Лемковина и Лемкы — Иван Русенко
ШТО В НАС БЫЛО

В нас была давно своя страна,
3 діда-прадіда власный край
И своя земля заорана,
Зелены горы,
лісы и боры,
чудный край.
Быстры потокы и потічкы,
Поляны, лукы серед гір,
Узкы долины понад річкы,
А в лісах-борах,
зеленых горах
всякий звір.
В нас были села доокола,
А в селах повно хиж.
В дакотрых селах была школа,
Церковь-каплиця
и склеп-крамниця,
корчма тыж.
И жили в селах хлопи-жены,
Народ наш сельский жил,
Хлопці, дівачта премилены,
Были и паны,
были циганы,
Хоц-кто был.
Лем земля была небогата,
Для вшиткых, реку, хліба ніт;
Треба нам было дорабляти
Зменьшити горе
Ити за море
в чужий світ.
В краю зостали няньо стары
И жена з дітьми в тяжкий час;
А мы робили, як сомары,
Кости боліли,
рукы нам мліли,
най то фрас!
А кедь мы грошы заробили,
Зас зме вернули в старый край.
За пару роков ся змінило,
И в родном селі,
Світ повеселіл,
як тот май.
Але недовго гарді было,
Бо настал страшный час.
Світова война розгоріла
И нас в темниці,
на шибениці
брали нас.

Русенко Иван.



[BACK]