Василь и Афия Подбережняк — Мария Варецка
Василь и Афия Подбережняк, Vasyl and Afia Podberezniak
На золотом весілю Подбережников. С ними на фотографии донька и зять, котры в тот самый день мали срибне весіля.

Нашы краяне Василь и Афия Подбережняк в Ансонии, Конн., справляли 50-рочне весіля в неділю 12-го июня 1955 року.

Вышло так, што их дочка справляла того самого дня 25-рочне весіля, отже то было всьо разом. Тато и мама праздновали золотый юбилей супружеской жизни, а их дочка и зять — срибный юбилей.

Нашы юбилянты суть знаны всім людям не лем в Ансонии, но и на цілу околицу. Василь Подбережняк и його жена Афия, из роду Журав, походят из села Бортне, повіт Горлицы. До Америкы приіхали обоє в 1901 року за даякым ліпшым счестьом, як и мы всі. И тут в Америкі тоты двоє люде не глядали собі пары дагде далеко, тилько обоє побралися, бо были добре знакомы ище со старого краю. Жили и жиют собі счастливо. Выховали велику фамелию — трьох сынов и штыри дочкы. Выховали их на честь и славу людям, а собі на потіху. Отже и я была запрошена на тото двойне юбилейне торжество. Их діти послали мі запрошение. То было назначено на неділю, так я скоро коло обіду пораюсь, штобы быти там на час, а тут моя знакома кличе мене на телефон:

— А ты запрошена на гостину и знашь, же нашы дорогы краяне Підбережнякы справляют “добел вединг” двойне весіля?

Я кажу, што я тоже запрошена и знам, же то буде “добел ведиінг”.

— Но то добри, — каже знакома, — підеме перше до церкви.

В церкви священник помолился за их здоровье и пожелал обом парам юбилянтов счестья, здоровья на многая літа. Просто из церкви идеме на галю. На галі уж больше гостей чекают. Столы были прикрашены и накрыты всякыми стравами и напитками. Розмаитого кольору ружы были на столах, бо то пришло в таку пору року, коли найкрасшы ружы цвитут на огородах.

За первым столом, найкрасше приоздобленным, сідают нашы молодята. На том столі были два великы “вединг-кейкы” — один прикрашеный золотым кольором, а другий срибным.

Нашы молодята были дуже веселы, што дочекалися счастливо такого фамелийного торжества, яке рідко быват у людей. Так само их діти были дуже веселы, што они могли таку велику гостину устроити своим родичам, а то ище — двойне юбилейне весіля.

Было много гостей не лем из Ансонии и близкой околицы, но также из дальшых місцевостей. Я тут вспомну лем пару из них. Была сестра юбилянткы Лукия из Мериленд, Фешы из Юнкерс и другы. Были дружба и дружка с первого весіля Иван Мадзик и Катерина Шкурат. Старостом на юбиленйом весілю был наш старый емигрант и краян Матвий Студант.

Напишу так накоротко и за юбилейну гостину. Староста встал и попросил гостей встати и змовити “Отче наш”. Потом сказал пару слов до молодой пары и пожелал им всякого добра и счастжья, штобы прожили ище при добром здоровью много літ.

Юбилей справляли діти, то было на гостині больше молодшых, як старшых людей. Тато и мама знали за всьо наперед, бо им діти сказали, што буде. Не хотіли робити несподіванку, бо часом быває и так, што старшы юбилянты при такых несподіванках, єсли не знают ничого наперед, дуже нервуются и можут похворітися.

Бесідников тут такых не было, бо было больше молодых, як старых. Але зато всі весело забавилися. Скоро пришли и музыканты, то молоды пошли на верхню галю танцувати, а старшы осталися за столами істи, пити и співати. Тут зараз и балец ділят, один и другий (то-єсть “ведингкейк) и дают по великом кавалку всім гостям, бо было из чого.

Молодшы молодята, што мали лем 25-рочный юбилей, пошли на верхню галю гуляти, а нашы стары молодята, Подбережнякы, ходили коло гостей и дякували каждому, же потрудилися придти на их гостину. Были дуже веселы, но можна было слезы в их очах видіти — слезы радости, же дожили разом до золотого весіля.

Я им жичу из глубины мого сердца, абы жили ище много літ и здоровы были, бо то суть добры и розумны люде. Они читают нашу газету и суть членами нашого Лемко-Союза. Так само, коли бы сте до них ни зашли на даяку забаву просити, або на даяку потребу коллектовати, они вам николи не откажут. Завсе ишли и идут меже людей. Такым людям належится честь и слава. Але, на жаль, мушу сказати, же мы тут такых краянов мало маме.

От родины и гостей были переданы юбилянтам прекрасны презенты и букеты цвітов. Обоє Подбережнякы, а так само их донька с мужом С. Глюз высказали сердечну подяку за оказанну им любовь и честь.

Тота юбилейна гостина останеся надолго в памяти у всіх нас, котры сме были там присутны.


Мария Варецка,
Шелтон, Конн.



[BACK]