Людкове отвечеряли.
Молилися, полігали,
Всяди в селі тихо было,
Уж лем в корчмі ся світило.

Честны люде полігали,
Котры през день працували,
Лем пияци не лігают,
В корчмі пьют, гул якают.

Газдове ся барз старают,
Же хліба, пашы не мают,
Стараются во дни в ночы,
Не можут приперти очы.

Пияков жены біднятка
Поприкрывали дітятка,
Але сами не лігают.
Пияков мужов чекают.

Уж коло полночь! было
И лем в корчмі ся світило,
Качмаре уж съунованы,
Пияков вон выдрыляли.

Лізут мурчачы, дудручы,
Гев-там ся затаючи,
Нараз брыдко зарычали,
Люде со сна ся зрывали.

Василь выбіг на улицу,
Мал в руках грубу палицу,
А луп, луп, луп по кумови,
Кум гнет пришол к розумови.

“Кумцю! кумцю, што думате?
Мабыти мя не познате!?
Я пришол вам заспівати —
Вы так вышли мя витати?”

“Вы не кум, але потвора,
Рушайте прочь с мого двора!
Честны люде спочивают,
Не по ночах гулякают!”

“Куме, куме розум майте.
Не сердтеся, не гнівайте,
Я согрішыл-пребачте,
Вину отпустити рачте...”

“Но идте с богом кумичку,
Поздравте свою женичку,
Жебы ся уж не старали,
Бо вы вечерю достали”.

Иван одышол дудручы,
Василя проклинаючы,
“Не кум, но збойца проклятый,
Бог мусит го покарати.

Дал мі он, дал вечеряти,
Буду долго памятати,
Палицу на мі поламал,
Бодай дагде каркы зламал.

Он тогда мусіл ся встечи,
Як катувал мои плечы,
Болесть моя превелика,
Боже, скар того збойника!

Можу жені повідати,
Як кум дал мі вечеряти...
Попамятам долгы часы —
Мам на хырбеті кобасы!”

Иван так ишол дудручы,
Пришол домів стукаючи,
Жена двері отворяла,
А мужа ся звідувала:

“Чом так стукаш, мужу милый?
Ачей дагде тя побили?
Я до теперь тебе ждала,
Вечероньку пригрівала!”

“Дай мі покой, я уж сытый,
Ах я прегрозно побитый...
Стель, стель скоро, мушу лячы,
Пообзерай хырбет, плечы!”

Жена хырбет обзирала,
Прегоренько заплакала;
“Ах газдо, што же ты зробил,
Щто тебе так ктоси побил?”

На скоро рянды мачала,
И на хырбет прикладала.
Иван стукати перестал,
Дримал, дримал тай и заспал.

Уж газда спит, але жена
Вздыхат плаче розжалена:
Єй газда єдностай пие,
Прийде пякый — жену бие...

Біда на нью, хоц нияка,
Про того газду, пияка,
Но што же має почати
Лем до смерти с ним капати...

Біда, пребіда на світі
С планником пияком жити.
Його жена трапеница.
Превелика мученица.

Александер Павлович