Shameful Tragedy, Ганебна Трагедия в Родині Славян (короткий историчный очерк из народного житья лемков) — Ант. А. Цисляк

Ище здаєся от початков русской истории, бо уж за часов Червеной Руси и Галицкых князей, в горах Карпатах, жили старославянскы русскы племена лемкы, бойкы, гуцулы и т. п.

Племя лемков было втиснене, як бы клином в трикутник, меже словаками с одной, а поляками, с другой стороны. Лемкы, то бідный, но талантливый и способный до всякой роботы народ. Жили они там в горах с діда прадіда богобойно и незавидно бідно, бо земля была больше камениста и малоурожайна. Лемкы спокойно переносили всякы обиды со стороны насильства, хоц сами никого не зачепали, никому не заваджали, не шкодили и никого не здраджали.

Из истории знаме, што послі третього розбора старой Польшы, часть польской территории, до котрой тогды лемкы належали, припала до Австро-Венгрии. Зарас тогды, штобы ослабити єдинство русскых племен, была проведена нова границя верхом гор Карпат, и так полуднева часть лемков была приділена ку Венгрии и отдана под вплыв словаков, а полночна часть приділена ку Австрии и осталася под вплывом поляков.

Мы старшы емигранты памятаме добре, яке тяжке было переживанье под панами-шляхтичами за Австрии. Наш бідный лемко завсе и всяди по містах и урядах был высміваный, понижаный и переслідованый.

Отношения меже польскым шляхетством были немного ліпшы, хоц и ту дост часто польскы паробкы, настроеєны ненавистью к руснакам нераз нападали и побивали нашых людей переізжаючых через польскы села до міста. Так нашы лемкы переносили тихо всякы обиды и насильства за часов Австрии, аж до 1-ой світовой войны.

Chuga, Народна ноша в Вислоку Великом: Лемко в характеристиной чугі

На початках 1-ой світовой войны начала показоватися уж ненависть к лемкам, яко москвофилам. Началися ложны доносы и гонения на передовых честных лемков, и так тысячы нашых людей постріляно, повішано на вербах и вымордувано по Телергофах, Штайермарках, Терезиенштатах и др. В той брудной роботі помагали панам нашы братья украинскы учители и священникы, котры были насланы до нас из Восточной Галиции для заражения лемков німецко-украинском пропагандом. Натурально, што теперь нашлися єдиницы подлизуны и меже лемками, котры помагали жандармам збыткуватися над нашым народом, бо тоты галицкы украинцы, як раз надавалися найліпше на німецкых гайдуков и были за орудие німцям дойти до ціли, выгубити и ослабити руснаков лемков.

Тымачосом в России настала револция, котра потрясла цілом Европом, и союзники мусіли сами кончите войну. Германия войну програла, стара Австрия роспалася на части, повстали новы державы, як Венгрия, Чехословакия и нова Польша, возрождена и объєдинена из русско-польской и австрийско-польской территории.

Так можна сказати, што завдяки русской революции в России, была возрождена нова шляхетска панска Польша, на чолі котрой стая во главі ген. Пилсудский.

Ген. Пилсудский показался за дуже бойовым и войовничым “великаном”, он заміст быти вдячным русскому народу за освобождение Русской-Польскы, заміст выбратися против Германии, штобы там освободите стары польскы земли, он пошол с войном на Києв и хотіл забрати Украину под свою власть. На том йому непосчастило, был добре потрепаный и так ганебно вернул до Польшы.

Переживания нашых лемков за часы той новой шляхетской Польши, о много погоршалися от часов австрийских, то головно дало потом повод, коли при полагоді гдеякых проблем, дошло к переговорам о добровольной выміні, больша часть лемков записалися на добровольне переселение на территорию Совітской Украины, а меньша часть осталася на своих отцовских господарствах в Польші.

Господарка в новой Польші на загал была подобна до стародавной Польшы. Польскы паны-шляхтичы и магнаты тягли огромны податкы из бідноты и селянства, а сами гуляли собі, устроювали полювачкы и браталися с германскыми графами и панами.

Тымчасом в Германии Гитлер выроблял планы, и подготовил ся блискавично для завоювания Европы, а потом и цілого світа.

Так под первым ударом той воєнной машины, праві ціла Польша стала первом жертвом, бо лем в пару днях была уж занята гитлеровском навалом.

То был початок 2-ой світовой войны, и по планам Гитлера крок за кроком, была уж занята близко ціла Европа німецкыма войсками. Коли Гитлер несподівано напал на Совітский Союз, там началися приготовления и организовалася народна оборона, с одной стороны Красна Армия, а за фронтом партизаны.

