Музыкальный Кружок Пионеров в Ниж. Комарнику, Окр. Свидник

Як іхати дорогом из Дукли к польско-чехословацкой границі, то послідным селом по польской стороні єсть Барвінок, а первым по чехословацкой стороні — Вышний Комарник. Дальше в долині меже горами лежит Нижний Комарник.

В минувшу войну тут за два місяцы стоял фронт. Смерть неустанно заберала свои жертвы. Люде не хотіли оставити свою родну землю, то жили в землянках, в бункерах, под мостами. Терпіли голод и холод, но сиділи и ждали освобождения. Многы из них погибли, но остальны ждали и дождались, што совітскы войска розбили германскы укріпления и прогнали німцев на запад.

По войні в село пришла нова жизнь. На місце розбитых хиж были поставлены новы муруваны домы. Ище пару літ, и воєнны раны были залічены. Ныні, як идешь селом, то майже от каждого дому почуєшь веселость — спів и музыку. То грают в домах и коло домов діти тых родичов, котры пережили счастливо войну. Придешь ближе к ним — то 6-рочны, 7-рочны дівчата и хлопцы грают на гушлях, и грают из нот. Они упражняются в грі, бо всі они належат до музыкального кружка пионеров, котрый приготовляє программу для концерта в сусідном селі — Крайна Поляна. Кружок выступал уж и по радио.

Дітскы гушли для членов кружка в Н. Комарнику прислали ученикы Народной школы в Лесткові, на Чехах.

Учитель Юрий Млинарич в Н. Комарнику прислал для нашого Календаря два фотосеимкы, котры тут поміщаме: 1) Музыкальный кружок пионеров в Н. Комарнику под Дукльом и 2) Будинок Русской гимназии в Свиднику (На той фотографии показаный и будинок римско-католицкой церкви в Свиднику).


MusicClass
Музыкальный кружок пионеров в Ниж. Комарнику,
округ Свидник, на Пряшевщині.


На фотографии музыкального кружка показаны:

Вархолик Милян, Сичак Василь, Хохоляк Петр, Сичакова Анна, Сейканич Василь, Юрчишинова Мария, Янек Петр, Чайник Петр, Радомска Мария, Сичакова Мария, Янек Василь, Янек Иван, Лезлерова Мария, Сургент Иван, Млинарич Йосиф, Радомский Василь, Кордош Иван, Стефанко Василь, Юрчишин Василь, Шутакова Анна, Сичак Петр, Хохоляк Стефан.

Учитель Юрий Млинарич в письмі в Редакцию нашой газеты “К. Русь” просит прислати йому народны співанкы и театральны штукы, изданны Лемко-Союзом в Америкі. Он пише так:

“Буду вам очень благодарен, если мі перешлете “Лемковске весіля” и “Лемковскы співанкы”, а тоже и другы пісни народны с нотами, котры были напечатаны для вашой библиотекы. Перешлите и больше театральных пьес. Некоторы мы уже в нашом селі играли, и всегда мают великий успіх.”

Из того же села Н. Комарника было получено нами письмо от одного члена Музыкального кружка— Василя Радомского. Он просит прислати йому нашы Календари Л. С. и книжечкы с театральными представлениями. Пише так:

“Я ходжу до 2-ой мещанкы до Крайной Поляны. В Нижньом Комарнику всі діти от 6 роков учимеся грати на гушлях. Уж знаме грати народны пісни с нот.

“Красно дякую за присланный Календарь на 1955. Минувшого року послала мі Календарь моя тета, и мал єм с того велику радость, бо мал єм што читати. Перечитал єм го веце разы. Барз красне читанье в нем, може ся человік дознати, як нашы люде из старого краю жиют в далеком світі за морем.”


Gymnasium
Будинок Русской Гимназии в Свиднику, на Пряшевщині
(направо от римо-католицкого костела).




[BACK]