Розказ по Телефону Выполненый — Демян Нетота

Американска комната. Муж сам дома бавит дітину. Жена вышла за покупками. Телефон звонит. Муж поднимат слухавку, кричыт: Галлов!

Телефон: То я, твоя жена бесідує.

— То ты Майку? Слухай, я ишла “шапувати” и по дорогі вступила-м до мамы на пару минут. Так слухай, Майку, ту в мамы єсть єдна жена, моя знакома, хотіла бы барз видіти нашу дітину. Будь добрый возмый ты дітину до керича и привез ту до мамы.

Муж: Г-ммм!

Телефон: Нич не гимкай, лем бер дітину и приход ту до мамы.

Муж: А як же тоту дітину брати?

Телефон: Дітину облеч, влож кошульку, потом майткы, а так сукенку, але теплу, бо теперь вечерами холодно. Не забудь пончошки и черевичкы.

Муж: Г-ммм?

Телефон: И зас гимкашь! Не гимкай лем слухай: на голову положи червену шапочку, там єсть на другой поличці з горы в “клазеті”. А не забудь о рукавичках. Возми и ляльку, тоту, што кричит "мама енд папа”, жебы мала ся чым бавити.

Муж: Галлов! Уж мам сукенку, кошульку, пончошкы, шапочку з другой поличкы в клазеті, ляльку, што кричит “мама и папа” и уж рушам керидж.

Телефон: Почкай ище, возми ище ковтик, на выпадок, як бы зимно было и одробину вазелины, а не забудь о ничом...

Муж: Г-ммм, змилуйся, ци то уж вшитко? (мече слухавком зо злости о стіну аж єй отбило назад, а сам кричит, што силы: — Шапочку, кошульку, пелюшкы, черевичкы, павдер, вазелину, ляльку, што кричит “мама и папа”, ковтик, фляшку, ба але кельо фляшок, кошульок, пеленок. Боже просвіт мя жебы-м дашто не забыл.

За годину и впів дышол Майк с полным керичом до мамы по жені, показати знакомой свою дітину. Летит горі сходами и кричыт: Любонько — “дарлинг”! Нич єм не забыл вшитко єм привюз, як єс казала. Подьте же вшиткы ся ту посмотріти.

(Жены єдна за другом начали сцібнати долов сходами. Злетіла мама, злетіла баба, а найперше плилетіла тота жена, што хотіла “дзецко” видіти. Всі обступили окопистый керич довкола.)

Муж: (гребе в керичу): Машь ту ковтик, машь ту шапочку, ляльку, тоту што кричыт “мама и папа”, рукавичкы, везелину, павдер, пеленкы, фляшечку с молоком....

— А где дзецко? — кричит перестрашена мама.

Муж: Господи Боже! Та дзецко єм забыл. “Май ступид гед” (моя тупа голова).

Демян Нетота
Нью Йорк, Н. Й.


[BACK]