Анна и Симеон Цуцура — Н. А. Ц.
Симеон и Анна Цуцура, Semeon and Anna Tsutsura
Золотый юбилей супружества:
Симеон и Анна Цуцура.

Золотый юбилей супружества справляли в 1955 году также Анна и Симеон Цуцура из Аликвиппа, в Пеннсильвании. Их торжество припало на день 7-го августа. Торжество приготовил им их єдиный сын Василь с невістом и маленьким внуком.

Юбиляр Симеон родился 1 июля 1881 року в селі Мацина Велика, Горлицкого повіта, а до Америкы прибыл в 1897 року, где жил в майнерскых місностях коло Питтсбурга. В 1905 року он женился на Анні Шкварла, котра походит из села Астрябик, Новосандецкого повіта. Она была рождена в 1887 року.

Симеон працувал в майнах, где послі десяти літ роботы його стигло велике несчастье. Он пал жертвом “ексиденту”: в майнах йому зламало праву руку, котра была йому отнята. Майнерска компания предложила йому шесть місячный курс, котрый он принял, и послі окончения курса стал инспектором в майнах. На той позиции он проробил ище десять літ. Послі того он рішил основати на свою руку гросерный бизнес. С ним он переходил с міста до міста. Он побывал в Дупойнт, Чарлерою, Куртисвилл, Микизрак и остаточно установился в Аликвиппі. В Аликвиппі он был первым лемковскым поселенцом меже чужыми людьми и тут он при помочи свойой жены и сына доробился красного маєтку. У него красный дом, в котром поміщатся гросерна торговля. Сын Василь працує механиком в гараджу.

Хоц сам Симеон переносил великы трудности, утративши руку, он помагал финансово свому молодшому брату Георгию, котрый был в Горлицкой русской бурсі, посіщати школу. Война прервала школование, и Георгий по прибытии в Америку стал священником. Теперь он єсть настоятелем лемковской парафии в Лопез, Па. Он тоже со свойом матушком и двома наймолодшыми доньками был присутный на торжестві 50-літного юбилею свого брата. Треба подчеркнути, што Симеон єсть не лем прогрессивного духа, но и сознательным лемковскым патриотом. На культурне поднятие свого народа и на другы народны ціли он николи не жалувал цента, а щедро поддержувал всяке народне начинание.

На том богатом торжестві в честь його золотого юбилею был присутный и член Центрального Комитету Лемко-Союза Николай Цисляк из Кливланду. Он передал привіт и пожелания от имени народной организации, котру они обоє любят и высоко шануют. Най же нашым юбилянтам послі их долгого и вытревалого труду и их примірного фамилийного житья, новый период буде солодкым, счастливым и радостным.


Н. А. Ц.



[BACK]