В протоколі специального собрания членов отділа Лемко-Союза ч. 6 в Кливланді, от 16 ноября 1945 року, коротко записано рішение, котре осуществилося, и на протягу послідних десяти літ потягло за собом важны события в общественном житью меже лемками в Кливланді. Специальне собрание было созване по ділу: “поправкы старого дома або покупкы нового дома для отділа”. Тогдашний Предсідатель отділа пояснил членам, скилько буде стояти поправка старого дома, а сколько хотят за извістну в нашой околиці “галю” Кореня. Присутных на том собранию членов было 31. Они одобрили єдиноголосно предложение зложити пожичкы и купити новый дом для свойой организации.
Хоц рішение было сейчас выполнене, и покупка дома завершена ище в 1945 року, но перенести организацийну діятельность в нову будову удалося аж о рок, в 1956 року, и то лем постепенно бочными дверьми, бо головны части дома, клубове приміщение и велика світлиця были вынаняты на “лиз” на цілый ряд літ. Три слідуючы рокы взяло продати старый дом, легально освободите дом от “лизу”, очистити и обновити го от громадного запустіния попередными господарями. Теперь, коли оглянемеся на десятирочну діятельность, котру удалося лемкам выполните лем благодаря тому, што у нас єсть свой Народный Дом, мы не можеме молчки проминути той нагоды, што бы хоц в короткости не пояснити свому и чужому народу о том, як жили и як организувалися лемкы и до чого дошли в свойой организацйной роботі. ПРОЯВ КУЛЬТУРНОГО ЖИТЬЯ— А то вшитко началося от “Лемковского Весіля”, ліпше повісти, от Лемковскых Спросин”, — оповідат Пелягия Волк, коли начинат бесідувати о организации Лемко-Союза. “Лемковске Весіля, розумієся, представление, о котром она вспоминат, было составлено лемковскыма женами в проводі Марии Телех и устроєне на сцені женскым сполком Марии Магдалены, што при русской прав, церкви на Старкведер. Представление было ставлене в світлици “Кореня”, в теперішньом Домі Лемко-Союза, 26 октября 1926 р., то єсть добры три рокы перед основанием Лемко-Союза. Жены списали, кто што ма повісти, як актувати, коли и якы співанкы співати, где музыка ма грати и кто с кым танцувати. Но руководити тым всім не было кому. Они попросили русского учителя Гнатовского, абы их представил и руководил ними. До днеска они мают дост сміху с того руководителя, бо коли уж “весіля” началося, тот руководитель стратился и ани не розуміл, што на сцені перед ним водится. Он нигда в свойом житью таке не виділ. Но акторы свои роли напамять знали и весіля натурально представили.
А представление жены приготовили добре. В вечирковом домі выпали як раз спросины. Дівчата и жены прядут, а газдыня дому мотат ниткы и при том выгварят мужови: — Призрийся, яке криве мотовило єс мі зробил!... — Ей, стара, не будь-ле така... Ты ище не така крива, а я ти, хвала Богу, николи не доганям до того. А як пришли спросатаре, то як звычай, найперше торговалися на віні, але аж на остатку звідалися молодой, ци піде за него. — Та уж піду, піду, бо ся мі надоіло тоту косу плести... На віно они давали и записували “на вікы” — полтора свиньи, возок сіна и вшитко поле от воды аж до воды”. А на спросинах співали такы співанкы:
Ой зле, не добре,
Женитися треба, Взял бы-м сой богачку, Богачка гойнує, Вшитко розгойнує, Ой зле, не добре, Вшитко розгойнує. Ой зле, не добре, Женитися треба, Взял бы-м собі вдову, Нема свого дому, Ой зле, не добре, — Нема свого дому. Ой зле, не добре, Женитися треба, Взял бы-м сой сироту, Не має родины, Не буде гостины, Ой зле, не добре, — Не буде гостины. Уж не зле, уж добре Женитися буду, Нашол єм си таку, Што на мою дяку, Уж не зле, уж добре, — Женитися буду. А як благословили до шлюбу, то таку співали:
Счастлива-с, Марисю,
