Иван и Магдалена Кулик
John, Magdalena, Kulick, Kullick, Kullik, Kullick

50-літный юбилей супружества Ивана и Магдалены Кулик отбылся в неділю 4 октября 1958 року, в Линден, Н. Дж. Юбилей был устроєный и проведеный под руководством брата Магдалены Кулик — Мирона Перон и його жены Марии, бо Куликы суть бездітными.

Иван Кулик, родом из села Цигелка, Бардейовского округа на Пряшевской Лемковині, а жена Магдалена, из роду Перон, из села Ганчовы, Горлицкого повіта.

Обоє Куликы давно предплачают, и читают нашу газету “Карпатску Русь” и суть близкыма приятелями Лемко-Союза. На их 50-літный юбилей зышлося поверх сто гостей, што бы отдати им честь и отпраздновати с нима весело тот дорогий в их житью день.

История Ивана Кулика дивна, хоц и многы нашы американскы лемкы єй проживали. Он родился в Цигелкі, но уж єднорочным родиче взяли го до Америкы, но о два рокы повернулися с ним обратно до Цигелкы. Отец його по року житья вернул в Америку, а Иван остал при мамі в Цигелкі до 15 року житья, коли и он уж сам пришол к отцу к майнам до Пеннсильвании, но по рокови оставил няня при майнах, а сам поселился в Байонн, Н. Дж., где проробил 44 рокы в богатой Стандард Ойл Компании. Теперь, они жиют на пенсии в добром здоровью и счастью.

Меже нашыми людьми в америкі находиме цілы десяткы такых счастливых пар, котры отпразднували свои 50-літны юбилеи 10, 15 и 20 літ тому, и всі они в большинстві находятся в крепком здоровью и весело в удовольствии продолжают доживати свой золотый вік. Жичиме всім той крепкости и веселости на долгы ище рокы.




[BACK]