Помагайте Лемковщині, Бо То Наш Фундамент — Ваньо Чергоняк

Прибывшы в Америку, хочу сполнити свой народный обовязок и передати вшиткым братьям лемкам, их головному керовництву Лемко-Союза, сердечне поздоровлінья от вшиткых лемків, котры жиют в Западной частині Польшы, и от тых, котрых лем трохи залишилося на наглой родной Лемковщині, там в зеленых Карпатах.


Fodshaka
Зоркий зхватил на знимку Ваня Фуджака; Ту он обчислює гектары и вольны хижы. Єсть пустого місця на 10 тысяч фамелий, але пустити лемков тут не хотят.
— ЗОРКИЙ.


Дорогы братья лемкы, вашы сестры и братья, знайомы близшы и дальшы в старом краю николи не забывают про Вашу помочь, яку Вы дотеперь офірували для них. Ваша помоч, яку вы оказали им, єсть найвекшым доказом невыгаслой у Вас доброты и милости до свого народа и родной Лемковщины. Так як дотеперь, не забывайте и на дальше о своих родных и знакомых, котры много раз просят Вас о помоч. Она им єсть направду потребна. Памятайте, братья лемкы, што наш народ в Польші нашолся в тяжком положению и в такой ситуации, в якой не был за час свойой цілой истории. То вшитко перешло и не верне николи.

Надышли часы, што для вашого лемковского народа засвітило яснійше солнце в старом краю. Днеска надходит нове житья и Лемковщина просит о помоч своих братов на емиграции.

В лемковскых селах и среди цілого нашого народа чувствуєся наша стародавна культура, котра была потоптана остатныма десять роками. Длятого нам треба памятати, што наша помоч тут из емиграции для нашых братов в старом краю може принести величезну корысть цілому народу.

Так, як колиси ндшы прадіды в маленькых курных хижах, далеко от ясных панскых дворів, в примитивных условиях творили нашу культуру, так подобно днеска нашы лемкы в тяжкых условиях отновляют тото культурне богатство, бо в их сердцах осталося тото добре зерно, котре посіяли нашы прадіды.

С любви и тягы до родной земли, гдекотры уж вернулися до родных сел Кунковы, Ліщин, Ганчовы, Блихнаркы и другых, и уж на верхах гор, што раз частійше можна чути лемковску співанку:


Родна Лемковщино,
Зелены Карпаты,
Як сой за вас вспомну —
Мушу заплакати...

Дбайме и розвивайме нашу культуру так на емиграции, як и в старом краю. Не забывайме про то, што нас єсть так мало, а и не вшиткы тоты можут жити на свойой родной земля, котру в наслідстві отримали от нашых прадідов и длятого забыти про ню николи не можеме.


Горы нашы, горы нашы,
Горы нашы Карпаты,
Никто не знат, никто не знат,
Кілько вы у нас вартате.
Горы нашы, горы нашы,
Горы нашы Бескиды,
Вас нам дали, вас нам дали
Нашы діды-прадіды.
Вас нам дали, вас мам дали,
Нашы горы Карпаты
И продати не казали
Ни за жадны дукаты.

Прекрасно чудесны нашы горы — зелену Карпаты, то колыска нашого лемковского народа. Свідками нашой стародавной культуры суть красны стары церкви, котры днеска, хоц в смутку, бо опущены, оповідают тым, котры отвиджают Лемковину, што ту жили колиси люде и своими руками творили прекрасну архитектуру. Гробы нашых предков с старыма фигурами, то ище єден документ доднеска не затертой нашой истории и нашого права до свойой земли и його культуры.

Длятого тым барже лемкы ту в Америці не можут николи забыти про свой край, його историю и дальше розвитие и помагати, кілько кого стати. Нам ту на емиграции треба міцно застановитися, як и чым, политично и материально можеме дати своим братьям в старом краю нашу помоч.

Треба нам ту в Америці міцно вірити в то, што Польска Объєдиненна Партия Роботнича, особливо теперь послі посіщения нашом делегациом Польшы и подписанием договора, не позволит на дальше нищити нашу культуру на Лемковщині и поможе нашим братьям лемкам, согласно Ленинской национальной политикы розвязати наболівшы проблемы наших лемков в Польші.

Треба нам ту на емиграции ширше видіти справу нашой Лемковщины для добра всего краю Польшы, а в том и самых лемков. Поворот вшиткых лемков, котры хотят вернутися и оживити занедбаны земли, повинен быти в центрі увагы нашой емиграции. Треба нам сміло повісти, што утверждания дакотрых противленинскых елементов, же поворот лемков єсть неможливий, аж с двох причин есть безосновным. В тых вопросах так сторона економична, як и нарушение прав теперішных осадников, не може быти брана под увагу. Власность землі треба отдати правдивым єй властителям. На тоту засаду покладаме велику надію, бо віриме, же Польска Объєдиненна Партия Роботнича в тот способ розвяже тоту “трудну проблему”. Всякий инший способ розвязанья той справы повинен быти уважаный нами за невзгодный с засадами Ленинского национального вопроса. Нашом надійом повинно быти то, што поворот лемков принесе велику корысть для польской державы и самых лемков. Нашым основным монятием отновы нашого житья и культуры лемковской повинен быти поворот нашых лемков до своих хиж и там розвивати традиции нашого народа. В иншом выпадку наш народ єсть призначеный на вынародовление и полонизацию, а то не принесе корысти польской державі, лем шкоду.


