Лемковскы Співанкы — Иван Русенко, John Rusenko
ЧОМ ЖЕ ТЫ ГОРЮЄШЬ?

Чом-же ты горюєшь, чом-же ты бануєшь, дівчино моя,
За тобом горюю, за тобом баную, не буду твоя.

Не сумуй, дівчино, не горюй миленька, ты будешь моя,
Лем мі пшениченька злотоколоса в полю достигне.

Не трапся дівчино, не бануй серденько, чекай осени,
Кедь зберу пшеничку, золоту пшеничку, то ся оженю.

Ты підешь на гору, на высоку гору, а я в долину,
Ты зрывай ядловец, пахнячый ядловец, а я калину.

Ты моя Дівчино, ты моє серденько, ты підешь вершком,
Зачекай на мене, на зеленом вершку, я піду стежком.

Не трапся дівчино, не бануй єдина уж копы стоят,
Лем збереме с поля, оженью ся с тобом и будешь моя.




НЕ МАМ НИЧ, НЕ МАМ НИЧ...

Не мам нич, не мам нич, вода мі забрала,
Лем мі на брезі дівчина зостала.

Не мам нич, не мам нич, в хижи ни на дворі,
Порожно в кишенях и пусто в коморі.

Не мам нич, не дбам нич, и о нич не стою,
Кобы лем здоровля, біды ся не бою.

Не мам нич, не мам нич, лем свою Тереню,
Як придут мясниці то ся з ньом оженью.

Зароблю пінязи в сахарном заводі,
Выстрою Тереню по послідной моді.

Пончохы-капроны и платья штанельны,
Шарфикы едвабны и туфлі модельны.




КЕДЬ МІ ПРИШЛА КАРТА

Кедь мі пришла карта нарокувац,
Став я свого няня дошикувац,
Няню-ж, вы мій няню, вчинте таку волю,
Идте за ня служить на ту войну.

Стали музыканты чардашь грати,
Стали мі ся слезы з очей ляти,
Никто не заплаче, ни отец ни матка
Лем за мном заплачут три дівчатка.

А єдна заплаче, бо я єй брат,
А друга заплаче, бо мам єй рад,
А третья заплаче, бо плакати мусит,
Бо она от мене перстень носит.




ОЙ ЗАЦВИЛА ЧЕРВЕНА КАЛИНА

Ой зацвила червена калина над криницею,
Горе-ж мені, моя матусенька, из пьяницею,
Бо пяниця пье, не перестає, в день и в ночи пье,
А як прийде из корчмы до дому, мене, діти бье.

В неділю рано пораненьку моя мати иде.
Пытаєся діточок маленькых, ци пяниця єсть.
Тихесенько и помалесеньку, мамусю иди
Спит пяниця в коморі на лаві, смот, смот-ле, не збуди.




ДАРМО ВЫ МЯ МАМЦЬО...

Гей, дармо вы мя мамцьо до школы давате,
З мене нич не буде, дармо накладате.

З мене нич не буде, ани поп, ни пастор,
Бо бым от олтаря на дівчата патрил.

Не лем от олтаря, але и с казальниці,
Бо-єм ся залюбил в сельской парадниці.

Бодай ты, корчмичка, горе з дымом пошла,
Де моя миленька на танец не пошла.

Ани мі не грайте, ани не співайте,
Лем мі мою милу до танцу съіднайте.

Грают в корчмі грают, аж корчмиско дуднит,
А моя миленька впала мі до студні.

Гудакы не грайте, ани не співайте,
Лем мі мою милу зо студні достанте.

Як не достанете, я жити не хочу.
За мой ом миленьком, тыж до студні скочу.




ИШОЛ ЦИГАН ДО ЛЕСА

Ишол циган до леса, лем сой чугом потреса,
Вшиткы дівкы на нього, же то чуга не його.

Гей ты старый сиваку, выжень коня на млаку,
Єсть там трава и вода и дівчина молода.

Як я спала на сенье, пришло до мя шалене,
Мало зубы, мало ніс, повідало же мя сьіст.

Оно мене не сьіло, лем мя в лице вкусило,
Як єм стала мазати, то на личку не знати.

Як я піду на мадьяр, комуж я то перко дам,
Кому — тому за дукат, а милому все лем так.




ЯК Я БЫЛА ИЩЕ МАЛА

Як я была ище мала,
То моя мама колысала,
А теперь я уж велика
И дали мі чоловіка.

Кедь была я біду знала,
Была бы-м ся не выдала,
А теперь я біду знаю,
Пізно лігам, рано встаю.

Хижу мести, сіни мести,
И за плугом істи нести,
В пецу палю, на хліб мішу,
Дітья плаче, я колошу.

Докля-м дитья накормила,
Курка миску мі розбила,
А муж ходит, подудрює,
И пястьом мі погрожує.

В пецу палю, істи варю,
Дитья плаче, я го бавлю.
Наварила-м кыселиці,
Впал мі до ней кіт с полиці.

Не хвалю ся, не. ганю ся,
Така-м была, як лялюся,
А теперь уж ся старію
И волосы мі сивіют.

Кедь была я біду знала,
Ббыла бы-м ся не выдала,
Гоя, гоя, гоя, гоя,
Головонько бідна моя.




ЗАГРАЙТЕ МІ ГУШЛИ

Заграйте мі гуслі,
Заграйте мі басы,
Най собі припомну
Свои млады часы.

Шуміла береза,
Кедь ся розвивала,
Плакало дівчатко,
Кедь ся отдавало.

Дали-сте мя, мамусь,
За ліс, за дубину,
Жебы-м не ходила
До вас на гостину.

А я и дубину
Довкола обыйду,
И до вас мамусю
На гостину прийду.

Дали-сте мя, мамусь
За ліс, за парію,
Жебы я не пришла
До вас на велию.

А я и парію
Довкола обыйду,
А до вас, мамусю
На велию прийду.

Дали-сте мя, мамо.
За ліс під заваля,
Жебы я не пришла
До вас на Русаля.

А я и заваля
Довкола обыйду,
А до вас мамусю
На Русаля прийду.




СІДИТ ПТАШОК

Сідит пташок на черешни,
Обдзюбує дрібный квіт,
Чого-ж ты мі моя мила
Закрутила младый світ.

Я ти го не закрутила,
Закрутил єс собі сам,
За три рочкы-с до мя ходил
На четверий иншу-с взял.

Ани я ся тя не бою,
Ани за тя не піду,
Ани я тя под облачком
Веце чекац не буду.




ОЙ ПО ПІД ГАЙ

Ой по під гай,
Попід тото терня,
Там мій милый кусал оріх,
А мі давал зерня,

Ой на-ж тобі моя мила,
На тобі зеренце,
А як тебе любит другий,
Мене болит сердце.

А як тобі о то ходит,
То ты одгородся,
А як мене другый любит
То ты там не смотся.


Списал Иван Русенко


ChantingEnd
[BACK]