Короткий Очерк Нашой Народной Жизни в Торонто, Онт.

Ровночасно с основанием отділа Лемко-Союза в Торонто, в 1930 року, возник и драм-кружок под руководством Владимира Цисляка и суфлера Григория Кузмича, котрый теперь живе в США.

Тяжкы то были часы. Не было ани свого приміщения, люде не робили, то хотя и отогралося яке представление, приход был маленький, бо из 5-центовой коллекты при дверях трудно было не раз оплатити галю и покрыты росходы представления. И хотя не было у нас людей фаховых, то охотников было много, бо майже всі были без роботы, и часу у них было дост — всі бралися до роботы щиро и охочо.


GirlsChoir
Дівочий хор Клуба Молодежи при К. О. в Торонто, Диригент Михаил Лукач.

Первы представления ставилися нами на гали при русской православной церкви в кажду неділю. Доход с одного представления ишол до кассы Лемко-Союза, а с другого — до кассы церковной, и тым способом мы мали галю бесплатно. Представления для церкви приготовлял и росписувал роли прот. Пиза. Несподіванно возникли непорозуміния. Коли мы отограли представление для Лемко-Союза в недiлю, а потом серед тыждня было свято, то мы рішили повторити тоту саму штуку в пользу нашого отділа, а батюшка хотіл собранну коллекту взяти для церкви, однако члены нашы сопротивилися и не дали. Тогды батюшка потребовал уплаты за галю на нашы неділи на будуще, а члены нашого отділа того самого вечера рішили забрати свою гардеробу, и так розорвали связь и кооперацию с батюшком.

За якийсь час послі того представления и всі нашы предприятия и собрания отбывалися в галі РОВА, от котрой мы платили рент, аж в конці было рішено вынаняти стале приміщение совмістно с поляками. Так в том приміщении проходила наша организацийна робота аж до начала 2-ой світовой войны, коли то правительство розвязало всі прогрессивны культурно-просвітительны организации, в том и нашы отділы Лемко-Союза в Канаді.

В том приміщении была организована школа грамоты русского, а властиво лемковского языка для подрастающых дітей нашых выходцев, до котрой ходили даже діти выходцев из Буковины. Учителем школы был Николай Цисляк, котрый теперь находится в Кливланді, в США. Там был организованый и наш хор под руководством ныні уже покойного Константина Кирилюжа.


Dance
Из представления “Весіля в Карпатах”: Перед зачепчинами — Молодый, Владимир Дончак, оттанцовує дружкы.

С началом войны вся культурна робота устала. Але не на долго, бо коли гитлеровскы армии ударили на Совітский Союз, была основана у нас нова организация, а именно Карпаторусске Общество в Канаді. Тут треба замітити, што всі нашы представления и другы предприятия от самого початку тішилися великом поддержком и успіхом не тилько среди нашых выходцев из Лемковщины, но и среди всіх славянских людей. На нашы представления, концерты и другы предприятия приходило все много русских и украинцев, так што галя была все заполнена.

За тот час молодежь наша дорастала и начала также организоватися, закладати школу музыки, танцев, свои клубы, и в конці устроювати на власну руку концерты. С початку тоты предприятия молодежи устроювались при помочи другых братскых организаций, русскых и украинских, а теперь власними силами. Днесь мы маме среди нашых молодых хлопцев и дівчат инструкторов танцу, музыкантов и т. д. Маме днесь свои власны приміщения для наукы и практикы. И хотя молодежь часто міняєся, бо одна отходит, але друга дорастат и приходит, то наука иде своим порядком. Діти уж от 4 літ учатся у нас танцам под руководством старшой молодежи. И днесь вы увидите на нашых концертах на сцені старого діда або бабушку разом со своими внуками. И в том по мойой думкі єсть залог успіхов нашых концертов.


Table
Из представления “Весіля в Карпатах”: Перед выбераньом — староста Тимко Ксенич повідат казанье.

Тоты успіхы были выявлены ясно уж в часі войны в нашых кампаниях на помоч Канадскому Красному Кресту, на помоч Красной Армии, на помоч родному краю и др. Напримір, из одного такого концерта в великом “Виктори” театрі было выручено $600.00. Так наша помоч на таку малу группу нашого народа в Канаді была величезна. Три тысячи пар новой обуви для Красной Армии, 100 госпитальных лужок для госпиталя в Смоленску, один амбуланс из Виндзор для раненых бойцов Красной Армии, сбор и покупка одежы для бідных и пострадавшых от войны в Чехословакии и другы кампании — то был результат роботы нашой организации и жертвенности нашых членов.


Horse
Из представления “Весіля в Карпатах”: Приізд циганкы-ворожкы на весіля. (Циганка Анна Полыняк, циган Николай Корень).

Днесь, як я уже вспомнул, всі нашы кружкы в большых предприятиях выступают совместно и получают признательность и похвалу. В 1954 року на общеславянском концерті в Массей Голл в Торонто наша группа представила чудово сценичну картину “Жнива в Карпатах”. Наша группа выступала на концерті за мир, помагала на общеславянском концерті нашому отділу в Гамильтон, а на закончение зимового сезона в маю 1954 року поставила в заполненном “Виктори” театрі концерт по случаю Дня Матери и “Весіля в Карпатах”, из котрого несколько снимков поміщены тут в Календарі.

Так в короткости представляєся наша культурно-просвітительна дітельнбсть в Торонто. Красны планы наша молодежь выробила на будучность, и можна надіятися, што под руководством нашого преданного народному ділу молодого труженика Михаила Лукача, проведе успішно свою роботу на славу и честь нашого карпаторусского народа.


Владимир А. Цисляк.



[BACK]