В пана Бога была, Же ты свой віночок До днес доносила. До днес доносила, Ладні-с собі несла И свойой родині Ганьбы-с не принесла. Ни ганьбы ни стыду, Ни жадной прикрости, Днеска ся отдаєшь В великой радости. Музыканты грают И музыка стоит, — Вся твоя родина Тебе благословит. На весілю співали и много другых співанок, якых вымагат весільный обычай, але тоты дві лем для того тут приведены, што здаєся, же они ище нигде не были печатаны. В ролях “Лемковского Весіля”, того першого в Кливланді, выступали такы люде: За молодого Афтан Сардыга, а за молоду Варвара Крестинич. Дружбове: Методий Сірак и Михаил Волк. За дружкы: Анна Сидоряк и Юлия Сірак. Староста Василь Федак. Свашкы: Анастасия Хомик и Анна Попик. Родиче молодого: Павел Телех и Настя Наговска. Родиче молодой: Федор Ксенич и Пелягия Волк. Циганка-ворожка Марта Песко. Маршалка Петро Завода, а музыканты Стефан Кивко, Иван Прокопчак и Петро Пыртко. Дівчата на весілю: Анна Кобеляк и Євка Васько. Всі потребны знарядья до весіля поробил Федор Ксенич. В том першом “Лемковском Весілю” интересный склад и походжынья самых акторов. Большинство походило из сел Воловед, Святковы и Незнайовой, но были меже ними и из другых сел, приміром, В. Крестинич из Высовы, И. Прокопчак из Ростайн, П. Телех из Лосья, трое из Котани, а Марта Песко и Петро Завода из Юркоовй Волі, на Пряшевщині. Тот склад акторов доказує, што лемкы в Америкі не признавали меже собом державных границ, якыми они были поділенні в старом краю, и в культурной роботі тяглися докупы, бо она была обща для них, и то помимо того, што политичны и религийны верховоды старалися их всіма способами поділити на партии и віры. Тото перве в Кливланді “Лемковсе Весіля”, устроєне женскым сполком Марии Магдалены в 1926 року, было початком культурного житья, и фотографию того “весіля” поміщаме меже рядками сей статьи. РОЖДЕНИЕ ЛЕМКО-СОЮЗАС початком 1930 року со всіх сторон доносилися вісти о рождении культурно-просвітительной организации Лемко-Союза для всего нашого народа и на весь американский континент. Кливландскы лемкы, маючи за собом уж початковы зразкы культурной роботы, одны из первых ударили в струну народной єдности и их интерес к народному ділу был настолько замічательный, што главны руководители организации звернули особливу увагу на Кливланд. Они рішили, што тут єсть найлучший грунт для початкового розвою организации, а при том и для поширения нашой народной литературы, бо тут были найбольшы возможности удержатися финансово. Где єсть интерес к народному ділу, там средства все найдутся.
Лемко-Союз почал тут розвиватися и тут уостановил свою столицу с главным правлением. При розвитии свойой литературы почал розвиватися и наш народный театр. Такой с под горячого друку тут начали ставитися лемковскы представления. Кружок выступал не лем в Кливланді, но и в поблизкой околици. Тема нашых представлений все была народна и все высокопоучна. Одным из найбольше массовых представлений был “Вертеп в Карпатах”, котрый запамятался нашым людям до днеска. Так перве представление “Лемковске Весіля” ставилося в нашой теперішной світлици, но тогды она не была наша. Друге велике представление “Вертеп в Карпатах” ставилося тоже в чужой “Свисс” (шведской) світлици, а для нашой публикы. Той славной діятельности долго тут не было, бо в 1935 року Главне Правление Л. С. перенесло свою діятельность в Нью Йорк, а кливландчане осталися осирочены, без всякого передового руководства культурными роботами. Осталися в свойом власном, но старом и тісном клубовом домі, где поправкы стояли больше, як на вынаймі. Затих Кливланд на цілый ряд літ, выполняючи тихо народны потребы. ДОМ КОРЕНЯ — КРІПОСТЬ САУТ-САЙДУПервы лемковскы емигранты начали поселятися в Кливланді за Президента Кливланда в 1880-ых роках. Поселилися они в той самой околици, где стоит теперь наш Народный Дом, то єсть на так званном Савт сайді (полудневой части города). В той самой околици начиналося наше церковне, а потом народне житья. В Кливланді собралося поверх 20 тысяч нашоґо народа с Карпат, с обох сторон границы. В початках, хоц не мали над собом руководства, держалися разом и жили як одна родина, но с часом стали ділитися на религиях и на границах, котры почали меже себе затігати так, як и тамты в старом краю.
