Народна Культура в Чужині — Николай Цисляк

В многочисленных бесідах с нашыми славянами в Америкі, а в том числі и с нашыми лемками, часто чуєме утвердительне слово, што богатство Америкы было сбудувано нашыми руками. Все, коли призерамеся на богатство и достижения нашого прибранного краю Америкы, видиме в них жилисты рукы и крепкы плечы нашых емигрантов-пионеров, из котрых многы уж одышли от нас навікы, другы доживают старость, а решта все ище не отрывают своих рук от найтяжшых робот, до якых они за долге своє житья привыкли. Мы просто не можеме указати такых шахт, фабрик, будов, дорог и другых предприятий всякого рода, где бы не были приміненны мозолисты рукы нашых лемков, дуже часто при трудных условиях роботы и житья. На том вопросі никто не стане сперечатися, бо признательность в том даєся при всякых оказиях высокыми достойниками нашого краю и представителями индустрии, финансовыми людьми и политичными діятелями, котры все были заинтересованы робочыми руками, честным и терпеливым трудом.

Але разом с тым признанием и похвалом, они доказуют, што за тоты труды мы были належито отплачены, бо мы при той роботі нашли своє житья, поправили своє положение под многыми взглядами, и в гдеякых случаях доробилися значных маєтков, найбольше модерных в світі домов, котры будуєме або міняме собі до свого выбору, по пару автомобилей в каждой родині, автоматичных холодильников, огрівателей, пецов, пралень, телевизии, телефона и радия, и всякых удобств, о котрых нашым предкам ани не снилось. Той правды так само мы с нашой стороны неможеме опровергнути, и вызерат так, же в вопросі тых кредитов мы сме выровнаны. Дискуссию над тыми вопросами далеко не поведете, бо она може тягнутися в одном кругу без конца.

В рамкы нашого житья, кромі труда и доробков, появилася наша молодежь, котра выходит на передный план, оставляючи початкы нашой истории в далекых тінях. Наша лемковска молодежь мала можность покончити высшы школы, и яко така позанимала высокы позиции во всіх галузях американского житья.


Wedding
“Лемковске Весіля на американской сцені в Кливланд, О. — Участникы “Лемковского Весіля” на Междунациональном фестивалі в “Поблик Аудиториум” 30 января 1955.

Глубоко в нашых чувствах мы все плекали надію, што молодежь, коли получит школу, оцінит нашы тяжкы труды и стане достойным наслідником славных традиций родного нам краю, котрый навсе останеся близкым нашому сердцу, што буде любити и гордитися перед другыми народами Америкы культуром своих предков, котром мы, заняты тяжком роботом, не могли похвалитися. В сознании свойом одны яснійше, другы слабше, но всі мы представляли собі, што молодеж наша переймеся духом нашым, задержит родинне почутье до родимого краю своих предков, изучит наш язык, котрым мож поширити порозуміние меже народами, згоду и счастливе житья на будучность.

Тоты надіи на нашу молодежь мы задержали и тогды, коли она выросла и одышла от нас. Часто быват, што она ганьбится признати, якой она народности, коли ся єй пытают, бо в особі свого родителя она видит лем человіка в рабочой униформі. Совсім противоположна история вышла бы, єсли бы мы нашу молодежь познакомили ближе с прекрасными традициями нашого краю. Она полюбила бы тоты обычаи, интересовала бы ся ними, розвивала их дальше и с гордостьом представляла бы их перед американскым народом.

