SoSec55

ВЫСШЫ ПЕНСИИ ДЛЯ ВСІХ

В 1954 року в законі о социальном обеспечении в нашой краині были сділаны важны поправкы. Тоты поправкы дотычат каждого из нас, бо ныні майже каждый, кто працує за пейду для другого, або єсть занятый в свойом власном бизнесі, платит на социальне обеспечение, а кому минуло уж 65 літ и перестал регулярно працувати, получає якусь місячну пенсию из социального обеспечения. Місячну пенсию получают также вдовы и неполнолітны діти по таком робочом, котрый при жизни платил на социальне обеспечение. Длятого новы поправкы в законі о социальном обеспечении суть важны для всіх.

Новым законом, як он был поправленый в 1954 року, были увеличены всі пенсии, якы получают люде, або будут получати из социального обеспечения.

По старому закону человік на пенсии не мог получити на себе из социального обеспечения больше, як $85.00 на місяц, а в новом законі тота найвысша сумма місячной пенсии для старых людей, котры в августі 1954 находились уж на пенсии, была поднята автоматично до $98.50. Но для тых людей, котры получат право на пенсию аж послі августа 1954 року, місячна пенсия на стары рокы по новому закону о социальном обеспечении може дойти и до $108.50.

Найнисша сумма місячной пенсии по старому закону о социальном обеспечении была $25.00, а в новом законі она была поднята до $30.00.

Жена або малолітны діти, котры получают місячну пенсию на основании социального обеспечения свого мужа або отца, достали также подвышку, бо теперь будут получати свою часть от высшой суммы пенсии мужа або отца.

Напримір, жена в віку выше 65 літ, котра жила со своим мужом на пенсии из социального обеспечения, получала половину того, што получал муж. Если муж получал найвысшу сумму, дозволенну законом, — $85.00 місячно, то жена получала половину той суммы — $42.50, так разом они обое получали $127.50 місячно. Теперь по новому закону пенсия такого мужа была поднята до $98.50, так и жена буде получати половину той увеличенной суммы, то-єсть $49.25 (49.30), а разом обое — $147.80. Если муж умер перед 65-ым роком житья, доки ище не получал пенсии, або послі 65-го року, то вдова по нем доставала пенсию як тилько дошла до 65 літ, а именно три четверти той суммы, яку мал право получати покойный муж. Так теперь по новому закону и такы вдовы получили подвышку, бо они будут получати три четвертины той увеличенной суммы, яку получал бы муж. Но вдова, котрой ище не исполнилось 65 літ в момент смерти мужа, не може получити пенсии из социального обеспечения мужа. Однако, єсли така вдова осталась с малолітными дітьми, то она має право полупити зараз свою вдовью пенсию, а кромі того и тоты малолітны діти мают право полупити по половині того, што мог бы получити их отец. Но коли такы діти дорастают до 18 літ, то уж тратят свою пенсию по отцу, а и вдова стратит свою вдовью пенсию, єсли наймолодшой дітині мине 18 літ, а сама вдова буде в віку ниже 65 літ. Така вдова мусит чекати аж до 65 літ и тогды податися знова о пенсию по свойом покойном мужу.

Так по новому закону и пенсии вдов и малолітных дітей были увеличены. По старому закону одна фамелия не могла получити из социального обеспечения больше, як $168.80 місячно, а теперь по новому закону можут получати найвыше $200.00.

Жена, єсли она в молодшых роках працувала сама дагде в индустрии и платила из свойоц пейды на социальне обеспечение, то она по осягнении 65 літ жизни має право получати пенсию из свого социального обеспечения, о скилько єй выйде так больше. Половину пенсии мужа она достане, хоц она не робила николи в индустрии и не платила на соціальне обеспечение. Суть такы выпадкы меже нашыми емигрантами, што муж и жена працували в индустрии, зарабляли добры пейды и платили на социальне обеспечение так, же по осягнении 65 літ кажде из них має право получити найвысшу пенсию. Розумієся, што в таком выпадку жена не буде брати половину пенсии мужа, а вдова три четверти пенсии покойного мужа, а возме пенсию из свого власного социального обеспечения. Но жена або вдова не може брати пенсию из свого власного социального обеспечения, а притом ище доставати часть пенсии по мужу.

