Такий Ту “Стаєл” — Даниил Найдух
Америка славна,
Має грошей много,
Але як ся призриш,
То не про каждого.
Жены америцкы
Тым ся не старают,
Где хочешь, там бер,
Лем ся приберают.
Ту за модом мода
Ройом вылітує,
Єдна дусит сердце,
Друга розрывує.
Жена все лем просит
А часто и плаче,
Што она конечно
Новый “стаєл” хоче.
Хоц он часом смішный:
Стискат, грызе, дусит,
Але новый “стаєл”
Она мати мусит.
А муж задыханый
От кума до свата:
Пожичте мі грошей,
Бы жену прибрати.
Бо жена з “роспукы”
Дома не ночує,
Аж тогды приходит,
Як уж захворіє.
А мода за модом,
Аж душу выперат,
Як грошей не стає,
Чорт жену заберат.

Даниил Найдух,
Нью Йорк, Н. Й.



[BACK]