В самой Польші началася нагонка и издівательства над людьми, бо Гитлер по плану хотіл выгубити славянство и так зарас на початках тысячы прогрессивных людей, между ними и лемков было выгублено всякыми нелюдскыми способами. Много молодшых людей поутікали и крылися по лісах, где начинали лучитися с русскыми партизанами, а потом и сами лемкы организовали партизанскы отряды для борьбы с фашизмом. Позоставшых дома молодых людей — хлопцев и дівчат вывозено насильно в Германию до воєнных и амуницийных фабрик для роботы. Так польский народ, як и лемкы много горья и несчастья зазнали за час войны и разом скрыто боролися против фашистскых наіздников, котры издівалися над людьми, бо як нам знано, и в той войні нашы братья украинцы, котры суть заражены ненавистью к русскым, были на собачой службі у Гитлера. Тоты нашы украинцы были вірном опором Гитлера, они розуміли наш язык и с нашым народом росправлялися по-звірски, горше, як сами німцы.

Но всьому приходит конец, так пришол долгожданный час наступу Красной Армии, под ударами котрой пришол розвал гитлеровскых армий и конец його планам на завоювание світа. Красна Армия, в рядах котрой были и лемкы, гнали німцев аж до Берлина, где и самому Гитлеру пришол конец.

Так тяжко пришло вызволение славян, а в том старых польскых земель от фашистской Германии. Так завдяки русской Красной Армии была возрожденна нова Народна Польша, а потом и Союз всіх славянскых держав для вспольной обороны.

Як знаме, што на конференции при угоді, Соєд. Штатов, Англии И Совітского Союза, в переговорах о новых границах меже народностями, Сталин по настоянию През. Рузвельта уступил территорию Лемковщины для Польшы, так восточна Галиция была прилучена к Совітской Украині, а мы лемкы осталися на дальше в Польші.

Здавалося, што славяне набрали доброй наукы от тых грабежных нападов Германии на славянскы земли с планами и цілью на выгубление славян, можна было надіятися, што славяне теперь будут жити в братстві и относитися дружелюбно к другым народным меньшинствам. Но як видиме, надія завела нас, бо в славянской державі с лемками началася наново стара шовинистична вынародовляюча политика.

Лемкы начали отбудову своих знищеных домов, сел и направляти землю, порыту от воєнной машины и траншей, на свойой лемковской территории.

На лемковску біду и несчастье гитлеровскы недобиткы — украинскы бандеровцы, утікаючы перед Красном Армиом из восточной Галичины, не мали где дітися, бо до Берлина не мож достатися и домов страх вертати, покрылися по нашых горах и лісах в Карпатах. Ту по дебрьях и лісах загніздилися группами и так нападали на селянскы осады, села, грабили, нищили и убивали невинных людей. Бідны селяне жили в страху, бо ничого не могли зробити, бо нове польске правительство, як видно, боялося дати оружие лемкам в рукы для свойой обороны, а коли гдекотрый лемко осмілился донести урядам, або жандармам, што його обрабували бандеровцы, то слідуючой ночы бандиты верталися назад и поубивали до смерти тых, кто упомнулся о свою кривду. То уж само свідчит, як доказ, што тоты украинскы банды были связаны с польскыми панами шовинистами, котры занимали там уряды ище от часов старой Австрии и так продолжали свою стару шовинистичну политику, штобы шкодити новому народному праивтельству, а што як тоты паны шовинисты, так и украинскы банды горіли ненавистью к лемкам, то разом мстилися и терроризовали население.

Лемкы с Вислока Великого в свойом народном крою
Лемкы с Вислока Великого в свойом народном крою.

Така была правдива ситуация перед насильным выселением лемков.

Стара политика была така, што сильный слабого дусит. Так німцы віками нищили, грабили и заберали славянскы и польскы земли, а народ вынародовляли — денационализовали. Так венгры гнобили словаков, словакы вынародовляли руснаков (лемков), так и полякы за часов Австрии и старой Польшы Пилсудского усилялися вынародовляти лемков в свойой державі.

Стары польскы урядникы, котры и теперь в новой Народной Польші осталися на урядах, были воспитаны с дітинства в старом шовинизмі и ненависти к руссинам, то зато помагали бандам украинским нищити наш народ, а тым самым они шкодили и новому польскому правительству, як морально, так и материально.

Нове народне правительство мало много проблем, штобы завести порядок на новый лад, а между тым стояла велика проблема, як заселити земли, котры были отобраны о тнімцев на Западі, а теперь осталися не залюднены.

Отже, коли нове народне правительство натисло на уряды, штобы покончити с бандитизмом в Карпатах, то паны-шовинисты нашли легкий отвіт на то, што они не мают сил боротися с бандами, бо тым украинскым бандитам всьо население Лемковщины помагат, што єдиный выход из того положения, то треба выселити всіх лемков, а так покончат с бандитизмом.

