Хоц наше місто Кливланд отсунене далеко на запад и одособлене от головной гущы лемковской емиграции, то зато не меньше, а ище больше мы шануєме традиции нашых предков. Доказом того, же мы их шануєме и стоиме за права нашого народа, мы постаралися ту набыти свою народну твердыню, наш Лемковский Народный Дом. Ту по силі нашой возможности держимеся при том домі и розвиваме дальше народны традиции, так меже старшом емиграциом, як и меже нашыма дальше не лем проводити, але поширяти нашу роботу, бо видиме, же она выходит на пользу нашому народу.
Каждого року в нашом Календарі было написано, што ту выполнялося, о нашых предприятиях и житью в нашом отділі. Так в сегорочком Календарі я хочу описати лем то, што было в Америкі рожденыма лемками. Тот дом служит дальше тому народу, чий напись глубоко вырытый в надверном камени — світится “Лемко”. В том домі уж много было зроблено до сего часу в ділі укріплення нашой народной организации Лемко-Союза и в ділі всіх народных начинаний предприниманых том нашом культурно-просвітительном организациом. И мы гордимеся перед чужыми народами и том будовом и том роботом, яка в ньом ведеся и мы намірены в минувшом року выполнено. Не было того так дуже, бо в организации переходят всякы моменты, але то, што было зроблено, то доказ, же наш народный дом дальше служит народу.
Найперше в початку року нашы отділы устроили принятие председателя Лемковского Релифового Комитета Петра Гардого, котрый в осени перед тым был отвидіти наш родный край Лемковину. Тото предприятие отбылося 23 апріля 1958 року. Собрание было дуже успішне, бо на ньом явилися не лем нашы люде, але и оба парохы православных церквей в Кливланді — о. Петро Богуш и о. Владимир Прислопский. Они ище николи перед тым на нашых предприятиях не присутствовали. С нами по перший раз был и краян недавно прибывший с краю — Ваньо Чоргоняк.
Всі бесідникы с урядниками отділов, выслухавшы докладу Петра Гардого, призывали до тіснійшой кооперации, штобы помочи и сами собі и нашым братьям в краю. Послі формального собрания, отбылся банкет для всіх присутных, котрый прошол в дуже добром успіху. Даже наша містна кливландска пресса отмітила тото важне в житью нашой емиграции событие. Друге велике предприятие культурного характера отбылося у нас в субботу 31 мая, тоже на головной гали Лемковского Народного дома. На культурный вечер нашым новым народным роботником Ваньом Чергоняком был подготовленый концерт из нашых містных талантов. Найперше выступил хор членов нашых отділов, котрый отспівал дуже вплывово даскілька красных лемковскых співанок и дум. Они были всі в лемковскых народных строях, што надало концерту особливо красного виду. Кромі хора на сцені были исполнены два стародавны лемковскы танці, котры публика приняла з великом радостном и надгороджала их бурным апплодисментом. С співным и инструментальными солями, дуетом, триом и квартетом выступали тоже Давид Воробель, Стефан Мориляк, Ваньо Чергоняк, Текля Дзямба и Пелягия Сипляк. Мале дівча з роду Кобеляков, отдеклямувало по лемковскы вершы дуже удачно. Кромі того выступили с бесідами: Ваньо Чергоняк, Осиф Дзямба, о. Богуш и Головна Предсідателька Лемко-Союза Анна Ющак из Юнкерс, Н. Й., бо она была специально нами запрошена на тото народне торжество.
Под осін мы рыхтуєме знова устроити Лемковский Кермеш и Пущаня, наше традицийне свято, а потом знов на сцені поставиме культурну выставу. Для пару членов нашого кружка была предоставлена велика честь минувшой осени, где они заспівали єден из номеров нашых співанок на 20-літном юбилейном торжестві Карпаторусского Американского Центра в Юнкерс, где тепло и солидно были прнняти публиком. Мы будем е и дальше продолжати нашу народну и культурну роботу, тым больше, што зме далеко отділены территориом от гущы нашых краянов. При той роботі мы чуємеся счастливы и знаме, што тым помагаме нашому народу, так мы не лем не отступиме от свого, але и то, што маме, будеме укріпляти и идти с ним вперед.
Осиф Дзямба,
Предсідатель Отділа Л. С. ч. 6. |
