Информацийна Часть (Американскы Легальны Свята)

Религийны свята установляє церковна власть. А легальны свята суть тоты, котры установила державна власть.

В Соєдиненных Штатах ніт загальных, “национальных”, державных свят, бо Президент и Конгресс назначают свята лем для федерального округа Вашингтона (Дистрикт ов Колумбия) и для федеральных урядов по цілой краині. А позатым каждый штат установляє собі легальны свята, якы хоче праздновати.


1. Кажда неділя (воскресенье) празднуєся всяди як религийне и легальне свято.

2. Рождество и Новый Год празднуются во всіх штатах.

3. 12-го февраля — день рождения Президента Линкольна празднуєся майже во всіх сіверных штатах.

4. 22 февраля — день рождения первого Президента США Вашингтона празднуєся во всіх штатах, за вынятком Айдаго.

5. Велика Пятница принята за церковне свято в католицкых и протестантскых краинах. Притом тот день признаєся державным святом в цілом ряді штатов, или губернаторы в специальных прокламациях объявляют го святочным.

6. 30-го мая — “Мемориал” или “Декорейшен Дей”, день украшения могил воинов, погибшых в Гражданской войні меже южными и сіверными штатами, праздновался давнійше переважно в сіверных штатах, но теперь становится все больше поминальным праздником за воинов, погибшых во всіх войнах США.

7. 4-го июля — День Независимости США празднуєся во всіх штатах.

8. День Труда, “Лейбор Дей” – в первый понедільник місяца сентября, празднуєся во всіх штатах.

9. 12-го октября — День Колумба, итальянского мореплавателя, открывшого Америку, празднуєся в 40 штатах. В гдекотрых штатах тот праздник называют Днем открытия Америкы, Днем Братства або Днем высадкы.

10. День генеральных выборов – в первый вторник послі первого понеділька в ноябрі місяці.

11. 11-го ноября — День Перемирия (в первой світовой войні) празднуєся во всіх штатах.

12. День Благодарения, “Тенксгивинр Дей” — в послідный четверг місяца ноября, празднуєся во всіх штатах.


Кромі вышеназванных праздников, отдільны штаты мают свои легальны свята. Напримір, южны штаты празднуют 19 января День Роберта Ли, головного командира Южной Конфедерации в Гражданской войні. В штаті Кентоки празднуют 30 января День Франклина Рузвельта. Штаты Алабама, Мизури, Оклагома и Вирджиния празднуют День реждения Томаса Джефферсона – 13 апріля.

Так само были установлены разны торжественны дни, котры не признаются загально легальными праздниками: День насаждеиня дерев, День вооруженных сил — третья суббота мая, День Гражданства — третья неділя мая (“Ай ем Америкен Дей”). День Конституции — 17 сентября, День Матерей — 2-га неділя мая, День Дочерей — 2-га неділя июня. День Отцов — третья неділя июня., День Флага – 14-го июня (легальный праздник в Пеннсильвании), День предков — 21-го декабря, Панамерикен Дей — 14 апріля, День Объєдиненных Наций — 24 октября и т. д.



ПРЕЗИДЕНТЫ США

1. Джордж Вашингтон, 1789-1797
2. Джон Адамс, 1797-1801
3. Томас Джефферсон, 1801-1809
4. Джеймс Мадисон, 1809-1817
5. Джеймс Монро, 1817-1825
6. Джон Квинси Адамс, 1825-1829
7. Андру Джексон, 1829-1837
8. Мартин Ван Бурен, 1837-1841
9. Вильям Г. Гаррисон, 1841-1841
10. Джон Тайлер, 1841-1845
11. Джеймс Нокс Полк, 1845-1849
12. Закари Тейлор, 1849-1850
13. Миллард Филлмор, 1850-1853
14. Франклин Пирс, 1853-1857
15. Джеймс Буханан, 1857-1861
16. Ейбрагам Линкольн, 1861-1865
17. Андру Джонсон, 1865-1869
18. Улиссес С. Грант, 1869-1877
19. Рутерфорд Р. Гейс, 1877-1881
20. Джеймс Гарфильд, 1881-1881
21. Честер Артур, 1881-1885
22. Гровер Кливланд, 1885-1889
23. Бенджамин Гаррисон, 1889-1893
24. Гровер Кливланд, 1893-1897
25. Вильям Мекинли, 1897-1901
26. Теодор Рузвельт, 1901-1909
27. Вильям Тафт, 1909-1913
28. Вудроу Вильсон, 1913-1921
29. Воррен Гардинг, 1921-1923
30. Калвин Кулидж, 1923-1929
31. Герберт Гувер, 1929-1933
32. Франклин Д. Рузвельт, 1933-1945
33. Гарри С. Труман, 1945-1953
34. Двайт Айзенгауер, 1953-

