В місяці и юні 1955 р. мы получили письмо из Финикс, Ариз., адресованне головным урядникам Л. С. Письмо было от Марии Бурак и Євы Чернецкой. Они просили нас взяти под увагу и Аризону, коли будеме глядати подходящого місця на нашу Народну Фарму.

Мария Бурак и Єва Чернецка суть знаны широкым кругам нашого народа як передовы и активны членкини. Они розглядалися там коло Финикс, где суть на продаж фармы и домы, и нашли одно місце, котре показалось им найбольше подходящым. Но сами они не хотіли брати на себе полной отвічательности и рекомендовали покупку той фармы, лем просили, штобы дакто из головного правления Л. С. приіхал на місце, оглянул и обсудил с ними, што можна зробити. Они наперед писали, што там можна устроити лем филию Народной Фармы, таке отділение для старшых людей, котрым потребно лічение в теплом и сухом климаті.

На митингу головных урядников Л. С. 3 июля с. р. было рішено, што мы, нижеподписанны, должны поіхати туда и оглянути. Так 12 июля мы выбралися в дорогу — автомобилем. Нам взяло 5 дней, штобы достатися до Финикс, Аризоны. Мы іхали лем дньом и проіхали близко 3,000 миль.

В Финикс Мария Бурак и Єва Чернецка взяли нас показати нам тото місце. Там єсть 40 акров земли с одным большым будинком и 12 маленькыми домиками — “бонгало” коло головного будинку. Мы провірили, який доход можна полупити из того и якы росходы будут связаны с удержанием того місця.

Перед домом краянов Дмитриков в Финикс, Аризона. (Сліва направо): Захарий Мерена, Марта Кода, Мария Бурак, Юлия Дмитрик, Дмитрий Дмитрик.

Мы оглянули также инше місце в той самой околиці — 10 акров с двома будинками и приблизительно 400 деревцями “грейпфрута”.

Оглянувши тоты місця, мы обсудили всякого рода проблемы, якы могли бы возникнути при управлении такым маєтком. Єва Чернецка и Мария Бурак говорили нам, штобы мы сами собрали всі потребны информации и так предложили всьо в порядку на новом засідании гол. правления Л. С. Они просили также написати в газеті, як нам выглядат житье в Аризоні, штобы читатели в восточных частях США и члены фармы мали ясне представление.

Такий доклад мы дали на засідании гол. правления Лемко-Союза в неділю 28 августа, и было рішено не братися до покупкы теперь, лем почекати до декабря місяца, коли члены фармы соберутся на свой первый митинг. До того часу можна буде выяснити лучше, скилько меже нашими членами и читателями єсть такых, котры мали бы желание переселитися в Аризону, и скилько нашых людей в самом Финикс, Аризона, проявит настилько заинтересования такым домом, што станут членами фармерской организации и найдут меже собом людей до управления маєтком организации.

Встріча в Финикс, Ариз. (Сліва направо): Анна Чачо, Єва Чернецка, Мария Бурак и Захарий Мерена.

В короткости можна сказати, што то єсть лем початок роботы. Мы собрали информации, якы будут потребны нам при рішении той справы.

В Финикс мы посітили также Дмитриков, котры переселились из Кливланд, Огайо, для улучшения свого здоровья. Дмитрий Дмитрик чувствуєся теперь лучше, а то завдячує сухому климату в Аризоні. Юлия Дмитрии высказала таку думку, што в Финикс єсть за мало нашых людей для такой роботы, як покупка свого народного дома, а и тоты, што суть, то переважно больны и слабы, и не можут ничого дуже зробити. Она думат, што свой народный маєток треба купувати там, где єсть головна масса нашого народа. Но из того, як гостеприимно она встрітила нас в свойом домі, мы виділи, што она интересуєся народным ділом и справом нашой фармы и была бы готова помочи всіми силами, єсли бы всетаки было рішено мати отділение фармы в Аризоні.

Нам выглядало, што никто из тых людей, якых мы встрітили в Финикс, не приіхал в Аризону тому, же любит там жити. Они смотрят на Аризону, як хворый человік смотрит на лікарство: хоц не любит го, але принимат ради здоровья. Он надієся, што лікарство освободит го от хвороты.

Єва Чернецка приіхала в Аризону из Монтаны пару літ тому назад, бо для єй здоровья треба было сухого климату. Но она не любит там жити, и охотно вернулась бы в Монтану. То полна житья, весела и приємна женщина, хоц єй перешло за 70 літ. Коли ище жил єй муж, они мали фарму для выпасу худобы в штаті Монтана. По смерти мужа она сама тримала тоту фарму. Но одного року саранча выіла траву на єй фармі, то треба было продати статок, бо не было корму для него. Потом она купила готель в Монтана и вышла на том дуже добре. Она все хвалит Монтану. Там гориста земля с лісами. И воды полно. В літі там тепло, а в зимі правдива зима. За то єй тяжко привыкати до каменистых, голых, пісчаных гор Аризоны, на котрых ніт дерев, лем колючы кактусы. Єсли бы астма не примушала єй жити в Аризоні, она кинула бы тоты місця. Но то добросердечна лейди, и говорит, што хотіла бы помочи и другым нашым людям, котрых обставины примусят жити в Аризоні.

Мария Бурак так само сказала нам, што сухий климат Аризоны дал єй облегчение в ревматизмі. Теперь она не чувствує тых болей, от якых страдала, коли жила в Юнкерс. В Аризоні ніт правдивой зимы, то ревматичны боли не докучают людям. Буракы выховали семеро дітей, то знают, што значит трудитися в поті чола. Мария Бурак признала, што Аризона потребна лем старшым людям, для здоровья, но она так само єсть готова отдати всі свои силы, штобы помочи в том ділі, єсли лем найдеся дост значне число людей, котры дадут знати, што наміряют переіхати в Аризону и хотят стати членами Фармы.

Краєвид в Аризоні. — На одной из фарм коло Финикс, Ариз. На фотографии (сліва направо): Марта Кода, Захарий Мерена, Мария Бурак, Єва Чернецка.

Вот так представляєся тота справа дотычно покупки филии нашой народной фармы в Аризоні. Мы дуже задоволены, што мы могли оглянути на місци тоты місця в Аризоні и привезти информации нашому головному правлению Л. С. И мы дуже вдячны Марии Бурак, Єві Чернецкой и Юлии Дмитрик, што нас красно встрітили и объяснили нам положение в Аризоні.