С Окружного С’ізда I Округа Лемко-Союза

В неділю 12 декабря 1954 отбылся в городі Пассайку, Н. Дж., рочный съізд Первого округа Лемко-Союза. Съізд был дуже успішный, делегатов и гостей было майже так, як и на головном съізді, то мы взяли и фотографию, котру тут поміщаме.


Гостина послі законченна рочного окружного съізда І Округа Л. С.
12 декабря 1954 года в Пассайку, Н. Дж.


Съізд начался о год. 3 пополудни. Организатор Первого округа брат Петро Гузлей сказал вступне слово и поздравил делегатов и гостей, што так численно собралися на окружный съізд нашой народной организации. Притом он попросил выбрати предсідателя перепровадити рочный митинг. На тоту должность был выбраный єдиноголосно делегат Иван Малютич из Юнкерс, Н. Й.

Предсідатель И. Малютич поблагодарил делегатов и попросил окружного организатора дати справоздание из діятельности окружного комитета за 1954 год.

Организатор П. Гузлей дал добре и интересне справоздание. Сказал, што за минувший год йому было дуже приятно робити в организации, бо всі, як урядникы так и члены по отділах Первого округа, працували в згоді и выполняли честно свои обовязкы. Притом он докладал к своим словам замічания юмористичного характера, чым приводил всіх до веселости и сміху. Так справоздание окружного организатора было одобрено и принято под громкы аплодисменты цілого съізда.

Дальше дали свои справоздация рекордовый секретарь Первого округа брат Йосиф Фрицкий и кассир брат Йосиф Ядловский. Они прочитали доходы и росходы в кассі Первого округа. Показалося, што окружна касса стоит добре, бо отділы уплатили свои рочны взносы и был красивый доход на окружном предприятии. Член Контрольной Комиссии Михаил Фецюх подтвердил, што книга и касса Первого округа находятся в полном порядку.

Послі докладов окружных урядников предсідатель кликал делегатов от отділов, штобы они дали свои справоздания. Каждый делегат объяснил, што было зроблено в його отділі за минувший год.

Предсідатель попросил делегатов, ци суть согласны с докладами, якы выслухали, и ци принимают справоздания окружных урядников. Всі делегаты єдиногласно приняли справоздания и высказали благодарность урядникам за их честну роботу.

Дальше был выбор окружного комитета на 1955 год. Делегаты дали предложение, штобы старый уряд был преизбраный єдиногласно на слідующий год. То было принято єдинодушно цілым съіздом.

Окружный организатор брат П. Гузлей дал вопрос делегатам, скилько желают пожертвовати из окружной кассы на Пресс-Фонд нашой газеты “Карпатской Руси”. Было предложено и одобрено, штобы дати $150.00.

Было принято предложение, штобы в 1955 року устроити одно велике окружне предприятие в Карпаторусском Ам. Центрі в Юнкерс, Н. Й., для усиления окружной кассы.

Дальше были предложения, штобы за старанием отділов основати окружный театральный кружок, який мог бы выступати с представлениями во всіх місцевостях нашого І Округа. Один делегат указал на то, што по нашых приходах русскы школы поумирали, хоры похоронены, а за театральны кружкы ніт што и говорити, бо наше молоде поколінне не воспитане в русском духі. Так теперь то зависит от нашой организации Л. С., штобы створити театральный кружок для цілого округа и давати представления на нашом народном языку.

Засідание закончилось о год. 5 послі обіда. Зараз послі засідания началось угощение, яке приготовили пассайкскы отділы Л. С. для делегатов и гостей. То не была звичайна маленька перекуска, а настоящий банкет. Были поданы на столы печены куры, домовой роботы колбасы, пирожкы, салаты, домовый хліб, разного рода торты и всякы напиткы. Брат П. Гузлей призвал всіх присутных заняти місця при столах, а так попросил брата С. Гальковича за тост-мастра. Тостмастер поблагодарил за оказанну йому честь, а так выразил подяку женам, котры приготовили такий хороший обід. Всьо ідло было приготовлено в домі наш ой членкини М. Брунда, бо у ней єсть отдільна отповідна кухня. А кухарки были: М. Брунда и Юст. Халупий, и єй дочь А. Скатий привозила все своим автомобилем. Брат С. Галькович поблагодарил и жены, котры услуговали при столах.