Як видиме, Гровер Кливланд рахуєся 22-ым и 24-ым Президентом США, бо меже його первым и другым урядованьем была перерва. Но гдекотры не хотят триматися того порядку и рахуют го лем раз, же то єсть одна и тота сама особа, так им выходит, што Гровер Кливланд был 22-ым Президентом США, а нынішный Президент Айзенгауер есть не 34-ым, лем 33-ым.

ПОДАТКЫ

В США мы платиме податкы місцевым властям в той місцевости, где жиєме, а дальше повітовым (в “каунти”), стейтовым и федеральным. Всі тоты уряды накладают свои податкы на население, штобы покрыти свои росходы.

Часть тых податков єсть явна. Напримір, каждый знає, коли платит доходовый податок, федеральный и стейтовьй, або домовый и грунтовый податок місцевим урядам, або оплаты от ріжных пермитов и лайснисов, коли хоче вести даякий бизнес. Но, кромі явных податков, єсть полно скрытых податков, котры мы платиме, а даже не знаме, коли и скилько того платиме. Такых податков платится найболыше федеральным и стейтовым властям.

В Америкі податкы постоянно роснут. Напримір, Конгресс наложит даякий специальный податок на надзвычайну потребу, дайме на то — на войну, и потішают людей, што то лем тымчасовый податок, бо як война мине, то податок буде знятый с людей, но потом уж тяжко освободитися от того податку. Коли Президент Труман начал “полицейску акцию” в Кореі, то зараз державны росходы увеличились. Так Конгресс в 1951 року увеличил доходовый и другы федеральны податки. В законі было сказано, што то лем на 3 рокы — до конца 1953 року. Но потом не можна уж было освободитись от Труманового податку, и Конгресс принимал резолюции о продолжении закона, а даже назначал ище новы податкы, бо федеральны росходы все росли, головно на вооружения, на план Маршалла и “холодну войну”.

Скрытых федеральных податков (т. зв. “єксайс тексы”) єсть велика сила,, но тоты податкы суть так розложены, што мы их платиме на каждом кроку, а не знаме того. Тоты податкы накладаются на товары, якы мы купуєме, або на публичну обслугу, яку мы уживаме, и включаются в ціну тых товаров або обслугы. Мы мусиме платити высшу ціну и так несеме на собі тоты податкы.

На вступны тикеты в театрах, кино и на всякы забавы был наложеный податок в высоті 1 цента от каждых 5 центов. Значит, от вступного тикета на $1.00 платилось 20 центов федерального тексу. Минувший Конгресс уменьшил тот текс до 10% — до 10 центов от 1-долларового тикета.

На цигареткы єсть федеральный текс $4.00 от 1000 штук. То значит, што коли мы купуєме звычайну пачку цигареток (20 штук), федеральне правительство бере о тнас 8 центов податку, Кромі того, во многых стейтах цигареткы суть обложены ище стейтовым податком. В Америкі майже всі курят, так то значит, што майже всі платят тоты податкы — федеральны и стейтовы.

Кто купує люжный табак до файкы, до жуванья, до цигареток або до нюханья, то платит федерального податку 10 центов от фунта.

Так курящы люде правительству дают великы доходы. Суть особы, як меже мужчинами, так и меже женщинами, котры выкурят пересічно по 2 пачкы тигареток денно, а на рок то зробит 730 пачок. Значит, федеральный текс от того выйде $58.40 рочно. И то лем федеральный. Во многых стейтах накладают на то, ище стейтовый текс, а тоже и містецкий. Отже выходит, што така особа платит рочно до 100 долларов податку от куренья, а не знає о том.

