Николай С. Юрковский, Nicholas S. Yurkovsky
Николай С. Юрковский, Nicholas S. Yurkovsky
НИКОЛАЙ С. ЮРКОВСКИЙ

Два рокы тому, 6 января, 1957 року, помер во Львові Николай Сельвестрович Юрковский, виднійший лемковский діятель и народолюбец.

Николай С. Юрковский родился в селянской семьи, в Радоцині, Горлицкого повіта на Лемковині, в 1895 году. В школьном віку, родиче отдали його в высшу школу в город Горлиці, где он учылся в Гимназии и жил в народной лемковской институции Русской Бурсы враз с такыми учениками, як Симеоном Пыж из Валенного, Собином из Бортного, Гошком из Грабу Ясельского повіта и многым другыми. Науку Николаю С. Юрковскому, як и всім другым студентам, прервала Перва Світова война 1914 року, и головно австрийский конц-лагер Талергоф, где Николай был завлеченый и продержаный до 1917 року. Повернувшы с неволі, полиция його постоянно непокоила ци он єсть дома. В 1920 року он стал учительом народной школы в селі Шквиртне, Горлицкого повіта. Тут он учит дітей, бере активну участь в просвіщению свого и околичных сел, дає инициатыву основания читален, кооперативов, театральных кружов, в котрых сам бере часто руководство. Широко извістными на Лемковині были ним выцвічены представления акторов кружка из Устья Русского, а позднійше и с другых сел. Он держит связь с народными діятелями Лемковины, ходит на пішо, бідно убраный на 30 градусовых морозах до Устья, Гладышова, Флоринкы, Лабовы, Крыниці. Он бере ку собі малы сироты братов Андрея и Павла и сестру Сузанну, выходує и воспитує их. Стає на каждом місци в обороні прав свого народа, за што терпит и переслідуєся ціле своє житья.

Николай С. Юрковский ище яко студент и воспитанник Русской Бурсы в Горлицах, переживат пекло Талергофа. Послі окончения войны и повороту з австрийской неволи, он вертат в родну Лемковину. Тут в новой Польші, його назначили учительом народной школы в селі Шквиртном, где, помагаючи в народной роботі, доживат до 1937 року, коли сенацийны власти в ціли денационализации лемковского населения переводят го в центральну Польшу в Келецке воєводство. О том, чым он был для лемков, и яку глубоку любов позыскал среди них, може послужити тот факт, што по причині його перевода в Шквиртном вспыхат школьный страйк, продолжавшийся от апріля до конца учебного 1936-1937 года.

О том страйку писали много и центральны газеты, особливо сенацийный Краковский “Илюстрованый Курьер Цодзьенны”. Но в Польші уж запримічался быстрый рост фашизма, и власти не отміняют свого рішения. Николай С. Юрковский должен был покинути свою родну Лемковину, свой любимый лемковский народ.

В день його отьізда собралися толпы народа, штобы попрощати свого труженика. По пути проізда, подводы из села Шквиртне через Квятонь и Устье Русске, полно было людей. Приходят пішком лемкы даже с подальшых сел Ганчовы, Смерековця, Новиці. В той грандиозной по свому маштабу манифестации долучаются вышедшы из православных церквей в Квятони и Устью Русском крестны походы, процессии. Тот, як бы траурный, а в дійствительности триумфальный поход, єдиный в свойом роді, являтся спонтаничным протестом лемков против бездушного, шовинистичного рішения сенацийных властей. Он єдночасно показал, як лемкы чествуют своих народных геройов-патриотов.

Послі нападения Гитлера на Польшу в 1939 року, Николай С. Юрковский повертат на Лемковику. Он сейчас упоминат лемков:

“Не майте жадных выображений, бо німці отвічны врагы славянскых народов, розбили нашу славянску державу Польшу, підут они дальше нищити Совітский Союз... Мы лемкы николи не будеме помагати тым лютым врагам славян, ани не будеме мати спілкы с их прислужниками галицко-украинскыми фашистами...

Тоты слова Николая С. Юрковского неодолга сполнилися. Гитлер віроломно напал на Совітский Союз, а Украинский Вспомагательный Комитет предкладат гестапу список лемков-патриотов, интеллигенции и передовых селян, котрых яко симпатиков Совітского Союза, треба отлучити от народа, або лучше сказати — уничтожити. В тых списках, меже многыми другыми лемками записана конечно и фамилия Николая С. Юрковского. Не нашовшы його дома, грозят цілому селу. Всьо село буде арештоване, єсли не покажут містопребывание Николая С. Юрковского. Узнавшы о том Николай сам отдаєся в рукы різников, штобы лем народ не страдал по причині його особы. Николая С. Юрковского разом с многыми десятками лемков всаджают в саму найгоршу в Генеральной Губернии гестаповской тюрмі в Яслі, потом переводят його в концентрацийный лагер в Пусткові, коло Дембицы. По двох с половиком роков страданий, изчерпаного до послідных сил, увольняют с конц-лагеря и сейчас депортуют обратно в Келецке воєводство.

Коли лемкы переселялися до Совітского Союза в 1945 року, Николай С. Юрковский переселился разом с ними. Тут при браті Павлу прожил послідны рокы свойой многострадальной жизни. И тут он упокоился.

С молодых літ он был мучеником народным. Он любил свой лемковский народ, не жалувал страдати за него и народ николи його не забуде.




[BACK]