С Новым Роком — 'Яков з Лосі'
С новым роком, с новым счастьем,
И с надійом лемкы,
В гору сердця, сильны духом,
Всі братья любенькы.

В гору полны чашы вина
Весело вздвигайте,
И на ліпшу долю нашу
Руны сой подайте.

С Новым Роком жичу Вам,
Мои братья лемкы
Дочекатися нам всім
Той ліпшой доленькы.

Бо як знате, больше правды
Для нас бы ся здало,
И най бы ся взбогатило
Тото ровне право.

И жебы зник шовинизм,
Як банька на воді,
И настала згода мир —
В славянском народі.

Бо лем в любви, в згоді
Счастье скоро росне,
А при кривді и незгоді —
Житья незаздростне.

Жебы правда подросла
И квіт розвивала,
И для нас скривдженых лемків
Утіха настала.

И най бы ся выполнило,
Чого мы прагнеме
И на то нас не змушали,
Чого не хочеме.

А ище ся выразивше —
Мушу написати.
Же мы лемкы в родну страну
Хочеме вертати.

Тым, што мают на то силу
Брати и давати,
То им жичу справедливость
Зреализувати!

И най уж бы им в том році
Вшиткым сердця змякли,
На нашу лемковску землю
В тых селах не вакли.

Бо социализм николи
Того так не гварил,
Бы моцнійший брат слабшого
С власности вышмарил.

Бо ни Маркс, ни Ленин
Того не писали.
Бы богаты біднійшым
Хліб с уст выдерали.

И на добро вшиткых люди
В той Польші людовой
Жичу як найсердечнійше
На тот рочок новый.

Жебы столиця Варшава
Ліпшы очы мала,
И дозріла всього всяди,
И добре збадала.

Тым, што цілым крайом рядят
И права выдают
И над каждом важном справом
Глубоко думают.

Тым я жичу в новом році
Пятдесят девятом
Усунути тых, што ище
Ходят вперед пятом.

Тых, што не хтят лемкам
Власность повернути,
Лем кривду, ненависть
Хотят продолжити.

Тым, што собі легковажат
Нашы просьбы красны
И не хотят направити
Нашы кривды страшны.

Тых, што с давна ненавидят
Каждого славяна.
Та и хлопів тыж не любят,
Лем шляхту и пана.

Тых, што социализм хвалят,
А лем поверховно,
А потиху саботажу
Робят всяди полно.

Такых вшиткых, то я жичу
В том році прогнати,
Без них сильну социальну
Польшу будувати.

А при конци ище жичу
В той Польші людовой
Такий твердый социализм,
Як мур бетоновый.

Нашым лемкам ище жичу
Теперь на остатку,
Жебы ся внет дочекали
Такого порядку:

Жебы ся в ярь ладували
С худобом, с возами
И вертали, откаль пришли
Пред десять роками.

Яков з Лосі.


[BACK]