50-літны Родинны Юбилеи: Золоте весіля Луны и Пелагии Гарайда
GoldenHaraida

Лука Гарайда, родом из села Гирова, кроснянского повіта, на Лемковині и його жена Пелягия з роду Стах из села Вышовадкы, ясельского повіта, котры жиют на фармі в Крейинсвилл, Пеннсильвания, празднували юбилей 50-літнього супружества в субботу дня 7 июня 1957 року. Прожили они тых 50 літ в любви и згоді и выховали 18 красивых дітей, но выховати их до полного возраста удалося им лем половину — 5 сынов и 4 донькы. Всі сынове мают высше образование. Осиф механиком, Иван будує трейлеры (помешкання на колесах), Василь Чиф-инжинир, Михаил маляр, Андрей учитель. Дочкы споотдаваны за фармеров.

Лукі Гарайда совершилося 76 літ житья, а жені Пелягии 71 рок житья. Весь вік Лука працувал тяжко. Одных 25 літ працувал в майнах углекопом, а 27 літ при ладуваню желізной руды на кораблях.

Торжественне празднование их 50 літнього юбилею отбылося в сусідном місточку Пейджвилл, котре приготовили діти, и на котре зышлися много гостей, краянов и сусідов, а с подальша пришли из Кливланду краяне Йосиф и Текля Дзямба, Михаил и Пелягия Сипляк и Антон и Мария Шашко.

Юбилянтам были переданы не лем красны и сердечны пожелания, но тоже и дорогоцінны подарункы. Так торжество перешло дуже весело при богатстві іды, пития, и веселого співу лемковскых народных и весільных співанок.

Так весело дай вам Боже провести в добром здоровлю ище много, много літ.

Гость Й. Дзямба.

[BACK]