Стой на Стражі Изб! — Йосиф Ст. Фрицкий
В давных часах на Карпатах
Нашы предкы осідали,
Выкарчали глухы боры,
Свои села будували.

Построили свои села
Коло річок, низинами,
Як уж соткы сел там было
Лемковином край назвали.

А и села менували,
Так, як в тот час они знали,
Русскым-Устьом, ци Ганчовом,
То Крыницьом, то Избами.

И порядкы в селах мали,
Тихо, мирно собі жили,
И хоц были неграмотны,
Але с бідом сой радили.

Обробили свою землю
Скотом, плугом, мотыками,
Выпасали стада овец
И так жили там віками.

Так там жили нашы предкы
В прошлой, забытой давнині,
В свойом родном, земном раю,
В милом краю Лемковині.

О культурі и прогрессі
Они о том и не знали,
Але жили так, як треба,
И церквами ся старали.

Аж як пришла перша война —
Всьо то ся змінило,
И уж тихе, мирне житья
Нашых предков ся скончило.

Село моє, родне село,
Што Избами тя назвали.
В тых то часах, як то лемкы
Там в Карпатах осідали.

Теперь всьо ся позміняло,
Што страх подумати,
Где-же діти того села,
И где есть их мати?

Всі по світі, по чужині —
В Америкі и в России,
Решту силом роскинули
Там по Шлеску и Пруссии.

Теперь мы ся спамятали
Россіяны по чужині,
За што судьба так помстила
Нашой родной Лемковині.

Неє родных в селі Избах,
Штобы можна отвидіти,
Опущена церковь стоит,
Што аж ганьба посмотріти.

А вспомнути тоты часы,
Як мы в родном селі жили,
И всі нашы традиции
Коло церкви отправили.

Для нашого обычаю
Тоту церковь мы там мали,
И в той церкви нас крестили,
Многы из нас в ней вінчались.

Нашых дідбв, як померли,
В тоту церковь приношали,
Заспівали “вічну память”,
Родной земли отдавали.

Там их кости спочивают
В холодной землиці,
Неє кому в родном селі
Их память почтити.

Их могили уж заросли
Кряками, дичином,
Застановся брате, сестро,
Над том Лемковином.

Дай свой голос, най нас чуют,
Кто ся правды домагає
За отчизну родну свою —
Каждый лемко право має.

Ты церковцьо стой понуро
В память грозной минувшины
Будь пострахом в день и в ночы
Тым, кто знищил Лемковщину.

Йосиф Ст. Фрицкий.

IzbaWash

[BACK]