Минувшого року в нашом календарю была коротко описана история Лемковского Народного Дома в Кливланді. История была подана зато, бо то исполнилося 10 літ от покупкы Будовы для нашой народной организации. Понеже результаты от той покупкы показалися быти радостными, то было рішено устроити торжественне чествование той счастливой нагоды. Але понеже торжество припало поздно в осени, бо аж 13 октября, то уж было запоздно, поміщати в календарю фотографии из самого важного моменту чествования юбилею.

О самом 10-рочном чествованию красиво и точно описала в нашой газеті членкиня Юстина Гоць из Единборо, Па., котра тоже была гостьом на юбилею. Мы не будеме повтаряти тут цілу историю торжества, лем коротко припомнеме программу торжества, як она завершылася.

Торжество отбывалося в нижньой и головной світлици свого Народного Дому. В нижньой світлици была подана богата вечеря, при конци котрой отбылася головна часть торжества, бо до слова были вызываны гості, была розповіджена история посліднього десят-літия, выголошены привітствия и пожелания. Торжеством руководил Дерофей Ковальчик. Нашому торжеству отдали честь урядникы Головного Правления Л. С. своим прибытием из так далека, а то Головный Предсідатель Л. С. Стефан Геренчак из Джерзи Сити, Н. Дж., и Рек. Секретарь Главного Правления Л. С. Андрей Грабский, из Юнкере, Н. Й.

Тост-Местер Д. Ковальчик найперше вызвал до слова Гол. Председателя Л. С. Стефана Геренчака, котрый выголосил поучну бесіду. Дальше он вызывал до слова теперішных и бывших урядников всі трьох отділов: мужеского, женского и молодечого, котры были присутны. Слово великой признательности для организации Лемко-Союза сказал радный городского совіта из нашого дистрикта Иван Билинский, котрый был присутный на торжестві зо свойом супругом. Пламенны бесіды выголосили и гости с подальша: Юстина Гоць, Петро Гурей, Секр. 5 Округа Л. С. из Питтсбурга, и Андрей Грабский, Гол. Рек. Секретарь Л. С. Д. Ковальчик дальше отчитал имена всіх урядников, кто який уряд занимал в котром році, и всім им была отдана честь так тым, котры жиют и были присутны, як и тым, котры не были, а так само тым, котры одышли от нас на вічный упокой. Што за счастливы бы они были, штобы могли быти с нами на том торжестві!

Дальше он представил гостей; котры пришли до Кливланду на торжество с подальша, а то доброго нашого члена Николая Цимбалу с його супругом Анном из Еллвуд Сити, Па., Ивана Ковалика зо женом Стефаниом, с доньком и зятьом Йосифом Варна и внуками из Акрон, О., Николая Пацак из Ири, Па., Евфозину Костельный с доньком и ей приятельком из Лорейн, О.

Послі вечері и торжественной программы в головной світлици началися танці под веселу музыку нашой лемковской оркестры Давида Воробгя, котра продолжалася до поздна в ночы. Обі світлиці были отповідно до того торжества удекоруваны кольорами и написами.

Тым десятлітным торжеством было доказано и выкрыто, до чого може дойти мала, але добре организованна группа народа. Лемков лем жменька в Кливланді напротив другых великых лемковскых колоний в Америкі, но сводом кооперациом и вытревалостьом доходят до славы и до маєтку. Єсли лемкы в Кливланді так поддержатся на дальше, то слідуюче десятилітне може показати новы и несподіванны достижения в розбудові свойой народной организации на добро и на честь свому лемковскому народу, для чого она и была основана.