Чому Море Солене? (Народна приповідка)

В одном місточку жил худобный человік, но щирый и милосердный до нищых. А мал сам много дітей.

Раз иде он дорогом и встрітил старого діда с сивом бородом. Дід вытягат руку и просит милостыню. Бідный человік мал при собі три грошы — вынял один грош и дал дідови. Иде дальше и встрічає другого діда, то и тому дал один грош. Иде дальше и встрічає третього діда, котрый так само просит милостыню. И тому дал послідный грош.

Тот третий дід застановил свого благодітеля и каже:

— За твое милосердие я тобі дам дашто.

И вынимат из торбины малый млинчик и каже:

— Тут маєшь млинчик, тот млинчик тобі намеле, што йому роскажешь. Коли дашто хочешь, то скажи му так: “Млинчак, млинчик охочий, змели мені што я хочу, змели мені... — то и то.” И млинчик намеле, што ты хочешь. А коли млинчик намолол дост, што ты хотіл, то скажи йому так: “Млинчик, млинчик, уже стой, бо так хоче мельник твой.”

А тот дід за всі три разы был св. Петро.

И так бідный человік вернулся с млинчиком домой. Одного разу в його сусідстві богатый пан справлял гостину по случаю своих именин и позвал своих знакомых и другых панов. Не забыл он и за того бідного сусіда, бо и його запросил на гостину. По гостині встає тот худобный человік, дякує пану за почливость, а так просит всіх присутных придти до него на другий тыждень о том самом часі тоже на гостину. Меже гостями был и місцевый корчмарь, котрый начал сміятися из бідака, же як он може панам таку гостину дати, коли у него ни грошей ніт, ни пожичити йому никто не пожичит. А худобный человік говорит, што он ище лучшу гостину даст.

На означенный час посходилися всі прошены гости. Пришли больше так, штобы посміятися. Пришол и тот корчмарь. Столы росставлены и накрыты обрусами, але на них ничого ніт. Входит господарь с млинчиком, кладе на стол и говорит: “Млинчик, млинчик охочий, змели мені што я хочу, змели нам всего, што потребно істи и пити для найлучшой гостинні.”

И млинчик начал молоти. А господарь лем позерал. Як уже всего было довольно, то сказал: “Млинчик, млинчик уже стой, бо так хоче мельник твой.”

Панове-гости не могли выйти из удивления и зависти, што такий худобный человік потрафил таку богату гостину дати. А найбольше завидно было тому корчмарю. Як панове розышлися, он остался и говорит:

— Иване, продай мені тот млинчик, я тобі дам грошей, скилько хочешь на свой живот.

Иван с початку не хотіл, але потом згодился и продал. Корчмарь скоро стал великым богачом, бо не мусіл горілку и другы напиткы купувати, лем млинок намолол йому полны пивницы. И грошы йому молол.

Так сытый от богатства корчмарь постановил собі видіти больше світа и выбрался за море. Но и млинчик взял с собом. О пару дней, як уж были на кораблі, кухари приготовили істи, но без соли, бо бочка с керосином пукла, и керосин просяк в мішкы с сольом, то не можна было єй уживати. А корчмарь каже капитану корабля: “Я вам достану чистой соли, але мусите мені заплатити.”

— Згода! — сказал капитан.

Корчмарь бере млинчик и каже йому молоти соль. Млинчик начал молоти. Меле и меле. Уж капитан кричит, же дост, а корчмарь не може застановити, бо забыл одно слово “стой”. Он кричит иншы подобны слова, но не може застановити млинчик. Уж и корабльом крутит, перегинат от соли, а млинчик дальше меле. И казал капитан схватити корчмаря разом с млинчиком и кинути в море, штобы корабль не затопился.

Так корчмарь утонул, а млинчик меле соль до теперь. И тому море солене.


(Из книжкы
“Подкарпатский Русский Календарь”
1910 года, Ужогород).



[BACK]