Sanok2
Вольна церковь в Саноку, но священнику Сєкержинскому позволили лем в єдком куті приватного помешканя отправляти, до котрого войде лем мала группа людей, А решта? Решта, што неділю стают на улици и слухают богослужение. Церковь стоит вольна — Вышинский не позволит на русску отправу.


ValleyDeath
Ту кажда грудка землі в 1944 року просякла кровью. Тота “Долина смерти” над селом Мысцовом, от стороны Полян. Недавно тіла (не вшиткы) спрятано, но міны лишилися. Купкы, котры ту видно, то міны обросли травом, Дальше постинаный кулями ліс. Тото місце по войні было заполнене оружием и трупами. — ЗОРКИЙ, 1958.


Graves
Гестапо при активной помочи січовиков отзначилося своим Звірством. На знимці: могила над Габовом, пов. Ясло, в котрой лежит около 10 тысяч єврейов помордуваных в 1942 року. ЗОРКИЙ, 1958.


Market
Ище не минуло пол рока, як до Ліщин вернуло зо заходу пару лемковскых родині, а молодый ліщинян уж явился в Горлицях на рынку зо своима деревяныма выробами. Продавал бы товар лем нема дуже кому. — ЗОРКИЙ, 1958.


Polyana
Лемковска церковь в селі Поляны, пов. Кросно. На мурах видно военны понищения, но и по войні в той церкви уж співали “Господи помилуй”. А теперь? На краю поваленой бані на мурі росне береза. То ся зове “опіка” над народныма за- бытками. В Полянах жиют переважно лемкы, но инициатора поправкы церкви Грица Бованку закликали до Кросна, настрашили и загрозили, абы не осмілялися направляти. — ЗОРКИЙ, 1958.


UsteRusk
Рынок в Устю Русском зарос травом. В долинах уж орют, а на Кичері біліє сніг.
— ЗОРКИЙ, 1958.



UsteRusk2
Устье Русске: Перша на краю от Квятони стоит хижа Стефана Пейка, знаного на всі горы робочого діятеля, а потом ком- мандира партизанской группы в літах оккупации. Он жиє на всході. а хижу занял осадник. Не раз в той хижі отбывалися партийны и партизанскы парады, а не раз спасали свое житья бігством через выгляды перед нападом німецкого гестапо и украинскых січовиков.


BadRoof
Село Устье Русске, коло ГРН (Громадского дому) гниє вольна хижа, признак “доброй” опікы, але лемкови єй не дадут, хижа, празинак “добоой” опікы, але лемкови єй не дадут. Тым часом в том самом селі уж от року Хомякова мешкат каждого тыждня в иншых людях, бо не має свойой хижы. — ЗОРКИЙ, апріль 1958.


WagonCow
Корова в ярмі перший раз в истории села Устья Русского. Даколи богате село Устье, теперь заселене лем частично осадниками, перемінилося в гніздо бідноти. Місцева реставрация штоденно єсть полна нетрезвых людей, авантюрников, блюзнерства и байок. Того рода осередком культуры єсть теперь село. Село здевастоване, и так, як и иншы — в господарском непорядку. О бідноті най свідчит хоц бы то, што єден с передовых заможнійшых осадников гр. Ярек Ян и сын, котрий єсть солтысом, робит лем коровами. От коли Устье Устьом, то корова в ярмо упряжена не была аж тепер. — ЗОРКИЙ, 1958.


DmitriPayko
В том місци, где стоит тот дом, уродился любящий лемковскым народом, особливо теперь в Полыиі, редактор “К. Р.” Николай Цисляк. На знимці: Дмитро Пейко, котрый показал мі тото місце (в Устью Русском). — ЗОРКИЙ.


Deserted
Так опустошена лемковска церковь в Ганчові, пов. Горлиці. Верхня банья на середной части упала. Дах подіравленый, як решето. В середину ліеся вода.
— ЗОРКИЙ.


Призыв до Вас лемкы, до редакции “Карпатской Руси” и до Головного Правления Лемко-Союза: помагайме, чым можеме своим братьям в краю! Помоч Ваша подобно, як и до тых пор, стократно оцінена буде Вашыми братьями в краю.

Лемковщина кличе о помочь. Помочи той не отказуйме так стары, як и молоды, бо отнова Лемковщины, то наша народна справа. Кажда година наша тут на емиграции єсть дорога, бо нашы братья в краю міцно вірят так в материальну, як и культурно-просвітительну помочь. Дописуйте вшиткы до газеты “Карпатска Русь” и подавайте вшиткы свои мысли, як бы найуспішнійше мож помочи в отнові лемковского житья в родном краю.


Ваньо Чергоняк,
Джерзи Сити, Н. Дж.

Лемко емигрант из Ліщин.



[BACK]