Кружок Молодых Лемков в Пассайк, Н. Дж. — Анна Милян

При нашых отділах Лемко-Союза в Пассайку организовался танцорско-хоральный кружок, за котрый остатныма часами много пишеся в “Карпатской Руси”, а єсть уж дуже народа, котры виділи выступление нашой группы на сцені Карпаторусского Центра в Юнкерс и другых містах, а в будучи ости будут их ище веце раз видіти. Ту пониже єсть фотография с того кружка. Таку єдну фотографию в кольорах послала-м свойой родині, што жиют коло Львова. Як раз моя братова была в колгоспі на полю в роботі, як єй почтарка принесла до поля моє письмо. Коли отворили, то не могли насмотрітися на тоту группу, на наще убранье. Потом она показувала другым людям. Всі хотіли знати, где мы такых крайовых костюмов набрали. О том напишу дальше. А ту лем хочу додати, што мене виділи при ступці, то гварили жебы-м все пенцакы товкла, бо они уж пенцакы в ступках не товчут, ани зерно не мелют на муку в млинцях. То тым вы не старайтеся, бо и я не товчу, тото, што видите, то лем для забавкы и на показ нашому поколінню, як даколи тяжко треба было на житья робити.


PassDramaClub
ЛЕМКОВСКИЙ ДРАМ-КРУЖОК В ПАССАЙКУ: — На лемковскых вечерках в Юнкерс, Н. Й., в февралю 1958 г.: Діти з ліва на право сидят: Александер Козик, дівча Гелен Гойдич, Владимир Магала. Сидят дівчата от ліва на право: Мериєн Рущак, Мериєн Марин, Анастасия Гойдич, Мария Фучила, Мария Козик, Андрей Карый, Григорий Кузмич. От ліва на право стоят: Мария Брунда, Юстина Халопий, Анна Єзуско, Мария Кузмич, Єва Шуфлат, Люба Тарас, Анна Березный, Олена Брунда, Мария Шуфлат. Хлопи от ліва на право: Андрей Кичура, Семан Фучила, Иван Кузмич, Иван Рущак, Фецьо Стец, Михаил Марин, Петро Гойдич, Николай Гойдич, Викентий Халопий, Илько Шуфлат, Захарий Мерена, Анастасия Магала, Анна Милян.

LEMKO DRAMA CLUB IN PASSAIC: — At Lemko festival in Yonkers, N.Y. in February 1958: Children from left to right sitting: Alexander Kozik, girl Helen Hojdich (Gojdich), Valdimyr Mahala. Sitting girls from left to right: Marian Rutsock, Marian Marin, Anastasia Hojdich, Maria Fuchila, Maria Kozik, Andrey Cary, Gregory Kusmich. From left to right standing: Maria Brunda, Justina Halopy, Anna Esusko, Maria Kusmich, Eva Shufflat, Luba Taras, Anna Beresny, Helen Brunda, Maria Shufflat. Boys from left to right: Andrew Kuchura, Seaman Fuchila, John Kuzmich, John Rutsock, Fred Stetz, Michael Marin, Petro Hojdich, Nicholas Hojdich, Vincent Halopy, Johanny Shuflatt, Zechariah Merena, Annastacia Mahala, Anna Milian.


Fuchila Kozik
Передовы співачкы Лемковского Кружка в Пассайку: Мария Фучила и Мария Козин.

Крайовы убранья мы зачали шити ище в 1931 року. В тоты часы в Пассайку ище ани отділа Лемко-Союза не было, лем в Клифтоні был. Мы хотіли зробити в Пассайку забаву в Русском Народном Домі на 4-ой улици, а на забаві выдати три надгороды за найкрасшы лемковскы народны костюмы. Я не належала до отділов Л. С. в Клифтоні, але и так постановила-м посберати крайовы молодята зо Саноцкого повіта. Просила-м молодых хлопців, жебы єден взял за молодого, другий за молоду. Тыма хлопцями были Николай Гойдич и Тимко Магала. Гойдич был за молоду. Я пошила убраня про молоду, а про молодого ногавкы и лайбикы шил мой брат Тимко, але скравал кравец небощик Гриц Глова зо Мшаной. Так “мои” молодята достали першу надгороду, а друга молода пара достала другу надгороду. Тота друга пара мала выграти, але нас зо Саноцкого повіта была векша сила, то мы перемогли и дали зме своим. А в 1933 року уж веце жен набрали охоты и начали шити веце лахів про хлопів и жен.

HalopiMilianEzusko
Передовы членкини Лемковско Кружка: Юстина Халопий, Анна Милян и Анна Езуско

Дальше мы задумали показати обычай старокрайового весіля на сцені, но программы нам не было кто написати, то лем было показано, як ся зберали нашы лемкы на весіля. Поспівали, потандували, але на сцену ани не выходили. А народа было так, што на той гали ище нигда тилько народа не виділ никто, ани перед тым, ани потом.



Lemko Eve
Лемковский Кружок в Пассайку: на “Лемковскых Вечерках” в КРА Центрі в Юнкерс: на сцені печут когута.

Были у нас в Пассайку организованы молоды танцоры под управлением Анны Похна, была лемковска школа, где училися читати и писати под управлением Георгия Шуфлата и Теодора Горощака, грали представления под управлением Ярослава Кобана, 37 представлений было дано при Кобані и 32 при Шуфлаті, мали мы лемковский хор, котрый учыл Николай Капец, была организована “бюгел-драм” оркестра, котра навет пару раз была на соревнование с группами другых народностей, где выграли другу надгороду, выступали ажи на парадах в Нью Йорку и на світовой выставкі в 1939 року. Про мене был великий удар, як группу розвязали, бо я их организовала. Многы из них розышлися помеже другы группы, где суть музыкантами и танцорами. Но але мене хоц то радує, же вышли до люди, не пішли по планным путям. Но теперь уж мам практику, што таке дашто утримати трудно, бо люде єдны дорастают, другы старіются, то все мушено штоси нове организовати.


PassGuys
Хлопці участникы Лемковского Кружка в Пассайку, Н. Дж.

Пару років тому мы вернулися до представления. Ставили зме старокрайове весіля 4 разы и Лемковскы Вечеркы два разы. Теперь мы дополнили нашу группу молодыми и нами управлят Александер Козик и його жена, моя донька и зять. Співом управлят молода Дженнет Фучила. То суть нашы лемковскы американскы діти. Дженнет Фучила, Мария Шуфлат, Мария Рущак, Мериенн Марин, Ненси Гойдич, Анна Артимик, Александер Козик, Стефан Милян, Иван Кузмич, Семан Фучила, Николай Гойдич, Илько Шуфлат. Зо старшыма теперь нас єсть велика группа. И як нас теперь така группа єсть, то я бы собі жичила, абы мы зобрали “Лемковске Весіля” на фильму, покля маме ище крайовых людей меже собом, котры памятают, як то было, бо ходили по весілях. А нам того никто не зробит, як мы ся минеме. Молоды не знают, бо не виділи, а дуже з них встыдаются своим. Но мала частина ище єсть, што любит своих родичов и их прекрасны обычаи. Была рішена тота справа и на съізді І Округа Лемко-Союза в Джерзи Сити, же як покажеся потреба, то Округ поддержит нас в том финансово.

От душы я бы собі того жичила.


Анна Милян.


[BACK]