами выполнено за першых, тридцет літ и што буде нами выполнено в будучности, не пропаде нам марно.

30 годовщина за нами. Нове тридцетлітие начинаме при прекрасных видах на будуще розвитие. Но так, як даколи мы не мали надост силы звернути увагу на выхованье нашой молодежы, то найбольша наша увага в теперішный час должна быти звернена на єй будучность.

Программа наша с нашой стороны по силі нашых возможностей выполнена, но не окончена. Теперь мы аж должны ширити єй на всі стороны и трудитися ище усильнійше, як до того часу, бо видиме, што тота программа, на якой основана наша организация принесла свои плоды в першой тридцетой годовщинi. Она должна дати ище ліпшы результаты в будущом тридцетлітии.

Программа Лемко-Союза веде наш народ к такой ціли, за котру каждому лемкови треба трудитися.


ПРИВІТ И ПОЖЕЛАНИЯ ГЛАВНОГО ПРАВЛЕНИЯ
Л. С. ЧЛЕНАМ И ЧИТАТЕЛЯМ “К. РУСИ”

Новоизбранне на юбилейном XX съізді Лемко-Союза Головне Правление передає свою сердечну подяку всім членам Лемко-Союза, так тым, котры от самых початков будували Лемко-Союз, як и тым, котры позднійше вклкь чилися в його будову, трудилися, жертвовали и ширили добре имя свойой организации меже другыми.

Главне Правление Л. С. выражат смуток и жаль по тых многочисленных добрых передовых членах, котры одышли от нас на вікы. Най их вічна память святится в нашом народі.

Гл. Правление Лемко-Союза призыват и дальше людей доброй волі, членов Лемко-Союза и читателей газеты “К. Русь” продолжати діло объєдинения нашого народа, любви и згоды меже нами.


ЗДРАВСТВУЮЩЫ Б. ПРЕДСІДАТЕЛИ Л. С.

1-ый Предсідатель — Теодор Кохан, Ст. Бонифас, Ман., Канада.
3-ий Предсідатель — Ярослав Кобан, Лемко-Парк, Монро, Н. Й.
6-ый Предсідатель — Иван Головач, Пассайк, Н. Дж.
8-ый Предсідатель — Василий Вархоляк, Корона, Л. Ай., Н. Й.
9-ый Предсідатель — Стефан Геренчак, Джерзи Сити, Н. Дж.
10-ый Предсідатель — Анна Ющак, Леония, Н. Дж.
7-ый и 11-ый Предсідатель — Иван Адамяк, Бруклин, Н. Й.

Cohan
Теодор Кохан, 1-ый Предсідатель
Лемко-Союза.



Bavoliak
Пок. Михаил Баволяк, 2-гий Предсідатель Лемко-Союза.


Koban
Ярослав кобан, 3-ый предсідатель Лемко-Союза.


Hariak
Пок. Макарий Геряк, 4-ый Предсідатель Лемко-Союза.


Shufflat
Пок. Георгий Шуфлат, 5-ый Предсідатель Лемко-Союза.


Golovach
Иван Головач, 6-ый Предсідатель Лемко-Союза


Adamiak
Иван Адамяк, 7-ый и 11-ый, теперішный Предсідатель Л. С.


Warholiak
Василь Вархоляк, 8-ый Предсідатель Лемко-Союза.


Herenchak
Стефан Геренчак, 9-ый Предсідатель Лемко-Союза


Yeosak
Анна Ющак, 10-ый Предсідатель
Лемко-Союза.




Chislak
Пок. Владимир Цисляк, 1-ый Секретарь Лемко-Союза


Tkach
Стефан Ткач, 2-гий Секретарь
Лемко-Союза.



Chislak2
Антон Цисляк, перший и долголітный менажер Лемко-Союза.


Fritsky
Йосиф Фрицкий, теперішный Гол. Секретарь Лемко-Союза

Merena
Захарий Мерена, теперішный Кассир Лемко-Союза.


Grabsky
Андрей Грабский, теперішный Рек. Секретарь Лемко-Союза.


Fetsitsa
Тимко Фецица, бывший Гол. Секретарь и менажер Лемко-Союза.



[BACK]