Юбилеи отділов Лемко-Союза, — 25-Літный Юбилей Лемко-Союза В Юнкерс Н. Й

Наш юнкерский отділ Лемко-Союза ч. 28 был оснований 22-го февраля 1932 року. Лемковске віче было подготовлене и скликане Петром Данюсяр и Томком Шост. Говорил до собраных Д. Вислоцкий. До отділа записалося 15 членов. Всі предплатили собі газету “Лемко”, котра выходила в Кливланді. На том собранию был выбраный первый комитет отділа Л. С. до котрого вошли:

Иван Малютич, Предсідатель: Николай Васенко, заступця; Григорий Лукачин, фин, секр; Теодор Глюз, рек. секр; Владимир Гончарик, Кассир; Даниил Дурняк и Николай Бреня, контролеры и Григорий Шкурат и Осиф Ковальчик, организаторы.

LemkoAssocGroup
Перва организована группа отділов Лемко Союза
в Юнкере, Н. И., в 1932 року.

Отділ в Юнкере розвивался успішно, што было писано в “Лемко” газеті, же Юнкере заберат преше місце, бо отділ взрос до 126 членов и 78 предплатников газеты. Мы росли с каждым роком, бо при отділі устроювали пикникы. При помочи комитета мы нашли постоянный пляц на пикникы при Мидланд авени. На нашы пикникы при красивом Тибитс Парку зходилися люде с близка и далека ку доброй лемковской музыкі поспівати лемковской співанкы и потанцувати. Была в тот час депрессия, то нашы люде горнулися докупы. Як отділ уж мал дост сильну кассу, то члены рішыли, абы на місци пикника построити поміщение под дахом, штобы на выпадок дощу было, где схоронитися и перенести забаву с під дерев.

При предсідательстві пок. Ивана Лабаша при помочи И. Малютина купили місце и начали будувати поміщение. Як раз в тот час отбывался Гол. Съізд Лемко-Союза в Нью Йорку. Там рішыли абы при начатой будові в Юнкерс побудувати Карпаторусский Центер. Был выбраный комитет, котрый выбрал чартер на Центер и містны члены отділа стали пожизненными членами Дома. Членске было 25 долларов. Высше 500 членов с цілой Америкы и Канады стали членами той Будовы. Скоро будова была готова, тут была переведена типография нашой газеты “Лемко” и с того часу она тут остаєся. Наш отділ стал працувати при Центрі, тут мы ставили многы представления и концерты, бо был организованый драм-кружок и хор, танцорска школа и школа грамоты. Так што наш отділ вюл передову культурну роботу среди американскых лемков. Много тут было окружных предприятий, а тоже всенародных торжеств, и народ приходил тут не лем поєдинчо, но и организовано автобусами с близкых и далекых околиц. При той активности наш Центр выплатился из долгов так, што теперь належит народу и дальше служит йому.

DramaClub
Драматичный Кружок отділов Лемко-Союза в Юнкере, Н. Й., в 1942 р.
при власной сцені Карпаторусского Американского Центра. (Декорация роботы Николая Цисляка).
Члены грают представление “На чужом весілю”.

Наш отділ истнує 25 роков и минувшого року мы справляли торжественно наш 25 рочный юбилей под проводом нашого Председателя Тимка Фецицы.

На торжестві всі были дуже счастливы, бо народа была полна галя так містного, як и с подальша. В торжестві принимали участь и жены, хоц их женский отділ ч. 4 был организованны о рок позднійше, но то было цілком на місци, бо женский отділ выполнял всі роботы враз с мужескым отділом Л. С., брали участь в представлениях, собирали жертвы на будову, на прессфонд газеты, ходили до хору, помагали в пикниках и предприятиях.

На том юбилею была отдана честь не лем членам и членкиням, но тоже урядникам особливо, котры занимали предсідательство отділа. И так: Иван Малютич был предсідательом на два заводы, першый раз от 1932 до 1934 и от 1952 до 1955 р., Иван Лабаш в 1935 и 1936, Петро Единак в 1937 р., Михаил Сосенко в 1938 р., Петро Корба в 1939 р., в 1945-46-47рр. Игнатий Дурняк в 1940 р., Стефан Кичура в 1941 и 1942 рр., Григорий Крутила 1943-44 и 1949 рр., Петро Петришин в 1948 р., Даниил Дурняк в 1950р., Андрей Грабский в 1951 р. и Тимко Фецица от 1956 року, теперішый председатель.

Помершы нашы члены и членкині: Вл. Гончарик, Иван Лабаш, Василь Хома, Илья Волчко, Петро Данюсяр, Лукач Мигаляк, Иван Перог, Теодор Канюк, Яков Дубинко, Теодозий Вирхнянский, Адам Гончарик, Яков Вандзиляк, Михаил Шведа, Афтан Коблош, Емиль Бетлей, Штефан Дошна, Кондрат Подляскович, Стефан Штефаник, Д-р Сим. Пыж, Юлия Коваль, А. Хома, Мария Пригатний, Мария Курятник, Анна Астряб, Мария Кобан, Анастазия Курила. Най буде им вічна память.

Наш юбилей отбылся в неділю 24 февраля, в наш ом Карпаторусском Центрі. Там на том торжестві была принята резолюция в обороні нашых братов в старом краю несправедливо выгнаных зо свойой прадідной земли сл. змісту.


Владислав Гомулка,
Варшава, Польша.

Мы, лемковскы емигранты из юго-восточных повітов Польшы, ныні американскы граждане, собравшись на праздновании 25-літия Лемко-Союза в Юнкере, Н. Й. 24-го февраля 1957, привітствуєме Вас, яко нового лидера прогрессивных демократичных сил в Польші. Мы были пригнобленні, коли 10 літ тому назад нашы родственникы в Польші были насильно выгнаны из их родной земли в Карпатах и розселенні в западных районах Польшы. Они стратили свои домы, фармы и житье, до якого привыкли. Нас дуже тішит, што теперь Польске Правительство позвалят им вернутися до их родных сел, и мы просиме державны власти Польшы облегчити им поворот, а то отдати им обратно их власны домы, господарскы будинкы и землю, выдати державну помощь, где потребно буде ставити новы домы и вынадгородити за господарский инвентарь, який был знищеный, штобы они были в стані начати наново якнайскорше можна продуктивну господарку, помочи им сохранити и розвити свободно свою лемковску культуру и традиции.

Тимко Фецица, Предс.
Стефан Кичура, Секр.

Члены нашых отділов горды, же выполнили прогрессивну роботу для славы свого лемковского народа и радуются, же єсть тота организация, котра старатся поднести наш народ культурно и бореся за його права.

Даниил Дурняк.


LADinner
Группа гостей на торжественном чествованию 25-літнього юбилея
отділов Лемко-Союза в Юнкерс, Н. И., 24 февраля, 1957.

[BACK]