Гдеси давнійше тут в Америкі организовали для русской молодежи православны “Русскы Клубы”. Пионеры клубов напевно мали надію, што молодежь в тых клубах буде проводити не лем культурну роботу, но и стане передовым авангардом в поширении свого русского языка меже американцами для лучшого порозуміния и дружбы меже русскым и американскым народами. Но результат той их діятельяости покажеся каждому дивный с слідующого приміра. В осени 1955 року у нас в Кливлацді отбывалася конвенция як раз той упомянутой организации. В числі около 500 делегатов напевно 400 было дітей нашого лемковского роду. Меже тыми делегатами было и пару делегатов-дітей членов нашой организации Лемко-Союза. Тых кілька делегатов не лем заходили в Лемковский Дом, но и держали постоянно телефонну связь. Через тоту связь я был близко информованый о ході конвенции. Найважнійшом точком, над котром молоды делегаты стратили найбольше часу, было то, штобы богослужения в русскых церквах як найскоре перевести на английский язык. Согласно тому составили резолюцию и теперь, коли они вернутся до своих приходов, будут приперати на своих священников, штобы им больше по-русски не служили. Діти, котрых ділом было стати на переді в обороні русского языка в Америкі, стали гором, штобы як найскоре його замулити. Подобне рішение не вынесла бы молодежь ниякой другой народности по отношению к родному языку своих родителей. Зробили они то в той надіи, што таке рішение дуже сподабатся американцам, и всі они станут хвалити тоту резолюцию. Но правдивы американцы, воспитанны в духу демократии, познали, што така резолюция не вызерат нормально, лем “фони”, то ани словом не упомнули о резолюциях конвенции в своих американскых газетах.

DramaClub
Лемковский драмкружок в Кливланд, О. — Молодята в представлении “Лемковске Весіля”: Иван Владыка и Розалия Ньюман (Ткач).

Як раз в противовіс діятельности такой великой организации показалася ситуация с місцевым отділом Лемко-Союза в Кливланді, отколи он начал проводити свою культурно-просвітительну программу. О штоденной культурной роботі нашого драм-кружка кливландска пресса вспоминат час до часу круглый рок, и вспоминат с похвалом. Висвітлюючи культурны стороны нашой истории лем за послідных пару роков мы так глубоко зарекордовали в кливландской печати нашу діятельность, што нашы лемковскы потомкы, котры останутся в том городі, будут находити воодушевление и гордость за свой родный край и будут розвивати то дальше и тянутися к культурной связи с народом отчизны своих родителей. Они будут гордитися, што их предкы не пришли в Америку лем с мозолистыми руками, но, кромі того, принесли зо собом прекрасны культурны традиции и включили их в обогащение американской культуры. Лем за послідный рок діятельность нашого драм-кружка выразилась в ділом ряді предприятий.

19 февраля, на сцені свого Лемковского. Народного Дома, была поставлена драма из штоденного житья лемковского народа, переплетена с рождественскыми обычаями, под назвом “Вертеп в Карпатах”. Автором того представления являєся передовый наш писатель и философ Иван Русенко, Тота драма не лем же красиво написана, но выведенны в ней характеры живо напоминают собом переживания нашого народа на родной землі. С нашой стороны акторы так душевно были подобраны к своим ролям, што за каждым своим появлением на сцені вызывали удивление публикы. Співы, музыка, мелодии, сценерия, освіщение и прекрасны лемковскы костюмы повліяли на публику с таком силом, што до днес публика просит повторения того представления на слідуючий рок.


OnScene
“Лемковске Весіля” на сцені в Поблик Аудиториум в Кливланді 30-го января 1955 року: Обертаный танец по зачепинах. (Снято с поза кулисы. Переробка с колоровой фотографии “Кливленд Прессы”)

Слідуючым предприятием был междунациональный фестиваль, котрый отбыватся тут што-рочно, 29 января 1955. То была наша третья участь в нем, и тым разом мы поставили никым неперевершенне Лемковске Весіля с його прекрасными обычаями, глубоко трогательными співами, музыком, веселыми танцами и пестрыми весільными уборами. Як в попередных фестивалях, так и теперь публика в найріжнійшых формах оказувала свою похвалу лемкам.

Sophia Chislak, Rosilyn Trolika
Лемковский драмкружок в Кливланд, О. — Дівчата София Цисляк и Рослин Тролика в лемковском народном крою у головного входа Кливландской Художественной Галлереи 24 июня 1955, вдень перед их выступлением в “Лемковском Весілю” (Фот. газеты “Кливланд Ньюз”).