Центром Савт-сайду єсть Линкольн Парк. В 1910 року на одном углу того парку пряшевскы лемкы будували гр. кат. церковь Св. Духа Меже членами той парафии был и Андрей Корень, котрый в тот самый час на другом углу Линкольн Парку будувал дом с офисами и світлицом для свого бизнесу. Родом он был из села Чорне в Шаришской столици, но тут в Кливланді он был урядником в парафии Св. Духа, и хоц без школы, был городскым “политишеном”, грал рука в руку с майорами и комишенерами города. Архитектором будовы был тренчанский словак Йосиф Дуваловский. Будова со світлицом и банковыми бюрами в тоты часы была велика рідкость и означала городский прогресс. Быстро она стала знана цілому городу, яко “Корений Голл”, так як было с мадьярска написано на надверном камени. В світлици отбывалися не лем родинны забавы, як свадьбы и юбилеи, но и регулярны забавы с музыком и танцами. Много раз выступали тут туристичны группы артистов, билися за чемпионство боксеры, пасувалися силачы, показувалися магичны штукы и фильмы. В многых протоколах вписане имя дому, бо тут часто отбывалися массовы собрания и віча, особливо нашых славянскых народов, где они спорили и лагодили свои религийны, классовы и народны діла. Многы парафин, братства и клубы были завязаны в том домі и для всіх их он єсть важным историчным місцем.
Понеже Саут-сайд стал міщанином численных народностей, тут рожденных и емигрантов, околица вокруг той будовы сталася небеспечна. В день могли проходящого обрабувати, а вечером, особливо подчас танцев, в світлици и вокруг дома взрывалися кровавы бийкы, так што и тоту світлицу неофициально люде называли “відерком крови”. Близко 20 літ Корень господарил своим домом, но в родині зашли несподіванны беспорядкы, он поглубился в долг, а в конці был покаліченый и умер. Будова нашлася в банковых руках. Єй переберали пару властителей. В світлици устроили кругольню (бовлинг аллей), под именем “Валей Вью” — вид на долину. Но и новы господаре не могли привести діла до порядку. Будова наново нашлася в руках банку. Як раз в тот час отбывалося спедиальне собрание отділа Л. С. ч. 6, 16-го ноября 1945 року, о котром вспомнено на самом початку, и на котром члены рішили купити тот дом, бо виділи, што он продаєся за половину ціны, котра стояла выбудувати го в 1910 року. Ціна выбудовы была 37 тысяч долларов по вартости доллара тых часов. Городский архитектор минувшого року в приятельской бесіді заявил, што выбудувати такий дом с такым фундаментом жаден контрактор не прийме ниже 250 тысяч: то єсть чверть миллиона долляров. Так тото червене ябко над Линкольн парком, на котре лакомо позерали многы бизнесмены и за котрым жалуют до днеска, попало в рукы организации Лемко-Союза, а с тым и на власность всего лемковского народа. С днем покупкы того дома началася нова ера для лемков в Кливланді в розвою народной культуры и выполнению цілей устава Лемко-Союза. Діятельность, котра была выполнена послі покупкы того Дома, єсть велика и воодушевляюча, и длятого члены кливландскых отділов Л. С. рішили отпразднувати торжественно тото важне десятилітие свойой власной будовы. ПЕРВЕ ДЕСЯТИЛІТИЕ В СВОЙОМ НАРОДНОМ ДОМІ
Первых десять літ в свойом Народном Домі были звернены на поправку, выплату долгов и на культурне розвитие среди старшых и молодшых. Діла, котры были довершены, суть дуже великы под каждым взглядом, полезны и радостны. Долгы, котрых кажда организация боится, як огня — были выплачены, и финансово нашы отділы поставили себе так высоко, што суть в стані набыти новый народный маєток. Будова с надвору и в середині была поправлена, и авторитет будовы был приверненый на должну высоту. В культурном отношении отділы покрилися славом. Почавши с 1950 року, переходячи всякы перешкоды, отділы ставили представления нашого народного характера. “Лемковске Весіля” ставилося 7 раз в Кливланді, Лейквуд, Лорейн, Питтсбургу (Пеннсильвания штат), в городском “Поблик Аудиториум” и на открытом парку кливландского “Мюзеум ов Арт”. “Лемковскы Вечиркы” ставилися три разы, “Щедрый Вечер на Лемковині” два разы, по одному разу “Собітка” и “Спросины” и другы меньшы штукы из нашого народного житья. Фотографий из тых славных представлений не поміщаме в сегорочном календарі, бо они были поміщаны за послідных 6 літ. Мы обчисляме, што наши выставы были показаны найменьше 50 тысячам зрителей. В кливландской прессі с каждого року