Отділ Лемко-Союза ч. 29 в Ансонии, Конн.

Отділ Л. С. ч. 29 был основаный у нас в январі місяці 1932 года благодаря Макарию Геряку, Теодору Гончарику и Антонию Цисляку из Стемфорд, Конн. Они зарентували галю на віче и запросили Д. Вислоцкого, редактора газеты “Лемко” из Кливланд, О., як головного бесідника.

Первыми урядниками отділа были: Т. Барановский — предсідатель, В. Павляк секретарь, П. Павчик — кассир.

В 1936 року была куплена галя с будинками. Благодаря членам, котры потрудилися при поправкі, галя того самого року 13 октября была открыта для публикы. Коли брат Т. Гончарик из Стемфорд пришол на галю, то сказал:

— Николи я не думал, што вы из такой старой кучы зробите таку красну галю...

Всьо членство радувалося, што мы маме свою галю, то нам не треба буде просити никого, штобы нам дал ключы на галю, коли хочеме мати собрание або забаву.

В 1948 року клуб оказался за малый для нашого членства, бо тилько одна комната была. Так само на галі не было добре устроєной кухни. За то было рішено росширити. Мы прибудували одну комнату на переді и также прибудували порядно устроєнну кухню на галі. Делегаты Л. С. мали случайность всьо видіти, коли был головний съізд Л. С. в Ансонии в 1948 року.


Ansonia
Праздник Дня Матери в галі Лемковского Народного Дома
в Ансонии, Конн., в 1955 году.


Урядниками в нашом отділі были: Павел Павчик (ныні покойный — вічна йому память!), Д. Бадяк, Йосиф Сосенко и його жена Акиля Сосенко, Анна Демчар, Симеон Коско (уже покойный— вічна йому память!), Тимко Косар, Стефан Кузяк и Григорий Кузяк, Матвий Студент, Стефан Попивчак, Григорий Кунцик, Андрей Кунцик, Дмитрий Вархолик, Василий Подбережняк, Иван Магала, Андрей Барановский и його брат Иван Барановский (оба уж покойникы — вічна им память!), Аким Семаненко, Йосиф Ванига, Алексей Голда, Прокоп Опікун, Мария Клапик, Иван Семеницкий, Михаил Собин, Андрей Гудак, Михаил Свянтко, Петро Сокол.

В нашых домах, котры належат до организации, жило 11 фамелий. Всьо чисте от долгу.

Так всі краяне, котры приходите до Ансонии, можете все зайти до нашого Клуба, где встрітите друзей и знакомых. Адрес Клуба: 109 Брод стрит, Ансония, Конн.

А тут ище имена меваджеров нашого Клуба за перешлы 23 рокы.

1-ым менаджером в Клубі был Андрей Гудак, 2-ым Даниил Сенкович, 3-ьим Алексей Кузяк, 4-ым Тимко Косар, 5-ым Симеон Коско (то єсть другий Коско, котрый упокоился в 1946 року — вічна йому память!), 6-ым Теодор Барановский, 7-ым Йосиф Сим, а теперішный менаджер Аким Семаненко.

От имени нашых членов и членкинь ч. 29 Л. С. в Ансонии пересыламе сердечны поздравления и найлучшы пожелания на 1956 год всім членам Л. С. и всім краянам в США, в Канаді и в старом краю.


Петр Сокол.



[BACK]