Пришол один скиталец к старому емигранту и росповідат йому, якы страшны тоты большевикы:

“Знаєте, я сам был в их руках. Схватили нас двох из повстанчой армии и привели к свому командиру.

— Што прикажете, товариш командир, може росстріляти? — сказал один из тых, што нас привели.

У мене душа, цілком умерла, бо вижу, што конец. А командир посмотріл на нас и каже строго:

— Та ци то медведи або волкы, жебы стріляти?

Я ожил, бо выглядат, што то добра людина и має людске сердце. А он пришол к нам ближе и оглядат нас с ног до головы. Потом говорит:

— Ніт, не треба стріляти, бо то люде.

Потом сіл собі, закурил папироску, отвернулся цілком от нас, як бы ани нас там не было, и выкладат таку философию тому солдату:

— Знаєшь ты, што в жизни оно дивно устроєно. Возьми дерево — дуже часто при жизни своей оно ниякой пользы не приносит. Но коли його сріжешь, то можешь получити пользу — дошкы и другий материал, напримір, можна зробити красивый стол або шафу, а в крайньом выпадку получишь дрова на опал. Значит, єсть польза, а при жизни бесполезно росло. Или возьми медведя, волка, то при жизни тоже пользы не приносит, а вред от него єсть, но убий його, то получишь цінну шкуру.

А людина совсім иначе устроєна. Послі смерти она ниякой пользы принести не може. Так и тоты два тут, што вы их привели, пользу можут принести тилько при жизни — они молоды и здоровы, так их на роботу треба послати. Вот отправиме их в Сибирь ліс рубати, або в майнах робити, то буде немала польза для краины.

И так зробили. Взяли и везут нас через Галичину на восток. Ціле счастье, што мні удалось втечи и скрытись. Но я чым скорше втікал от тых страшных людей в Германию, бо иначе може и дотеперь треба бы было працувати дагде там в сибирскых лісах или майнах.

— Та другий на твойом місци был бы задоволеный, же го не росстріляли, — сказал старый емигрант.

— Но справа не в том, — отвітил скиталец. — Тут страшна тота нова, незвычайна большевицка система, тот холодный нелюдский обрахунок, што людину не треба убивати, бо як убьешь, то уж не буде робити и ниякой пользы не принесе.