Юбилянты Симеон и Гегена Тырпак
Simeon and Helena Tirpak, Tirpack

Далеко в глубині нашой новой отчизны Америкы, бо аж в городі Бонни Терри, штат Мизури, жиют нашы краяне и читатели “Карпатской Руси” — Симеон и Гелена Тырпакы. Пришли они из Лемковины давно, бо ище: Симеон в 1904 року, а його жена, из роду Тиско, в 1905 року.

Симеону и Гелені Тырпак родилося 11 дітей, но лем семеро из них жиют. Тоты семеро дітей жиют в подальшых околицях, не враз зо своима родинами, но не забыли о своих родичах в день их 50-літного юбилею, а устроили для них 17 сентября 1957 року торжественну гостину.

Діти пришли зо своима родинами: Єва Ворсам из Литтл Рок, Аркансас, Анна Оршак из Бункер, Илл., Елек, што жиє при родичах, Андрей из Ст. Луис, Мо., Мария К. Джост, норска, Гелена Пеляк, из Чикаго, Илл., Рози Петричный из Ст. Луис, Мо. Гостьом с далека был брат юбилянткы И. Тиско из Ватертавн, Конн.

Гостина отбылася в их власном домі в Бонни Терри, котрый был чудесно удекорованый для того юбилея. Тоты приятели, котры не могли придти, обдарували посылками и поздравлениями с тым славным юбилейом.

Многая Вам літ в новой пятдесяткі!




[BACK]