Каждый народ на світі любит тот край, в котром он родился. Человік любит родину, родичов, братов и сестер, при котрых выхавался, с котрыми ділил веселы и трудны дни житья, при котрых познавал людей и світ. 3 людей, котры любят свой край и свою родину, выходят добры граждане и патриоты. Люде выхованы в любви до свого народа и до свого краю трудятся и працуют за його добро и за його розвитие, в часах мирных. Но коли родині и родному краю угрожат опасность, любячий свою родину и свой край человік не жалує отдати своє житья, лем штобы другых спасти, штобы другых не доткла опасность природной угрозы, ци ворога в людском тілі. Так любящы свой народ и свой край люде стоят не лем добрыма гражданами и патриотами, но и героями народа. Люде, котры не любят свою родину и свой край, николи не стали ани добрыма гражданами, патриотами и с меже них не вышол николи народный борец. Меже том группом ніт народных геройов. Такых людей с давна называют не приличным именем — выродками. Може они точно не суть аж такыми, якым названием их народ назвал, но правдом єсть, што люде, котры не нашли любви до свого народа, не найдут и до другого. Люде, котры не знали пошанувати достоинство, честь, материальный и культурный доробок свого народа, николи не пошануют ани материального, ани культурного доробку чужого народа. А тот, кто не пошанує чужого, николи ничого про себе не створит. Он не думат о лучшом будущом и слідовательно не буде працувати за тым. Длятого єсть так важна черта у человіка, ци он любит свой народ. Єсли он любит, то буде любити и шанувати и розуміти чувства любви у другого человіка, буде их уважати, шанувати и жити с другыми людьми и народами в згоді и дружбі, а то єсть подвалином в житью народов, особливо в период теперішньой формы общственяого устройства.
Мы лемкы належиме до тых людей, котры любят и свою родину и свой край, хоц он был бідный и не мог нам дати роскошного житья. Штобы зробити наше житья весільшым, мы от дітинства научены были тяжко працувати, штобы тым способом поправити своє положение и выйти з недостатков. Штобы побідити бідноту, мы радо училися, коли была на то можность, як ліпше господарити, як лекше найти путь до лучшого житья и будучности. Штобы помочы собі, свому народу и свому краю, мы выходили в світ, найперше по Европі, а потом и за море. Глядаючи по світі ліпшого куска хліба, мы все жили том благородном мысльом, же єсли найдеме го для себе, то найперше поділимеся и зо свойом родином, зо своим народом и своим родным крайом. Штобы мы о ньом не забывали, мы ту на чужині тяжко працували, организовалися в найріжнійшого рода организации, абы они припоминали нам наш родный народ и край, до котрого по той або другой причині мы не могли вертати. Коли треба было, то лемкы не лем трудитися для родного народа и краю знали, они вставали нераз до борьбы с врагами за свои права. В броьбі за народну правду и справедливость лемкы мают уже за собом глубоку традицию. Ище в давных панщизняных часах смілійшы, больше отверты и сознательны лемкы творили збуєцкы шайкы, котры наводили страх на безмилосердных владітелей над народом. То доказуют не лем безчисленны легенды, но и документы. В позднійшых часах передовы сознательны лемкы, селяне и интеллигенция не раз приняли мученическу смерть за оборону чести и справедливости свого народа. Тысячы такых геройов погибли в часі Першой Світовой войны. Другы тысячы такых же смілых и отвертых лемков погибло геройском смертьом в часі Другой Світовой войны, то як добровольны участникы Совітской Армии, то яко грозны партизаны за фронтом врага. Лемкы розуміли, што побіда гитлеризма над Совітскым Союзом означала гибель не лем их родного народа и краю, но и всіх другых народов и всіх другых крайов світа. Так они и ту не пощадили ни свойой крови, ни своих жизней. Они радо отдали свои житья в той надіи, што через свою смерть поможут не лем умертвити загладу цілого світа, но и принесут радость свому лемковскому народу, счастье и добробыт свому краю Лемковщині. Як уж всім відомо, их кровь не полилася дармо, их желания сполнилися. Враг, котрый нюс с собом гибель человічеству, сам погиб и світ освободился от нужды, страданий и страху. Но свому родному краю и народу, за котрый герои не жалували отдати свою кровь и свои житья, остал выставленый на опозорену будучность, на яку не был выставлены жадный народ от темных забытых віков. Народ был немилосердно розогнаный, а його край опустошеный. Хоц як наш родный край был гористый, каменистый и неурожайный, но мы його любиме, бо то наш родный край из дідов прадідов. Лемковина, то наша колыска, то наш корабль. Потоне тот корабль, потонеме и мы в чужых морях. Поза любовь до свого краю, нам ище осталася тота славна традиция по нашых предках, боротися за право народа, за лучшу будучность родного краю. Мы не смієеме потоптати и забыти тых геройов, и мы их не забудеме, бо у нас горит огонь родинной любви до своих братов. Он розгорюєся особливо в тот