В 1849 року на съізді австрийскых католицкых епископов в Відню, где гр. кат. церковь в Галичині представляли Левицкий и Яхимович, осуждено на подставі Св. Писания национальне пробуждение народов Австрийской империи, розвитие национальных языков, национальных культур и саму национальность: “национальность єсть остаток язычества, так як разноязычие єсть последствие гріха”.





ЗАБЕРАЮТ ДІТЕЙ РОДИЧАМ

В неділю в церкви поп говорил на проповіди, што в России большевикы заберают родичам дітей. По службі одна жена вертатся додому и встрічат куму.

— Ой кумичко, пропали нашы люде, што их забрали до России. Отец духовный говорил днесь в церкви, же там большевикы заберают дітей родичам.

Друга кума повідат:

— Я не знам, ци в России заберают, но в Америкі то направду заберают, бо знам по собі. Я мала шестеро, ховала-м, а як выросли, то всі мя лишили.





“Серб, болгарин, боснийский райа, славянский крестьянин из Македонии и Фракии питают большую национальную симпатию к русским и имеют с ними больше точек соприкосновения, больше средств духовного общения, чем с говорящими на том же языке римско-католическими юго-славянами” (Маркс и Энгельс, цит. в “Истории СССР”, том II под редакцией проф. М. В. Нечкиной, стр. 235).





МАЛЕНЬКИЙ ШКОЛЯР

Маленькому хлопчику сказала мама, што піде до школы на другий день. Хлопчик встал рано, позберался скоро и весело и был готовый ище перед назначенном годином.

Но на слідующий день по школі он спит рано, хоц час збератися. Мама будит його:

— Васю, вставай, бо час идти до школы.

Васьо протер очы и говорит мамі:

— Знов до школы? Та я уж был вчера.





ЧАРОВНЫ СЛОВА

Нашы люде видят штоси надзвычайне в назвах и словах, и часто заводят великы суперечкы на том, як тото або друге слово выречи ци написати. Напримір: Лемковщина ци Лемковина? Або: руський, руский, русский?

То осталось ище с тых часов, коли люде вірили в заклятья и чаровну силу слов. В байках говорилось, што треба было знати и точно повторити тото або инше слово, то або скала отворилась, або можна было человіка перемінити в волка. А як не вырюк точно потребны слова, то чары не дійствовали.





Коли человік говорит сам о собі, то все тратит:

Як скаже зле на себе, то люде все йому повірят;

но як похвалит себе, то люде не повірят.





В світі ніт ничого великого, лем человік. А в человіку ніт ничого великого, лем розум.





Малюваны квіткы не мают запаху.





Коли гамба закрыта, то муха не влетит.





Дурак любит, як го хвалите.





Красивый цвіток николи не устоится долго коло дорогы.





Кто скоро смієся с другого, то сам поздно мудрым стане.





ПРИПОВІДКА

В одной карпаторусской запомоговой организации в Америкі перед конвенциом два кандидаты билися на уряд секретаря.

Один приготовил велике циркулярне письмо и хотіл розослати його всім делегатам. Но пришол к нему старый приятель, вічний делегат, котрый все по конвенциях ходил, прочитал он циркуляр и говорит:

Барз добре написано, тут суть всі доказы, што правда по твойой стороні, но то тобі не поможе, лем пошкодит. Одны делегаты не поймут, што ты пишешь, бо суть и неграмотны. А другы настрашатся циркуляра, же хочешь захватити организацию. Ты лучше пошлий каждому делегату фляшку горілкы, то всі зараз порозуміют, што ты не думашь захватити организацию, ани не замышляшь нияку псоту, лем хочешь честно достатися на уряд.

Кандидат на секретаря послухал и так зробил. Потом на контвенции побідил великым большинством, бо ціла Пеннсильвания голосовала за него. И так просто, честно, без ошуканства стал секретарем запомоговой организации.




[BACK]