Рок 1945 — Иван Русенко
Вшиткы люде выіхали
И з долы и з горы,
Стары бабы, малы діти,
Здоровы и хворы,

И кулявы, и немравы,
Вшитко выіхало,
Єдны вмерлы, што в могилах
На вікы остали.

Лишилися и герои,
Што на війні пали,
Што жизнь свою за отчизну
Чию жертвовали.

Лишилися в свіжых гробах
Семеро убитых,
Што им житья одобрали
Лютецкы бандиты.

Гералт Техович и Венгрецкий
Бобер, два Пухлонкы,
Гардаш Плонка, Вавер, Голда
И далі стоп кропка.

Вічна память мученикам,
Більше им не треба,
Нех невинна кровь их зове
О помcту до неба!

Кто подумал, же даколи
Так ся стане, як ся стало,
Же будеме на Поділю
И орали и сапали?

Хоц ту гарда околиця,
Вшиткы ходят, як немравы,
Брак охоты до роботы,
До ідла и до забавы.

Бо каждому в мысли стоит
Родный край и родне село,
Каждый ходит застараный
И каждому невесело.

Дакто думат, же вернеме,
В свои давны околиці,
Але о том шкода мовы —
Най не плете ник дурниці.

———— о ————

Тоты горы, лісы, дебры,
Высыпаны и порубы,
Загуменкы, загороды,
Ксенжы ставкы, липы й дубы,

И гостинец з горы долов
Гряды, рівні доокола,
И ядлівці и тернина,
И малинник и драчина.

Вшитко было близко села
И чатина на помела,
И на дышель простый бучок
Кому треба, твердый сучок.

И березка на розвору
И до грабель отщеписко,
Вшитко было до выбору,
Вшитко было в лісі близко.

Всьо пропало, мои сте-вы.
Не будеме там вертати,
Ту мусите в Уересер
Віку свого доживати.

Хоц ту не так, як в нас было,
Хоц ту, реку, трохи чудно,
До тых яров и берегов
Привыкнути буде трудно.

Буде дуже ту трудности,
И клопов тыж не мало,
Але треба привыкнути,
То называтся — пропало!

А вы хлопці, вы молодці,
Кровь горяча, вільна душа,
Не можете посідити,
Бо горяча кровь вас рушат.

Уж забудте добры часы
О співаню, о музыках,
Бо не вернеся николи —
Всьо пропало в Заліщиках.

Ту уж така обстановка,
Треба до ней привыкати,
И як грают музыканты —
Так нам треба танцувати.

3 Буды Гандрий все повідал,
(Як відомо, уж небіщик):
“Ідь, де хочеш, куди хочеш,
Але не ідь до Заліщик”.

Він был всяди в Буковині,
В Пущанинцях и Снятині,
Заходил до Кірлібабы,
Не оминул Бессарабы.
Всяди ходил, де шли вшиткы
Безроботны и барабы.

И по цілой Буковині
С камратами ходил-бродил,
Але чогоси до Заліщик
Ани разу не заходил.

А мы были в Заліщиках,
Таке наше призначинья,
Дністер ширин, міст довжина
И берегы высочиня.

Вшиткым ся нам выдавало,
Же міст з нами ся колыше,
Як ешелон стал на мості,
А машина сапат-дыше.

Старты люде посмутніли,
Малы діти заплакали,
Вшиткы бабы стары и млады
Гірко, гірко зарыдали.

“По што мы ту приіхали,
Там тра было нам сідити,
Ой пропали мы ту вшиткы,
Ой пропали нашы діти.”

Опамятайтеся бабы,
Майте розум, што робите?
Ту будеме уж до смерти,
Ту мусиме вік прожити.

Там остати мы не могли,
Ляхы жити нам не дали,
Нашых людей мордували,
Маєток нам рабували.

Неє чого жалувати,
Бо што было, уж не верне,
Най пропаде то, што было —
Вшитко марне и мизерне.

Ту нам треба привыкати
И до людей и до краю,
А хоц не все нам пасує —
Вшеляко нам жити дают.

Погодмеся з нашым льосом,
И каждый з нас перетримат,
Хоц ту на нас смотрят косо,
Хоц ту троха инший климат.

Хоц бесіда наша инша,
И им трохи не подходит,
Лем ту довше побудеме,
Єдна с другом ся погодит.

Нам бесіда наша мила,
Хоц и кус неграматична,
Родна мама нас навчила —
Отжеж своя, не пожична,

Хоц бесіда наша проста,
Высказати вшитко знає,
Ци весело нам на душі,
Ци нам смуток сердце крає.

Слов нам хватит, всьо повіме
В нашой лемковской бесіді,
Ци в забаві, на весілю,
В добром бытью, ци то в біді.

То-ж шануйме наше слово
От велика аж до мала,
Вшитко инше зме стратили,
А бесіда нам остала.

Мусіли-сме оставити
Нашы горы чуд-Карпаты,
А што далі с нами буде —
А кто-ж тото може знати?

От Попраду аж до Сану,
От Остурні по Уж-ріку,
Там наш лемко жил и робил,
З давен-давна, спокон-віку.

Иван Русенко.


[BACK]