Старый фермер, што жиє коло канадской границы, заробил в часах прогибиции 50 долларов легкым способом.

Одного дня пришли к нему два бутлегеры, што перевозили нелегально горілку из Канады, и кажут:

Заплатиме тобі 50 долларов за уживанье твойой стодолы на одинь день.

— Та нашто она вам придается на один день? — спросил фармер.

— Мы хочеме перетримати в ней ладунок горілкы, яку перевеземе в ночи из Канады.

Фармер згодился, але потом роздумал, же може сам достатися до біды, то повідомил пограничну сторожу. Пограничникы стерегли стодолу два дни и дві ночы, но бутлегеры с горілком не пришли.

О пару дней пришли бутлегеры до фармера и заплатили рент за стодолу, як было условлено.

— Но вы не уживали мойой стодолы! — удивился фармер.

— Мы єй уживали, — пояснили бутлегеры. — В тот час, як пограничникы стерегли вашу стодолу, мы в иншом місци перевезли через границу 4 бочкы горілкы.

Протестантский священник приіхал оглянути одну тюрьму, бо чул, што там мают добрый хор из арестантов. Послухавши хору, священник спросил надзирателя тюрьмы:

— Такы славны співакы в том хорі, то мі дивно, ци дакотрый из них не співал даколи в церковном хорі.

— Майже всі они попередно співали в церковных хорах, — отвітил надзиратель тюрьмы.

Один хлопец нюс гросерию зо штору, а же дождь начал падати, то хлопец просил Бога:

— Боже, поможь мі скоро долетіти додому, штобы мука и цукер мі не промокли.

И прилетіл счастливо, але на порогі у себе дома упал. Тут он сказал на Бога:

— Не мусить мя аж дрыляти.

Молодый емигрант приіхал зо старого краю к свому стрыкови в Америкі. Перше, што зауважил, то было, же всі люде говорят дуже голосно, так спросился:

— Стрыку, чого вы так голосно кричите, як говорите? И другы люде ту в Америкі так голосно говорят...

— Жебы показати, што мы американе и никого не боимеся.

— А як дакому не любится, жебы в бесіді до него так голосно кричали? — допытувался молодый емигрант.

— То крикне: “Шарап!” — по нашому то значит: Стуль пыск.

— А тогды што?

— Тогды треба быти “шарап”.