Пригода с Чортом — Панько Груби, Panko Gruby, West Paterson, New Jersey

Опишу тут одну пригоду, котра може и буде выглядати на байку, но то не байка, а правдива история.

То было в старом краю. В одном польском селі недалеко Грибова жило двоє старых бідных людей — муж и жена. Родины не мали ниякой, а и до костела не ходили. Жили собі на самоті в бідной хатині под лісом, то и с людьми не сходилися.

Нарешті старый поляк помер. Жена иде на клебанию до пробоща и просит, штобы похоронил єй мужа по католицкому обычаю. Поп повідат, же он помершого хоронити не буде, котрый при жизни до костела не ходил. Ище страшит бідну жену:

— Такы люде, як ваш муж, што до костела не ходят, призначены до пекла — ище гнеска в ночи приде по него чорт и го забере.

Старушка зачала плакати и просити попа дати єй раду, што ма робити. Но поп говорит, што он тут ничого не може помочи, бо до небощика уж лем чорт має право.

— Ты сама можешь переконатися, говорит поп, — што я ти сказал правду. Я дам тобі свічку, а ты идий додому, засвіт свічку и чекай, то увидишь и будешь за свідка, як чорт забере твого небощика. Но не май страху, бо тобі чорт не може нич зробити: тота свячена свічка буде тебе хоронити.

И каже поп, што то єсть всьо, што он може зробити, а больше ниякой помочы не може дати.

Так стара жена иде додому и плаче. Хоц поп запевнил єй, што с ньом ничого не станеся, но и так боится чорта. А родины не має ниякой, жебы зайти и порадитися.

Но мала она там кресного, котрого тримала до кресту, коли ище с первым мужом жила. Он праві што от австрийского войска вышол. Встрітилася с ним в селі и оповідат йому цілу тоту историю, же гнеска в ночи чорт приде брати єй мужа, а єй поп казал быти за свідка на доказ, што чорт бере вшиткых, кто до костела не ходит.

Крестный выслухал всьо, а потом повідат:

— Вы, нонашко, идьте собі додому и так всьо робьте, як пробощ вам приказал. Но не майте страху, бо я там буду и того чорта зловлю.

Так старушка вернулася до дому, оглянула небощика, ци ище єсть, а вечером засвітила свічку и сидит. За хвилю пришол и крестный, посмілил нонашку, а так вышол до сіни за двери и чекат.

Гдеси близко полночы иде чорт. Бренчит ланцухом и отверат двери. Червены ногавкы и червена шапка с рогами. Иде просто к небіщику, бере за ногы и тягне. А тут крестный скочил, схватил чорта и бье так не по людски, а по чортовски. Чорт кричит на милость Божу:

— На Бога святого не забивай!

Крестный перестал бити, но тримат и кричит:

— Чорте глупый, чого ты на Бога ся кличешь, коли ты Бога ся не боишь?

— Лем мя не забий, — просится чорт. — Я ти зроблю и дам, што лем хочешь.

— Но, я тя не забью, — говорит крестный, — лем с чорта тя здеградую.

Так найперше повязал чорта тым самым ланцухом, котрый коло него черчал, а потом сдер с него червену шапку с рогами, закликал нонашку зо свічком, жебы призрилася добре на чорта. Нонашка ахнула и кричит, же то пан пробощ. Но крестный говорит твердо, же то чорт.

Поп наново просит, жебы го отпустили, то он им вынагородит, што лем хотят. Крестный дал му приказ, што мусит поховати небіщика задармо и нонашці ище дати 3 стівкы, то вшитко буде забыто, даже никому не скажут о той пригоді.

Поп пристал и потом вшитко точно выполнил. Не лем поховал покойника и не лем заплатил старой вдові 3 стівкы, но люде замітили, што от того часу он николи больше не споминал в костелі за чорта.

Панько Груби
В. Патерсон, Н. Дж.


[BACK]