найдете много добрых заміток и фотографий о нашой культурной роботі. Послі “Лемковскых Вечирок” в Поблик Аудиториум найбольша кливландска газета, котра єсть ровночасно передовом газетом цілого штата Огайо, из 24 народностей, выступавшых в фестивалі, помістила фотографию лем нашой лемковской группы. Каждый серьозный посітитель из другых штатов и краин иде в библиотеки и прессу за информациями. Кто зайде в кливландскы библиотеки або прессу, там получит “Справочник Кливландскых Национальностей” (ціна 1.25), напечатанный другом газетом, “Кливланд Пресс”, в котром посітитель поучится и о лемках. Днеска молодежь нашого лемковского драм-кружка часто запрашатся культурными организациями для публичных выступлений с лемковском музыком, танцами и обязательно в лемковскых костюмах. Для нас то єсть велика радость, што мы, вічно топтаны и насмішками убиваны в минувшині, тут в чужой для нас языком крайні могли поднятися так высоко и представити свое лице перед світом. И в минувшом 1956 року мы зашли дальше вперед. У нас был “Концерт Лемковскых Талантов” 28 января в свойой світлици. Там были півчы, музыкальны и танечны номера, с двома короткыми представлениями “Конскрипция” и “Пранья на Потоку”, в котром были показаны характеры народного житья на Лемковині. Другым выступлением был Междунациональный Фестиваль в радио и телевизийном Доблю-Ейч-Кей Аудиториум, где лем половина избранных групп выступала. Там нашы молоды лемкы показали створенный нима танец, под старинну лемковску мелодию “Заквитла Ружа Трояка”. Недавно, бо лем 23 июня, было поставлене “Лемковске Русаля”, на котром был присутный Головный Предсідатель Л. С. Стефан Геренчак из Джерзи Сити, Н. Дж. Русаля отбылося в нашой світлици, а было составлене по традициям нашых предков с многыми співами, жартами, музыком и танцами, в том и новоизученным “Крученным” танцом под мелодию “На потоці качкы плынут”, котрый публикі больше полюбился от всіх попередных. Радостным єсть то, што коли в початках нашых выступлений мы опералися лем на нашых старшых емигрантов, то сего року выступат сама лемковска в Америкі рожденна молодежь, котра што раз то больше начинат интересуватися свойом организациом и своим народом.
Слідує отмітити и то, што коли всі другы нашы народны институции в Америкі были створены великыми жертвами передовых людей, то наша народна Будова была куплена лем на счет пожичок членов, котры были уж выплачены с процентами из доходов в Народном Домі. Правда, што признательность належится всім членам, што жертвовали много своим трудом при поправкі, при предприятиях и при ведении культурной роботы, но большых грошевых жертв на нашом Народном Домі ніт. Слава урядникам, котры по своим способностям и по своим знаниям пробували як найлучше могли. Честь всім членам всіх трьох отділов, котры в минувшом помагали и помагают дальше, бо без их участия наша будова быйа бы пуста, а организация стояла бы на мертвой точкі, На полрочном членском собраний, в присутности Гол, Містопредсідателя Ярослава Крбана, члены рішили отмітити перву десятирочницю нашей будовы — торжественно. Буде то поздно в осени, близко американского праздника “Дня Благодарности”. Торжество хочеме устроити велике, бо хочеме порадуватися тыми великыми успіхами, тым больше, што они не приходили нам легко. Много раз мы встрічали на свойой дорогі серьозны перешкоды, не лем со стороны чужых людей, но и своих членов, а часто и урядников, котры по свому нерозумінию бурили тото, што другы будували. О том мы хочеме забыти, бо каждого робота в свойом часі причинилася до укріпления того, о чом выше сказано. И каждый достане свою признательность, на што заслужил, але на то прийде свой час, бо книга нашой народной діятельности ище не замкнена. То лем початок єй. Мы будеме жити надійом, што на будущом юбилейном 20-ом головном съізді Лемко-Союза, где бы он не отбывался, в нашом Центрі в Юнкерс, ци в Лемковском Парку, наша кливландска молодежь лемковского року возме участь в программі общого концерту с кружками другых отділов Л. С. в С. Штатах и Канады. Тым не лем сділаме наш юбилейный съізд Л. С. больше величавым и торжественным, но и наша молодежь из ріжных концов Америкы буде мати добрый случай познайомитися со своими культурными достижениями и тым больше заинтересуєся ділами нашой народной организации и родным крайом своих родителей — Лемковином.
Николай Цисляк.
|