3олоты Весіля в 1956 Году — Н. Ц.

ТОМКО И ЕВФРОСИНА ЮЩАК


Томко и Евфросина Ющак, Tomko and Efrosina Yeosock
Томко и Евфросина Ющак.

Т. Ющак родился в октябрі місяці 1879 року в Мацині Великой, Горлицкого повіта, на Лемковщині. Родиче його были: Иван Ющак и Мария из Ковальскых.

В 1900 был ассентеруваный до войска и выслужил три рокы при 20-ом полку піхоты в Кракові. Школу мал лем зимову сельску, где дьяк зимовом пором учил дітей читати и писати, но и так при австрийском войску был поднятый до рангы “цугсфирера” (сержанта). Отбывши войскову службу, он вернулся до родного села и зараз подал о пашпорт на выізд в Америку.

О свойом житью в Америкі он росповідат так:

“Я приіхал до Филедальфии 18 января 1904 року — до Михаила и Юлии Заяц. Краяне взяли мене до гарбарни на роботу. Робота была легка, но платня была низка: $5.00 на тыждень.

Я не был задоволеный таком платньом, то глядал лучшой роботы и поіхал до Питтсбурга. Но там роботы было мало: за 3 тыждни я робил 3 дни. Коло церкви я встрітился с краянами, котры робили в майнах, так они взяли мене зо собом, бо там в их місцевости одна майна открывала роботу. Я пішол с краянами до офису и достал роботу в майні. Там поробил 4 місяци. Можна было добри заробити. Потом робота ишла слабо, робили лем по два дни на тыждень, то люде ся поросходили по другых майнах, бо каждый хотіл більше заробити.

Я переіхал до Филадельфии. 27 октября 1906 оженился с краянком Евфросиниом Смакола, дочком Феодора и Юлии Смакула из Мацины Великой. Роботу я достал на заводі Болдвина. Робил 7 місяци на ночну шихту. Потом роботі пришол конец, бо тота часть завода была переведена до Честер. В Филадельфии было трудно достати роботу, то я поіхал до Олифанту и достал там роботу за помочника майнера, як называли, за “лебра”. Робил через зиму, а на весну поіхал по жену в Филадельфии и вернулся назад до роботы. Получил майнерский папір и робил за майнера. Так остался на той роботі аж до ноября 1919 року.

В Олифанті я занимался организованием майнерской юнии и працувал также в нашых организациях.

В 1919 переіхал до Вудбайн, Н. Дж. Там купил дом и фарму и поселился там. В Вудбайн жиєме до теперь — уж 36 літ.

На Олифанті померло нам трое дітей 2 хлопці и одна дівчина. До Вудбайн мы привезли четверо малых дітей, бо найстаршой дівчині Александрі было лем 12 літ. В Вудбайн мы мали ище двох сынов Василя и Йосифа. На фармі они выросли. В минувшой войні 5 нашых сынов служило в американской армии.”

Таку коротку историю свого житья подал сам Т. Ющак. Он споминат, што 5 його сынов было на воєнной службі, а то суть: Иван, Павел, Филипп, Василий и Йосиф, Штыри вернулись счастливо с войны, но один сын, Павел, отдал свою жизнь за Америку: он был убитый на фронті в 1944 року. Дочка Александра, найстарша в фамелии, по мужу Ярош, жиє со своим мужом такой там в Вудбайн, в близком сусідстві с родичами. Они мают свою велику курину фарму: держат около 3,000 кур. Два сынове, Иван и Филипп, жиют также в Вудбайн и мают свои занятия. Сын Василий окончил университетскы студии, получил научну степень доктора и працує теперь по свойой специальности при Делаверском университеті в Вильмингтон, Дел. Наймолодший сын, Йосиф, окончил Рутгерский университет в Нью Бронсвик, Н. Дж., и працує теперь в головном офисі Гренд Юнион компании.

Всі діти Ющаков говорят своим материнскым языком. Найстарша из них, дочка Александра, говорит так свободно и выразно, як бы вчера приіхала из Мацины Великой.

Наймолодший сын Йосиф оженился в февралі минувшого року. Богате весіля отбылося в Карпаторусском Ам. Центрі в Юнкерс, бо за жену он выбрал собі секретарку Центра и Л. С. — Анну Чачо. Он сам говорит, што може; николи не встрітил бы свою жену, єсли бы не знал языка своих родителей и не послухал, што они йому говорили. Коли он был посланый от свойой компании на роботу окружного менаджера в Вестчестер каунти, Ньюйоркского штату, то отец сказал йому: “Джов, можешь зайти до Центра, бо там єсть наш краян д-р С. Пыж”. И дал йому адрес. Так сын зашол раз, встрітил краяна, встрітил и секретарку и начал уж частійще заходити не тилько, штобы видіти краяна своих родителей, но ище больше, штобы видіти Анну. Минуло потом рок и пол, и уж в Центрі было весіля.

