Вспомин Лемковского Партизана —
Родна моя Лемковщино,
Яка ты прекрасна
И любима ты нам лемкам,
Як и мати власна.

Бурю страшну пережили
Родны твои діти,
Много горя перенесли, —
Тяжко то забыти.

Были войны в твоих горах
И долины смерти, —
Бо хотіли тя фашисты
С лица земли стерти.

Мы там были, мы виділи,
Што робили каты,
Як стріляли нашых людей,
Як палили хаты.

А найбольше потерпіли
Лемкы из Мысцовы,
Бо фашисту попа мали,
Служил он врагови.

Раз начали из Мысцовы
Всіх в неволю брати,
То мусіл и Мысцовяне
В лісах ся ховати.

И начали партизанку,
Борьбу за свободу,
Так перешли мирны лемкы
На совітску моду.

Вспомну село Перегримку
И Цеклинску Волю,
Бо ділили они с нами
Партизанску долю.

И як Довбуш в Чорной Горі
Панов знал палити,
Так лемковскы партизаны
Стали німцов бити.

С долгой спячкы збудилися
Велькы лісы, горы,
Смерть фашистам голосили
Нашы гущы, боры.

И не один німец лежит
В Камени, Точколі,
На Магурі тыж не мало
В потоці на долі.

И нацисты-украинці
Очы вытріщили:
Был агентом для Гестапо, —
Дораз го забили.

Не раз пришлось за три рокы
Спати на холоді,
Без поживы мы сиділи,
Но при доброй воді.

Русскы пленны до нас пришли,
Тыж нам помагали,
Добры были товаришы, —
Разом мы страдали.

В неустанной борьбі с врагом
Росли нашы ряды,
Потоптали нашы ногы
Лемковщину всяди.

На Словакох мы тыж были,
Маковицу знали,
И Милоса Кечковяна
Часто навіщали.

Коли Гитлер стратил вшитку
До словаков віру,
То розогнал он их войско
Всяди по Подгірью.

Так ся вшиткы потратили
В лісах Пряшевщины,
Але пришли им на помощь
Братья с Лемковщины.

В них не было той практики,
Як так можна быти,
В лісах Карпат под ялицов
Дни и ночы жити.

Вшиткы разом огни клали,
Одежу сушили,
Карабины от болота
Оливом чистили.

На засады тыж ходили
Німцов постріляти,
То на восток меньше піде
Русскых стримувати.

Так минали дни за днями
Горя и недоли,
Але чути близко гуку
Наступавшей воли.

Уж чуєме о наступі
Совітскых гвардистов,
Самолеты со звіздами
Громят, бьют фашистов.

И так первый раз встрічают
Лемкы партизаны
Генерала Баранова
И с його бойцами.

“Здравствуйте!” — всі закричали.
“Друзья партизаны,
Помагайте немцов бити,
Разом, друзья, с нами!”

Наполнились велькы горы
Гуком от снарядов.
Зарычали смертны “Тигры”
В полях под Змиградом.

Бой начался, страшно было
Нам то преживати,
Як гвардистов, тых геройов,
Стали окружати.

И там на Кичері горі,
В лісі Качальнику
Осталися тилько ямы,
С дерев ани ліку.
И раз по раз наступали
На ту страшну гору,
Не хотіли уж отдати
Мысцову в неволю

За гористу нашу землю,
Прекрасну природу
Жертвовали русскы мамы
Дітей свого роду.

Хоц одного мати сына
При старости мала,
То и того наймильшого
На войну отдала.

И всі они воювали
За права и волю,
За славянску и лемковску
Нашу вспольну долю.

Вічна слава павшым в битві
Советским гвардистам,
Бо за кривду отплатили
Зрадникам нацистам.

Пригорнула их там к собі
Карпатска землица
И геройское славов вкрыла
Молоденькы лица.

Нашы лемкы тыж там лежат,
Най им буде слава,
Уж на их могилах росне
Зелененька трава.

А где-ж твой сын-єдиначок,
Вдово Пелягийо,
Або где твой Василь, Тереск,
И твой Гриц, Марийо?

Та и твой Николай, Насто,
И твой Юрко, Марто?
Один погиб на Мураві,
Другий аж за Вартов.

Вшиткы они спочивают,
Где смерть их застала,
Уж и на них давно росне
Зелененька трава.

Долг священный выполнили
Вашы любы сыны,
Як герои партизаны,
Славной Лемковщины!

Командир партизанского
отряда имени Чапаева,
Большой Д. Ф.




[BACK]