Спиртны напиткы так само обложены высокыми податками федеральными и стейтовыми. От дистиллованного спиритусу лем федеральный податок єсть 10 долларов и 50 центов на одном галлоні (4 кварты). Так коли вы купуєте кварту звычайной виски, вы платите найменьше 2 доллары федердального тексу. От пива федеральный текс єсть 9 долларов на одной бочкі (“баррел”). Вина и всякы ликеры так само обложены податками. Так середний пияк, котрый выпье лем по 2 келишкы виски и одной шклянкі пива денно, платит около 100 долларов федералнього податку рочно. I

Газолин так само обложеный федеральными и стейтовыми податками. Федеральный податок єсть 2 центы на галлоні. Так кто має свою машину и іздит много, то так само наіздит немало грошей для федерального правительства.

Податкы наложены на телефоны, телеграммы, желізнодорожны и другы тикеты, на електричны лампочкы, годинкы, перстени, туалетны принадлежности и всяку всячину. Так где лем рушитеся, што до рук возмете, то все платите федеральный податок. А потом приходит ище доходовый податок. Вам порахуют, скилько вы заробили рочно, и от цілой суммы заробку треба платити податок — 20% при найнизшых доходах. А кто має высшы доходы, то процент податку йде вгору. Протягом року вы уплатили уж велику часть свого заробку федеральному правительству в виді тых скрытых тексов, о котрых была бесіда выше, но то не рахуєся. Так вы платите доходовый податок от цілой суммы доходу, а то значит и от того податку, який вы уж дали. А коли потом стейтовы власти наложат на вас свой доходовый податок, то так само рахуют процент от цілой суммы вашого заробку — значит, и от того доходового податку, який вы уплатили федеральному правительству.

Не дивно, што ныні всяди по Америкі люде кричат, што податкы их дусят. Найгорше выходят на том робочы, бо они не можут скрыти свои доходы. Их заробок записаный там на фабрикі, где они працуют, и уж там оттягнут из их заробку доходовый податок и пошлют податковым властям. А бизнесмен, котрый веде свой бизнес, або профессионалы, як докторы, адвокаты и др. можут легко скрыти часть своих доходов. Они просто не запишут всіх своих приходов, або допишут больше всякых росходов, и чистый доход, от котрого треба платити доходовый податок, получаєся меньший. Через то доходовый податок роспреділеный ныні в Америкі цілком несправедливо,

В Америкі єсть ныні велика сила т. зв. “ нетаксованных долларов”, от котрых не был уплаченый доходовый податок. Человік, котрый не уплатил полный доходовый податок от своих доходов, мусит скрыватися со своими грошами, штобы податковы уряды не нашли их. Он не може вложити их на книжку до банку, бо податковы инспекторы можут легко вынайти, што в том або другом року он дал до банку больше грошей, як мал доходу, от котрого платил доходовый податок, и зараз покличут його, штобы объяснил, откуда он взял тоты грошы. Он не може купити ани дом за такы грошы, бо так само инспекторы начнут довідуватися, коли и як тот человік наскладал таку сумму грошей, и ци он платил от них доходовый податок.

За то ныні американскы спекулянты, котры мают много тых “нетаксованных долларов”, вывозят их в заграничны банкы, головно в Швейцарию, где можна их положити на фальшиве имя, а банк того не выявит никому. Або держат их скрыто дома, або дают в готовкі до приватных сейфов в банках, або купуют маєткы, бизнесы, бонды, шеры на имена такых людей, котры можут доказати, што все платили доходовый податок и могли притом отложити потребну на таке діло сумму грошей.

По той то причині в Америкі поднимаются все частійше голосы, што треба змінити цілу податкову систему. Все частійше роздаются голосы, штобы откинуты цілком доходовый податок, а на його місце установити податок от товарового обороту, або, як в Америкі называют, “сейл текс”. Но при системі приватного капитализма то вышло бы на корысть тилько великым богачам. Податок от товарового обороту можна застосувати правильно и справедливо лем при социализмі.



[BACK]