У Ющаков велика родина, як по стороні отца, так и по стороні матери. Два браты Т. Ющака живут в Америкі: Юлиан Ющак в Ленсдейл, Па., и Теодор Ющак в Полсборо, Н. Дж.

По стороні матери в родині было 9 дітей, в том Евфросиния найстарша: она родилась в 1883 року. Отец Теодор Смакула был, війтом в Мацині Великой от 1897 до 1901 року. Один из братов Евфросинии, Михаил Смакула, жиє в США — в Перкаси, Па., а три браты: Василь, Никифор и Йосиф Смакула, и 2 сестры: Варвара Загурска и София Колодійчик — живут в Бориславі, Дрогобычской области, на Совітской Украині.

Евфросиния Смакула-Ющак приіхала в Америку в 1903 року к свойому стрыку Василю Смакула в Филадельфии и працувала в паперовні, поки не вышла замуж. Потом с мужом переіхала в Олифант, Па.

В Вудбайн, Н. Дж., у Ющаков єсть своя фарма. На початках они занималися молочным господарством. Коли сынове дорастали, то помагали на фармі — розвозили молоко місцевым костумерам. Так получали добрый доход, што сынове могли и покончити школы, якы кто хотіл.

Том господарком занималися Ющакы до 1950 року. А потом занехали, бо сынове выросли и пошли на свои роботы, то старым родичам не было уж охоты ани сил заниматися тым ділом.

В субботу 27 октября 1956 минуло точко 50 літ их супружеского житья. И в тот день всі діти сынове, дочка, зять и невісты устроили родичам велике золоте весіля. Весільна забава отбылася в ветеранской галі “Америкен Лиджион” в Вудбайн, Н. Дж.



НИКОЛАЙ И АННА ЦИМБАЛА

Николай и Анна Цимбала, Nickolas and Anna Cymbala
Николай и Анна Цимбала в день 50-літия их супружества.

Николай Цимбала родился 8 ноября 1881 року в Устью Русском, пов. Горлицы, на Лемковщині.

До Америкы, в город Брадок, Па., пришол в 1900 року и пробыл там 3 рокы. Другым місцем його пребыванья была Донора, где он прожил 6 літ. Там он и оженился в 1906 року на Анні из Павлишаков, рожденной в Америкі в 1889 року от родичов, походящых из села Ріпкы, пов. Горлицы.

Дальше Николай переіхал в Еллвуд Сити, Па. Там он справил собі и фамелийный дом. Коли робота на заводі закончилась в 1926 року, Николай поіхал до Кливланду глядати роботы. И нашол там роботу. Так цілых 20 літ он працувал в Кливланді, и лем неділями мог звиджати свой дом и свою родину в Еллвуд Сити.

Николай и Анна Цимбала выховали здорову и численну фамелию — 11 дітей. По порядку рождения они идут так; Григорий, Мария, Таця, Параска, София, Йосиф, Даниил, Михаил, Мелякия, Павлина и Флорианна. Всі дівчата отданы и сынове, за вынятком Григория и Даниила — женаты. В часі послідньой войны против фашистской оси штыри сынове и дочка Мелания служили в американской армии на всіх фронтах, на островах, в Азии, в Европі и Африкі, и всі здоровы и счастливы вернулись домой.

Сам Николай в часі войны працувал без утраты одного дня в воєнной индустрии — в компании “Америкен Стил енд Ваєр” и был поставленый в примір другым робочым. В бюллетені той компании была поміщена и фотография Николая Цимбалы при роботі, а также слова, якы сказал в бесіді с репортерами: “Чым больше выдаме роботы, тым скорше прикончиме Ось”.

Николай Цимбала єсть вірным членом Лемко-Союза и читателем газеты “К. Русь”. Где треба дати жертву на Пресс-Фонд або яку иншу народну ціль, то он все в первых рядах.

29 июня 1956 р. сынове с невістами и дочкы с зятьями и внуками устроили 50-рочный юбилей родичам по случаю 50 літия их супружества. Юбилейна забава отбылась в готелю Кесылтон, в місточку Нью Кессыл, Па. То была лем семейна забава. Самой родины было 29 членов. Кромі них были ище присутны всі три сесетры Анны — всі три вдовы из Питтсбурга: Павлина, Нина и Стефания.

Радость была у юбилянтов и у дітей, бо такых торжеств не єсть много. Жизнь робочого в Америкі не легка, то мало встрічаются такы родины, в котрых родиче можут праздновати золотый юбилей свого супружества и мати коло себе таку велику фамелию, яка была у Николая и Анны Цимбала на их торжестві 29 июня 1956 року.

Н. Ц.



[BACK]