Як Я Сой Подумам... — Осиф Дзямба

Співанку тоту отспівали члены кливландского кружка на юбилею в Карпаторусском Ам. Центрі в Юнкерс, Н. Й., в неділю 26 октябя с. р.


Як я сой подумам
За горы Карпаты,
Заболит сердечко —
Мушу заплакати.
Бо в лемковскых хатах
Пусто вітер выє,
Никто в них не співат
Ни ся не засміє.
Ой горько-прегорько
Родины плакали,
Як в родных Карпатах
Хаты оставляли.
Так мы их лишили
Во великом жалю,
Бо в горах Карпатах
Нам жити не дали.
Жити нам не дали,
Лем нас выганяли,
По горах и полях
За нами стріляли.
Хотіл бы ся лемко
До Карпат достати,
Бо там в земли лежат
Родный отец, мати.
Хотіл бы ся лемко
До Карпат вернути,
Хотіл бы он, хотіл —
Свой вік там дожити.
Там в горах Карпатах
Зимна водиченька,
В каждом поли пружит
Кристальна студенка.
Напил бы ся лемко
Зимной водиченькы,
Але не досягне —
Короткы рученькы.
Америцкы лемкы
О то ся стирают,
И в коротком часі
Конгресс созывают.
Вы братья полякы
Ліпше подумайте,
Нашых братов лемков
До Карпат пущайте.
Най там собі жиют
И гніздочка стелят,
Страдальну родину —
И світ най веселят.

Осиф Дзямба,
Кливланд, О.



[BACK]