И як видиме, то тоты урядникы-шовинисты очернили наш народ несправедливо в поддержкі бандитизма и в зраді новому польскому правительству и так без суда, доказов и фактов выдали засуд на скоронасильне выгнание лемков из их прадідной родной земли. Так и наскоро на розказ уряду на нашых землях, лемкы были выселены и розътія- ны по пару родин на опорожненых от німцев землях на западі Польшы.

Так панове-шовинисты помстилися на братьях славянах лемках в свойой новой народной польской державі.

Який то страшный засуд над народом, тым больше, што несправедливый, який там был плач, горечь и жаль, котрый мусіл перенести наш народ, того коротко не мож описати, Но история той народной трагедии с лемками буде написана даколи позднійше.

Натурально, тот насильный и ганебный поступок польского правительства был и єсть нелегальный по всім народным и международным принципам и законам, тым больше, што засуд был несправедливый, без суда, фактов и доказов, а к тому в часі славянского братства и дружественных отношений и обороны от насильства, а лемкам, котры с Красном Армийом и в партизанскых отрядах боролися разом против фашизма, выпала така ганебна трагедия и несправедлива судьба на выгнанью.

Man from Grab, Лемковский паробок с Грабу, повіт Ясло.

Мы лемкы тут в Америкі так само помагали в той борьбі против гитлеровского фашизма, Лемко-Союз организовал Карпаторусский Народный Релиф. Комитет, при котром лемкы жертвовали много гроша и труда, устроювали всякы кампании, собирали одежу, на медичну помочь, на Боткинский Госпиталь в Москві собрано лемками много тысяч долларов, и т. п., штобы помочи выграти освободительну войну от фашизма, а там в старом краю наш лемковский народ лояльный тому правительству, где он жил, никого не здрадивший, падат жертвом от такой-же шовинистичной рукы в свойой власной славянской державі!

Ци то не ганьба и стыд, што такы люде, котры воспитаны и загорены в шовинизмі, ище и до днеска терпятся на службах и урядах Народного Правительства в Польші.

Мы ту в Лемко-Союзі николи не обвиняли нове Народне Праивтельство в той ганебной и беззаконной трагедии над лемками, бо мы знали, што тогды нове правительство не мало надост молодых, школеных в демократичном духі людей, штобы заполните уряды новыми силами, то зато не могло оно и боротися успішно с украинскыми бандами.

Но мы вірили, што приде час, коли тото нове Парвительство набере сил, то он зверне увагу на тоту несправедливость, учиненну лемковскому народу, откличе свой засуд и постаратся причиненну лемкам кривду направити.

Мы можеме обвиняти нове народне польске правительство лем в том, што оно довіряло тогды ище тым старым, опьяненым шошинизмом урядникам, и без провірения фактов на місци, одобрило такий ганебный засуд над лемками и позволило на такий несправедливый поступок.

Єсли бы нове Народне Правительство провірило факты там на місци, то оно бы вынашло там зараз, што здрадникы и шкодникы сиділи, а може ище сидят, як раз там по містецкых урядах и жандармскых постерунках, а не по-лемковскых селах.

Послі 10-літнього страдания нашого народа на выгнанию, аж того року недавно Польске Правительство при розборі справ о национальных справах нашло и признало свою ошибку, што лемкам была зроблена несправедливость и кривда, откликало засуд и позволят вертатися лемкам, котры хотят, и котры мают свои ище цілы хаты, назад на свою отцовизну на родну Лемковщину.

Мы надіємеся, што теперь народне Правительство Польшы постаратся направити зло и поможе лемкам при переводі, отбудові и устройстві новых господарств, штобы хоц частично направити кривду и шкоду пережиту нашым народом. Того вымагат моральна повинность, а насколько буде той морали и христианской любви и славянского братства у польского Народного Правительства, то покаже будучность.

Так лемкы терпіли и віками переносили всякы обиды, издівательства и национальный гнет, но от свого русского корьня не далися никому оторвати. Так и теперь много жертв и страданий в той народной трагедии пережиют, бо где єсть любовь и віра до свого народа, там єсть и його спасение.

К тому можна бы додати ище замітку из польской истории. Всі знаме, што стару Польшу розберали врагы на 3 заводы, то было до нашого часу за Австрии. Русска революция возродила нову Польшу и знов тота Польша пала жертвом фашистской Германии. Така судьба слідувала завсе за ошибкы и гріхы панов-шляхты против свого народа.

Теперь знов Польша была вызволена от германского фашизма Красном Армиом. Не дай Бог, штобы нове Польске Народне Правительство пошло слідами старой давньой шляхты або оторвалося от славянского духа, бо часом може залізти в таку несчастну и запутану пропасть, из котрой можно быти, ни выхода, ни вызволения не буде.

Ант. А. Цисляк.


[BACK]