Краянка из Сквиртного —

Хочу подати до Календаря коротку историю краянкы Мелькы Гаврильчак, из Бруклина, Н. Й., котра выступала в “Лемковском Весілю” на фильмі в 1929 року, а два рокы тому перва подняла справу покупкы лемковской Народной Фармы и перва уплатила членске. В єй жизни єсть много такого, што показує с найлучшой стороны наш народ из Лемковщины и всей Карпатской Руси.

MelkaHavrilchak
Мелька Гаврильчак

Емилия (Мелька) Гаврильчак родилася от родичей Йосифа и Акилии Жыла в селі Шквиртне, Горлицкого повіта, на Лемковщині. На 17-ом року житья вышла замуж за Онуфрия Одомирка до сусідного села Регетова. Мали пятеро дітей: 4 дочкы и сына.

Их супружеске житье не дуже было счастливе, бо на том грунті были затягнены великы долгы ище от давных часов. Муж Онуфрий придумал поіхати в Америку, абы звернути тоты долгы. Но не нашол счестья в Америкі, бо сильно похворілся и по 10 місядах вернулся до старого краю ище с новым долгом на 500 ринскых.

А так в 1910 року Мелька оставила на грунті мужа и их пятеро дітей и сама выіхала в Америку, абы заробити грошы на уплату старых и новых долгов. Приіхала до Юнкерс, Н. Й., и там робила в карпетовні.

Тут застала Мельку перва світова война, то Мелька осталася в Америкі дальше, як наміряла.

По войні Мелька отложила собі грошы на уплату долгов и уж собералася до краю, а тут в 1923 року достає письмо от дітей, же их няньо, а єй муж Онуфрий — помер. Так Мелька не поіхала до краю, лем осталася в Америки Тут вышла замуж за Порфирия Гаврильчака, тоже из села Регетова.

С другым мужом счестья поправилося. Мали одного сына. Обое робили за даякий час и змоглися на прекрасный великий дом, в котром єсть квартир на 36 фамелий. Тот дом в Бруклині Мелька до теперь тримат. Дальше они постаралися спровадити с краю четверо дітей по первом мужу. То были три дочкы и сын. А одна дочка осталася в краю на грунті.

Тут што рок Мелька со своим мужом дораблялися ліпшого кавалка хліба и жили собі в згоді и любви. Но што с того, коли в 1940 року смерть забрала любимого мужа Порфирия, и Мелька знова осталася вдовом.

Теперь она жиє при сыні по другом мужу — Даниилі Гаврильчак и невісті Марии, котры мают три дочкы и разом с мамом мешкают в красной місцевости, коло Куни Айленд, в Бруклині, где мают ище два мекьшы 2-фамелийны домы. А в Майами, Флорида, мают также свой домик, где Мелька с сыном и його фамелиом пребывают зиэдушньом пором.

То легко сказати, як они теперь жиют, но взяло бы долго часу, як бы хотіл объяснили, скилько свого труда и трапезы вложила Мелька в тот маєток. Сама Мелька говорит што тот великий дом на 36 фамелий купил тоты два меньшы в Бруклині и тот третий во Флориді. Но Мелька сама за долгы рокы доглядала всього и робила всьо в том домі. Сама малювала комнаты, коли треба было дати апартмент до ренту, сама огрівала, чистила и порядкы робила. Кто має домы с квартирами до ренту, то знає, яка то робота. Теперь така дороговизна, а ренты под контрольом и заморожены, то треба добре самому наробитися, штобы выйти на свое. Но Мелька вышла на свое.

Ище хочу спомнути, што Мелька Гаврильчак брала участие в “Лемкрвском Весілю”, котре мы крутили на фильм в 1929 року на фармі Макария Геряка в Стемфорд, Конн. Она выступала в фильмі як мама молодого жениха. Тото “весіля” было выроблене Стефаном Шкимба, из с. Воловец; и уже покойным Михаилом Дужий, из с. Перегримка, повіт Ясло. Так сама Мелька была перша, котра подняла в газ. “Карпатска Русь” вопрос за покупку Народной Фармы.

Я подаю тых пару слов за Мельку Гаврильчак, штобы отдати честь трудолюбивой и вытревалой женщині нашого лемковского роду, котра не заломилася от тяжкого житья, но и в Америкі потрафила, як то кажут, выйти на свое.


Лемковский Староста.



[BACK]