Лемковский Дух Жиє на Выгнаню

Минуло десять літ с того часу, як Польске Народне Правительство насильно, при помочы войска, полиции и другых нечистых сил, котры укрывалися за тым красивым названием правительства, выселило всіх лемков зо свойой родной отчизны Лемковины, и роскинуло их по западных просторах державы, отзысканых от німцев. Тоту нечестну акцию ріжны польскы урядникы, отвітственны за насильне выселение лемков, объясняли каждый по свому, так што полупилася ціла вавилонська вежа причин. Одны объясняли, што лемков выселили за кооперацию с УПА, другы, што лемкы не хотіли голосувати за правительством, третьи, што не хотіли организувати колхозов, знова иншы ставили причины “милосердия”.

“Лемков, — повідают, переселили в ціли охороны их перед немилосердными бандами УПА, або же лемкам уж пришол час дати ліпшы земли, ліпшы халупы, як они мали, ближе индустрии и школы. Одным словом для добра, для уліпшения их житья...”

За тых первых десять літ всьо то вывітрило, бо показалося, што в УПА брали участь многы полякы, а горьше тото, што люде, котры в день были урядниками, а в ночы спольниками УПА. Выяснилася и тота “милосердна” причина “обдарувати лемков ліпшьши господарками”, бо скоро лемков выселили, напоспіх присылали осадников, своих родных поляков на тоты “недобры, бідны землі” на Лемковщину и всякыма новыма законами закріпляли за ними “вічны права” на выдерту из рук лемков землю. Так головна ціль насильного выселения не была нияка причина вины, ани нияка причина милосердия, лем просто нелюдский способ для насильного вынародовления лемков и затерти всіх слідов житья за ними.

Но историю с лемками можна поровнати до тых зачаруваных приповідок, от котрых волосы на голові дубом стают. Тот чловек, што здавался убитый на смерть, встає на ногы и хоче дальше жити. Так сталося и с лемками. Тоты похоронены “на вікы” лемкы отворили очы, жиют и приходят до своих сил. Нияк о свойой народной смерти не думают.

Лемкы в селі Зимна Вода в Польші

А найліпшым доказом того суть и тоты фотографии, котры тут поміщены из представления “Вертеп в Карпатах” и правдивого водосвятия на Йордан. Того дня минувшого року, то-єсть 19 января 1957 року, в субботу на свято Богояления на Западных землях Полышы, в селі Зимна Вода, дньом отбылося тото величаве лемковске торжество водосвятия, а вечером драматичный лемковский кружок поставил представление “Вертеп в Карпатах”, а при том выступил с лемковскыма народныма співами и містный хор, котрый существує при драматичном кружку.

И ци то не чудо, зачудуване чудо, для тых, котры с радости затерали рукы, коли лемков переселили, и голосно кричали, же лемкам пришол конец.



[BACK]