час, коли нашому народу и родному краю дієся кривда. Ніт той силы на світі, ніт такого оружия, котре потрафило бы угасити тот выраз нашого сочувствия покривдженому економично народу и морально укиженому. Он сам ратуєся и просит нас о помоч. Што наш народ пробує ратувати свою материальну и моральну страту, знаме из того, што аж десят тысяч лемковскых родин, выселеных в 1947 року из родной земли на Запад, подало свои прошения о поворот. Гдекотры вернули, хоц знали, што там встрітят трудности. Они их встрітили, но переносят их терпеливо, працуют горячо, 6о радостны, што нашлися в домі отцов своих. Но тысячы родин не могли получити позволения за поворот помимо того, што им никто не доказал вины и помимо, же подавали свои прошения по четыре разы. Найбольше демонстративным выразом желания повернути в Карпаты, то был в февралю минувшого року великий съізд лемковскых ветеранов Красной Армии, Польского Войска и партизанов во Вроцлаві. Около четыриста особ из них зышлися празднувати честь 40-літия Совітской Армии, при чом горячо домагалися справедливости для лемков в их стремлениях о поворот на Лемковщину. Остаточно они звертаются и к нам, братьям своим за морьом, помочы им в справедливый их борьбі на своє священне право — жити в свойой родной и прадідкой земли.
Штобы сохранити тоту славну черту любви и общой взаимопомощи, а при том выразити нашу привязанность к свому родному краю Лемковині, уже 30 літ тому мы организовали кромі иншых, и свою народну, культурно просвітительну организацию Лемко-Союз в Америкі и Канаді. В трудных часах така организатия, то громадна моральна подпора и надія. В бурных часах во світі, в мрачных обставинах, коли не видно, в котру сторону кинутися для спасения, така организация, то єдиный и правдивый покровитель, на котрого звертат свои очы весь народ. Мусиме то признати, што минувший 1958 рок в нашом организацийном житью был єдным из найбольше оживленых и предприемчивых роков, можна повісти за всю историю той организации. Правда, што Лемко Союз николи не был многочисленным в свойом членстві. Членом Лемко-Союза вставал лем тот сознательный безстрашный и активный лемко, котрый уважался быти достойным в рамках той организации. Но зато Лемко-Союз єсть сильный своима приятелями, котры не хотят быти колодом в организации. Они волят быти добрыми приятелями, помочниками Лемко-Союза, як планными членами. Не єсть то практична политика, хоц она у нас реальна, бо голос организации, то голос народа, а голос народа, то голос Божий. Для того добрый для организации приятель, но ище ліпше, як он єсть єй членом. Всі тоты, котры думают, што они ище не достойны быти членами Лемко-Союза, должны теперь вступити до него членом, бо днес рішатся важна судьба нашого народа. При свойом малом числі Лемко-Союз веде велику роботу, но десят раз большу діятельность он мог бы провести при звычайном удвоєнию свого членства. Лем в минувшом року организовался два новы отділы до Лемко-Союза, в Мийами и Тампа, Флорида. Єсть ище много місцевостей, где можут быти основаны новы отділы, а давны подкріплены новым членством. Теперь на то добра нагода и добра пора. Як сильно Лемко-Союз єсть окруженый приятелями, можеме видіти из того, што читателей його органа газеты “Карпатска Русь” єсть четыре разы больше, то єсть добровольных читателей, котры платят за газету зо свойой охоты и поддержуют єй своими жертвами пресс-фонда. Мусиме признатися с читателями нашой народной газеты до великого успіха, котрый можна доказати так, што в поровнанию с воєнными и сейчас повоєнными часами число нашых читателей без мала удвоилося. Минувши наша пресс-кампания была тоже найвысша за всю историю прессовых кампаний, бо было собрано высше десять тысяч долляров. Пресс-кампания и особливо новы читатели начали быстрійше приходити сейчас послі того, як украинскы диписты начали выдавали свою газету для лемков для подкопания нашой газеты “Карпатской Руси”. Причин на то пару, но головна тота, што они заслали свою газету в такы місця, где лемкы николи перше не знали, ани не чули о свойой народной организации Лемко-Союза, о котром диписты так много писали. Безграничну любовь лемков до свого народа скитальцы николи не порозуміют. И само закончение пресс-кампании в маю отбылося для всіх несподіванно успішным. Народа зышлося так много, што уж десяткы роков такого здвигу народа на закончении пресс-кампании люде не памятают. Издание нашого Календаря на 1958 рок было тоже успішне. Його было напечатано больше, як попередными роками и он был вычерпаный до споду. До сегорочного календаря тоже пришло столько материалов от лемков зо всіх частей земной кулі, што лем половина с того могла поміститися, а друга половина бегала отложена. Материал чисто народный, значит не писаный редактором, а народом, што свідчит о невычерпаном богатстві писательскых талантов в нашом народі. То доказ интеллигентности нашого простого народа, котрый поза свой тяжкий труд знає, взяти перо в рукы и як артист