Послі угощения тостмастер попросил до слова предсідателя мужского отділа ч. 16 в Пассайку. Председатель Григорий Кузмич поблагодарил всіх делегатов и гостей, што пришли на окружный съізд, и сказал коротке слово в справі организации. Дальше были кликаны до бесіды делегаты и гости: М. Білый, Он. Юнак, 3. Мерена, В. Чичко, С. Бобак, А. Карый, М. Бак, головна містопредсідателька Л. С. Татьяна Лось, Евгения Крутила, М. Брунда и Юст. Халупий.

Окружный организатор попросил слова и призвал гостей сділати сбор на оплату так доброго обіда, якого он ани не сподівался. Теодор Рудавский и Параска Ярош занялися сбором, котрый дал $65.00. Тота сумма была передана кассиру отділа Л. С. в Пассайку 3. Мерена. Тут член Пассайкского отділа Н. Гойдич попросил слова и объяснил, што нашы отділы все платят за угощение на окружных съіздах, а сбор от делегатов и гостей иде на Пресс-Фонд “К. Руси”. Так он предложил, штобы и теперь зробити то само. Делегаты и урядникы Пассайкского отділа одобрили предложение.

Тут треба замітити, што Н. Гойдич належит до передовых и найбольше активных членов нашого отділа Л. С. в Пассайку. За його старанием в нашом отділі был организованый театральный кружок, котрый выступал с представлениями не тилько у нас, но и для другых отділов нашого Первого округа. Через несогласие наш кружок потом розышолся, бо як часто быват меже нашым народом, тот человік, котрый найбольше трудится, найменьше кредиту получит, а до того ище непотребну критику мусит переносити. Таке отношение отбиват часто у людей охоту до роботы, а то приносит шкоду организации, яка бы она ни была.

Послідным оратором на гостині был редактор “К. Руси” д-р С. Пыж. Он найперше привитал делегатов и гостей, дал признак тельность нашым пассайкскым отділам, а так звернул увагу на политичну ситуацию в нашой крайні. Говорил, меже иншым, што тут в Америкі люде дуже перестрашены, боятся высказати открыто свои думкы. То видиме не тилько меже нашыми русскыми людьми, но и меже американцами, котры тут рождены. Молоды студенты по университетах и калледжах боятся выступати в дебатах, штобы не стягнути на себе обвинений в нелояльности и преследований. Однако в послідных часах и тут ситуация начинат мінятися. Тот, котрый найбольше страшил американску публику, теперь сам перестрашеный. Он робил росслідования против другых, а теперь то обернули против него и обвиняют го, што он сам подрывник, бо подрыват американску демократию.

Но видно, сказал дальше редактор “К. Руси”, што члены нашой организации и читатели нашой газеты перетримали тоты страхы дуже стойко. За минувшы три рокы найбольшых страхов в Америкі мы утратили лем около 10 предплатников на нашу народну газету, котры отказались получати єй, же то русска газета, и то переважно по причині дорослых дітей. То рожденны тут діти нашых емигрантов набрали найбольшого страху, же як они або их родиче будут читати русску газету, то всі будут объявлены “коммунистами”. Ище лучше свідоцтво дає тот факт, што за минувший год наша газета получила поверх 200 новых предплатников.

Особенно в Пассайку нашы люде трималися крепко. В 1953 року, коли найбольше шаліла нагонка на прогрессивны организации, в Пассайку сділали таку красну роботу, якой не доконал николи в истории Л. С. ани один отділ. В кампании Пресс-Фонда Пассайк собрал свыше $600.00. И сегодня показалось тут, што Пассайк иде впереди.

“Я бы желал, — сказал редактор д-р С. Пыж, — штобы всяди по отділах нашы члены трудилися так успішно, як в Пассайку.”

За свою бесіду редактор получил ентузиастичне рукоплескание от делегатов и гостей. Предсідатель С. Галькович поблагодарил д-ра С. Пыжа за хорошу речь и просил всіх присутных заспівати “Многая літа” делегатам, гостям, а также и кухаркам, котры приготовили и подали таку добру гостину.

При конці банкета была снята фотография, котру тут поміщаме.


С. Галькович.



[BACK]