О Лемковском Музею в Саноку — 'Саноцкий Лемко'
Museum
ЛЕМКОВИНА: Музей Саноцкой Земли в Саноку
містится в том старинном княжом замку.


Лемковского Музею, яко такого, в Польші теперь неє, хоц тота справа нияк немаловажна для нашого народа.

Будучи, єднак, объективным, ниякий лемковский интеллигент, ци діятель, не мог бы з руком на сердци зашмарити, же тота важна для каждого культурного народа справа лежит в Польші отлогом. Мысли охороцити всякы лемковскы памятны в даяком малом музею в Польші знаны с давна. Но до 1930 року, якоси никто не взялся за тогу справу серьозно. Каждому сознательному человіку ясно, же музейництво єсть тісно связане с историом каждого народа. Лем через музейны забыткы можеме показати молодежи, як жили нашы дідове, няньове и як проходили всякы зміны с бігом часу в народі.

В Саноцкой земли, котра от княжых часов на Руси мала велике значение для вшиткых русскых племен, бо ту ишла дорога на Венгрию и до Польшы, давно задумували створити Лемковский Музей. В 1930 року виднійший науковец профессор Лев Гец, прихильница лемковского народа Ирина Добрянска и другы передовы люде дали инициативу на основание першого Лемковского Музея в Саноку. Тоту думку поперали гдеякы священникы и селяне лемкы, котры своими сборами започаткували перший експональный список предметов, годных музейного перехования для потомства.

Списаны и зведены памяткы, як лемковска одежа для обох полов, мужчин и жен, ногавкы, холошні, лайбикы, керпці, гунькы, чуга, капелюх с крейком, чехлик, фартух, кабат, запаска, горсет, фацелик, гуньчата и др., и знарядя, як млинец, ступа, скрипкова січкарня, соха, борона, шуфли-віялкы, греблі, вилы и кухонны знаряды и другы зложено в двох комнатах приходства саноцкой церковці и названо то шумно — Лемковскым Музейом.

Саноцкы общества и товариства прогрессивных направлений вносили не єднократно письма до властей Санока и Львова, абы на приміщение Музея дозволено в старом княжом замку в Саноку. Польскы власти ся на тото не погодили и справа так зостала.

Корыстаючи из воєнного замішательства, и в часі, коли Польша в 1939 году провалилася и польскы паны утекли, народ ище не знал, ци Санок прилучат до сферы вплывов Совітского Союза, ци германскых. Скоро по утечі саноцкых властей с замку, где містилося товды староство повітове, гдеякы лемковскы діятели и управа Лемковского Музея уважали за подходяще перенести вшиткы собраны експонаты музея до княжого русского замку.

Русского походжиня замку не заперечают, ани польскы писатели, меже ними Владыслав Духарский, котрый в свойой книгі “Документы Земі Саноцкой”, выданой в Саноку в 1868 року, ани ученый Януш Самолєвич в книжкі п. з. “Сонд высшы права нємєцкего на Саноцкім замку 1425— 1552”, выданой во Львові в 1913 року.

С. Удзєла в свойой книгі “Зємі Лемковскєй пшед пулвєчем”, львовске выдание 1934 року ани тыж веце теперішный директор “Музеум Зємі Саноцкєй” в свойом труді “Санок и зємя Саноцка”, выданой в 1958 року в Саноку.

Вшиткы они твердят, же замок саноцкий збудуваный ище в тот час, коли тоты земли належали до галицко-русской державы и знаны были уж в Х столітню, а коли в 1342 року тоты лемковскы земли прилучено до Польшы, из-за смерти Юрия Тройденовича и пару роков придержано ище, як “Terrae Russiae in Castelania Sanocensi” землі русскы з власным старостом и правом русскым, то замок тот был осідком тых старостов. Аж позднійше введено польскы права, а замок по перестроєнию його через королеву польску Божу — стался осідком польскых королевскых управителей.

Лемкы уважали слушно, же там повинен повстати Лемковский музей.

Коли Совітска Армия изгнала германску навалу фашистов, польска народна власть, хоц вышмарила лемков из Санока и околицы, то не впроваджала уже свого старопольского уряду до замку, але переименувала його в “Мзеум зємі Саноцкой”.

Власть польска, дирекция музею польска, але памяткы остали праві самы лемковскы и так они суть до днеска.

Правда, дуже цінных памятников по просту выкрадено, або знищено. С превеликого списку експонатов лемковскых с перед войны остали лем решткы. В остатных часах довезено до тых зборов ище ріжны образы з розбуреных церквей. В той хвили иде поставка будовы єдной стародавной церковці лемковской, котра стане незадолго яко нестертый свідок минулого обок замку Музея Зємі Саноцкой на Замковой Горі.

Єсть там богато образов незнаных русскых и лемковскых артистов-маляров минулых столетий. Єсть там иконостасы, всякы різьбы, кресты, выкопалиска, яко свідкове культуры лемковского народа.

Наклал на консервацию тых вшиткых цінностей єсть смішно малый в поровнанию на наклады, што идут на забыткы чисто польскы. Наш лемковский газда обіднілый на западі, интеллигент слабо уложеный на посаді и його заробок місячный не выстарчат николи ани до половины місяца, лем на саму скупу, неомащену поживу, не годен никто класти жертв на консервацию лемковскых забытков.

Належало бы спонукати польске правительство до поважнійшых накладов на консервацию и дальше громаджинья нашых памяток. Шкода, же наша делегация в сентябрі 1958 року не знала про тоту важну справу.

Мі ся здає, же найкрасшым розвязаньом той справы єсть передати Музей Зєми Саноцкой до рук самым лемковскым управителям и товды и наша лемковска емиграция допоможе му набрати надежной вагы и розмаху.

Нашы стары лемковскы плугысохы, бороны, млинці, сусікы, всякы горці, тарелі, лыжкы и десяткы красных и цінных деревяных газдовскых и старовыжитых лемковскых свідков минувшости выставлено у десятох близко комнатах музея-замку, спорохнявіє гнет без дальшой вымаганой консервации. Єсли мы сами не поинтересуємеся тым ближе и ширше як дотеперь.


Саноцкий Лемко.



[BACK]