нарисувати историю, котру сам пережил, виділ у другых, або чул от них. Тоты повісти, истории, оповідания, вершы, рисункы, то неоцінимы дары, котры таятся в глубині душы нашого народа. А сколько то находится ище у тых, о котрых мы не знаме. Кто-ж може не оцінити и не любити так одареный народ. За минувший рок окріпла ище єдна организована лемками корпорация — Американский Лемко Парк, котрой ціль єсть набыти таку институцию, где наша молодежь и старшы находили бы ся в свободный час. Лем за о статный рок Правление Парка роспродало шеров на около десят тысяч долларов. Но не лем то важне, бо в попередны рокы Лемко Парк продал на около 40 тысяч долляров шеров, но в минувший рок Лемко Парк получил широку розголоску и популярность. В ньом заинтересовалися новы нашы краяне, котры до сего часу ани Лемко Союзом, ани газетом не интересовалися, якоси не могли о том довідатися, вели свои діла и жили меже чужыми народами. Их интерес в такой организации, як Лемко Парк доливат свіжой крови, бо то люде с большым опытом житья, полученым поза границі нашых организаций. Мы привітствуєме тото укріпление в нашых рядах. 3 великом славом прожила минувший 1958 рок друга наша лемковска институция — Карпаторусский Американский Центер в Юнкерс, Н. Й., празднуючы 20-літие свого существования. Велике, так бы сказати — манифестацийне торжество юбилею отбылося 26 октября. Помимо найнеприятнійшой погоды, дом Народного Центра был переполненый містным народом, но и гостями с подальша. Пассайк, Линден и Ансония были своими автобусами. Из другых місцевостей штата Коннектикот, Нью Джерзи, Пеннсильвании и самого Нью Йорка пришли люде машинами. Были с далека, як Геркимер, Ватервлит, Филадельфии, Бриджпорт и Кливланду, в штаті Огайо.
В присутности майора города Юнкерса Кристен Кристенсена, свящ. Карпаторусской Церкви Ильи Козаря и многых другых почетных гостей и многочисленной публикы была вычитана подробно вся история нашого Центра, котра єсть тісно переплетена з историом лемковского народа. Историю отчитала на английском языку секретарка Центра Анна Ющак. В специальной программі принял участие школованый кружок лемковскых танцоров из Пассайку. Он выступил зо своими танцами и народным хором. Но вся программа была открыта спетиальным номером членами лемковского кружка из Кливланду, Огайо.
Торжественне празднование юбилея Центра манифестацийно ище раз подтвердило живучость и широке заинтересованиеся народом, што будучность Центра обезпечена на далекы ище рокы. Но уж самом центральном точном, вокруг котрой был проведеный нашом лемковском емиграциом в Америкі 1958 рок, то была справа родного краю Лемковины и о нашом народі, котрый усилуєся добитися свого права на поворот в прадідну свою землю, и о його помочи из воєнного опустошения. Акцию по вопросам старого краю, лемков и Лемковины вюл Лемковский Релифовый Комитет. Из минувшорочного Календаря всі знают, што делегация Лемковского Релифового Комитета в складі єй Предсідателя Петра Гардого, Прот. Йосифа Федоронко и Николая Цисляка аж на два заводы літом 1957 року іздила в Вашингтон к послу польского правительства з меморандумом, в котром четко выражена просьба за права на поворот лемков в Карпаты, вынадгороджение за кривды по поводу примусового переселения к проєкт помощи от лемков с Америкы, єсли точкы меморандума будут приняты. Меморандум Лемковского Релифового Комитета был принятый польскым послом послів специальной резолюции, вынесеной делегатами 19 Головного Сьізда Лемко-Союза к Секретарю Польской Робочой Партии Народной Польшы Владиславу Гомулка. В резолюции делегатов Лемковского Съізда просится Польске Правительство о приянятие делегации Лемковского Релифового Комитета для обговорения справ, уложеных в Меморандумі. Долго молчал посол в Вашингтоні и долго молчала Варшава. Люде начали непокоитися, отзывалися и до Лемко-Союза и до Лемко Релиф Комитета. На практикі в Филадельфии уже состоялося 19 июня засідание для созыва Континентального Лемковского Конгресса. Скоро послі того, бо в першых днях місяца июля, Предсідатель Лемковского Релифового Комитета П. Гардый был увідомленый польскым послом в Вашингтоні, што делегация лемков буде принята в Варшаві, абы он сейчас готовил єй в подорожь. Так в субботу 26 июля в Карпаторусском Американском Центрі в Юнкерс, отбылося специально для выбора делегации созване собрание Комитета Лемко Релифа и представителей Лемко-Союза и АРК Союза из Филадельфии. Выбор делегации пал на Петра Гардого от имени Лемко Релифа, Анны Ющак от Лемко-Союза и Прот. Романа Саміло от имени Ам. Русского Карпаторусского Союза. Но в свойой поіздкі делегация представляла официально діла Лемковского Релифового Комитета. До свого товариства в подорожі Анна Ющак предложила поіздку свому мужу Йосифу, котрый на выпадок конкретных предложений, мог послужити, як коммерсийный дорадник, будучи сам представителем єдной из великых американских фирм. Подорожь была назначена на день 4 сентября 1958 р.