А уж найвысшой славы мы достигли на выступлении с тым самым Лемковскым Весільом перед фасадами Кливландской Художественной Галлереи, на єй дводневных торжествах, 19 июня, на так званной Средне-европейской Выставі. На полях при здании Галлереи, в часі нашого выступления находилося поверх 10 тысяч народа. Акт наш был освіченый не лем прожекторами, но и урывистыми лучами заходящого солнца. Звукы співу и музыкы розносилися громкоглашателями по далекых просторах вокруг здания Галлереи. Публика одобрила то выступление солидным и продолжительным апплодисментом.

О всіх тых выступлениях было отмічено в свойом часі в кливландской печати. Репортеры ріжных газет брали интервью с руководителями кружка и то всьо клали в рекорды. На початку року тут была напечатана книжка Указатель Национальностей Кливлацда, в котром отмічены наш Народный Дом и нашы лемковскы отділы со своими урядниками. Не было бы той нашой діятельности, хоц як она скромна в поровнанию с великыми национальными группами, то и наше имя яко культурного народа, никто бы не упомнул.

То была діятельность наша лем на протягу одного року, а результаты не лем теперь, але и на далеку будучность можут быти дуже великы.

Оглянувшися на культурны предприятия нашого кружка за минувший рок, мы припоминаме заявление предсідателя междунациональных фестивалей Теодора Андрейки на справоздавочном засідании представителей всіх национальностей: “Я особливо радуюся успішному выступлению лемков длятого, штобы большым национальным в группам показати примір, што може довершити мала, але добре организованна, народна группа”. То заявление вспоминаме все, коли говориме за отділы Лемко-Союза в другых місцевостях, котры суть в стані, або мают в свойом посідании свои народны домы: єсли бы они у себе поставили культурну роботу на первый план, то выконали бы велиде діло и досягли бы красных результатов. О них и их ділах похвально выражались бы и чужы люде, а нашы потомкы нашли бы в том свою розраду. Така робота поднесла бы престиж нашого народа дуже высоко не лем меже политиканами. Хоц днешный світ числится головно с финансовым станом организации, но суть люде, котры ище выше числятся с єй культурным богатством.

Hideout
Дзяд и його проводник под фигуром: Сцена из представления “Вертеп в Карпатах” 19 февраля 1955, в Лемковском Народном Домі в Кливлэнд, О.

Сознательны члены и патриоты свойой организации, а особенно тоты, котры приймут на себе отвічательность урядника отділа, должны звертати головну увагу на культурне розвитие в своих отділах. Розумієся, трудно у нас найти людей до такой, роботы, а трудно длятого, што не знаме оцінити тых людей и не хочеме помочи им в том, штобы они могли всі свои знания и час отдати культурному розвитию отділа. Такы люде, хоц они и у нас суть, глядаючи куска хліба, отходят от нас и идут проводити культурну роботу к другым народностям и организациям, не раз ворожым нашому существованию. В місцевостях, где уж организация наша достигне маєтку и начне розвиватися культурно, часто найдеся даякий урядник, котрый має свои личны амбиции и планы корыстати из народного маєтку и все гамує народну діятельность, для котряой наша организация была основана. А коли такий урядник видит, што лично йому не даєся корыстати, то пробує вгніздити на роботу даяку свою близку родину, або приятелей, и добьеся для них всякых привилегий коштом народного майна и тым застановлят успішне розвитие организации, бо подрыват довірие в справедливость у тых всіх, кто идейно желат помочи организации. Урядникы отділов должны памятати, што Лемко-Союз єсть культурно-просвітительна организация на первом місци, так як то на первом місци указано в уставі Лемко-Союза. Урядник, котрый того не порозуміє, може завести в отділі не справедливость ани не прогресс, лем балаган и беспорядок.

Мы в Кливланді будеме добиватися дальшого прогресса в культурном розвитии, без огляду на перешкоды, бо твердо віриме, што культурне розвитие на чужині, то наша народна кріпость, в котрой так наша старша емиграция, як и нашы американскы потомкы найдут своє удовольствие и честь и задержат связь с родным крайом для лучшого и счастлиншого житья.


Николай Цисляк.



[BACK]