В день отлета делегации на Айдлваилд аеропорті делегацию сопровождали представители лемковскых центральных организаций с околицы Нью Йорка. Слідуючого дня делегаты прибыли в Варшаву, где на аеродромі знов были встрічены представителями польского правительства. И сейчас же на слідуючий день, в субботу рано делегации была приготовлена встріча Ержи Лицкым, Министром Планований и Общественной Опікы. В присутности другых лиц польского правительства в послідовавшы дни отбывалися общы нарады лемковской делегации с представителями Правительства. Результатом тых нарад дня 10 сентября явился договор, перший договор, який коли нибудь заключила лемковска делегация с державным правительством. Договор тот складатся из 15 пунктов, и относится выключно до помочы, котру Лемковский Релифовый Комитет обовязуєся подати лемкам, живущым в Польщі, так тым, котры осталися, або повернулися на Лемковщину, як и тым, котры остаются на западі.
Упомянутый договор лемками в Америкі был принятый с помішаным чувством. В ньом совсім ничого не упоминатся о точках на першом місци упомненых в меморандумі, а то єсть справа повороту для тых, котры того домагаются и вынадгорода страт по причині насильного переселения. Тых точок в договорі ніт. Зрозумілым при договорі повинно быти, што лем при принятию всіх точок меморандума може послідувати громадна кампания по сбору фондов для выполнения той великой по свому розмаху материальной помочы. Головне Правление Лемко-Союза на свойом засіданню, послі справоздания делегатки Анны Ющак, рішило одобрити договор по його практичной вартости, бо лучше было подписати договор и оставити собі открыты двері для дальшой діятельности, як не подписати ничого и закрыти за собом двері в дальшых розговорах с Польскым Правительством. Но остаточне слово все ище остаєся за Лемковскым Конгрессом, котрый скликуєся в началі сего 1959 года, бо теперь лем от нього залежит, ци он згодится провести обширну кампанию по сбору жертв на помоч лемкам на основі того договора, бо содержание договора означат успіх, або неуспіх той кампании. Конгресс може принятися до кампании, а може требувати полнійшого объяснения, або гарантий прав, же лемкам не буде ставлено опору для повороту зо стороны так повітовых, воєводскых и державных властей. Єсли таку гарантию Лемковский Конгресс получит, то тот договор може быти легко выполненый на протягу пару літ. Гдекотры лемкы так в краю, як и тут в Америкі вскинули руками, што всьо пропало, и малюют чорну картину гибели лемковского народа. Тых краняов треба успокоити. В такых выпадках ліпше не горячитися, а приглянутися ділу з реальной стороны, як бы можна поправити діло, то в єдном, то в другом місци, бо он не єсть выроком смерти. Холоднокровно можна дальше зайти, усунути недостаткы. В ділі лемков Польске правительство само прийде на тоту точку, же не лем треба признатися, же лемкам была кривда зроблена, но и направити єй. Йому вынародовление лемков не принесе жадной корысти, ани чести. Оно мусит жити с лемками и дати им то, што по праву каждому народу належится, бо жиєме в ХХ столітню, не в Х-том. Минувший рок был дуже важным в нашой истории. В ньом не было всьо выведено на окончательный порядок, но был зробленый великий початок, котрый при доброй роботі и усилию так крайовых, як и американскых лемков в єдинстві дал подставу вывести нас на ліпшу дорогу. Бо важным, и то дуже важным событием минувшого 1958 року было то, што затаєны лемкы вышли на явь. Польске Правительство, подписуючы договор з Лемковскым Комитетом, признало, што в Польші суть лемкы, што с ними єсть своя проблема, што они были окривджены, и што лемкы потребуют помочы. С тым документом началося діло, котре никто не сможе затерти, а с тым не може затаити права лемков на свою прадідну землю, на свой лемковский край в границах Польской Республикы. О том больше довідамеся в том новом 1959 року. |