Найнисша пенсия из социального обеспечения была попередно $25.00 на місяц, котру по новому закону подняли до $30.00, а найвысша $85.00, котру теперь подняли до $98.50. Но велике большинство пенсионеров получає якусь посередню сумму пенсии меже тым верхом и низом. Сумма пенсии залежит не лем от того, скилько человік зараблял за всі рокі, коли працувал на роботах, обнятых социальным обеспечением, но и от того, ци он робил постоянно або с перерывами. При обрахунку пенсии берут за подставу “средний місячный заробок”, с котрого стягаеся взнос на социальне обеспечение. Если робочий зараблял добры пейды, коли был на роботі, но даякы рокы оставался без роботы, то його “средний місячный заробок” буде сильно змаленый, бо до рахунку берут и тоты місяцы, в котрых он не робил. Штобы мати право на найвысшу пенсию по старому закону, то-єсть $85.00 місячно, треба было мати “средний місячный заробок” $300.00, то-єсть заробити $3,600.00 на рок за всі рокы послі 1950 аж до часу, коли робочиый вышол на пенсию. Если он в дакотром року заробил поверх 3,600 рочно, а в другом ниже, то до рахунку не ишло то, што он заробил понад три тысячы шесть сот в одном року, бо от той надвышкы не стягали взнос на социальне обеспечение. За то лучшым роком не можна было надгородити слабшы рокы. Так єсли робочий выходил из роботы на даякий час, або по причині хвороты мусіл лишити роботу ище перед 65-ым роком житья, то при обрахунку його пенсии “средний місячный заробок” у него сильно упадал — мог упасти до 200 и до 100 долларов. За то выходило, што много робочых, котрым долгы рокы стягали с пейды на социальне обеспечение, потом як они дошли до 65 літ, получали низку пенсию, а тоты, котры проробили лем пару літ перед 65-ым роком, но постоянно и на высоком заробку, получали высоку пенсию.

То была велика кривда для тых робочых, котры проробили долгы рокы на социальне обеспечение, но не робили постоянно. В новом законі звернули на то увагу. Теперь при обрахунку “среднього місячного заробку” будут выпускати аж до 5 літ с найслабшым заробком, в котрых робочий заробил найменьше або ничого не заробил.

Для лучшого пояснения можна взяти такий примір. Робочий проробит без перервы 10 літ на роботі под социальным обеспечением и на найвысшой пейді, но на 60-ом року житья он захворіл и два рокы цілком не робил, а потом три рокы перед пенсиом робил лем частично и зараблял меньше. По старому закону при обрахунку “среднього місячного заробку” такого робочого брали под увагу и тоты 5 літ, в котрых он ничого не зараблял, або лем дуже мало. По новому закону, тоты 5 літ будут цілком выкинены из рахунку, так што робочий буде мати такий средний місячный заробок, який йому выходит по тых 10 роках, коли он заряблял найбольше.

Если за 10 літ он зараблял по 3,600 долларов рочно, то разом за 10 літ його заробок буде 36,000 долларов. Но потом за два рокы не робил ничого, а за остальны три рокы зараблял лем по 2,000 долларов рочно, так за всі 15 літ перед пенсиом у него буде лем 42,000 долларов заробку, и тоту сумму треба было по старому закону ділити на 15 літ, то-есть на 180 місяцев. Из того получался “средний місячный заробок» около 233 доллары, я його місячна пенсия выходила приблизительно на 75 долларов місячно по старому закону, а теперь была бы поднята приблизительно до 85.00. Но новый закон на будуще откине 5 найслабшых літ, и робочому в подобной ситуации будут рахувати лем тоты рокы, в котрых он мал найлучший заробок.

Тоты пенсионеры, котры в августі 1954 року были уже на пенсии, останутся при старом обрахунку, лем получат добавку до старой пенсии в таком розмірі:


Стара пенсия Пенсия по закону 1954
$25.00 $30.00
40.00 45.00
55.00 60.00
70.00 78.50
85.00 98.50

В старом законі найвысший заробок, от котрого стягали на социальне обеспечение, был 3,600 на рок, так средний місячный заробок не мог выйти выше, як 300 долларов. Но в новом законі найвысший заробок под социальным обеспечением поднято до $4,200.00 на рок, так теперь “средний місячный заробок” при обрахунку пенсии може поднятися и до 350 долларов. При таком средньом місячном заробку пенсионер буде получати сам на себе 108.50 місячно.


“ЗАМОРОЖЕНИЕ” РЕКОРДУ СОЦИАЛЬНОГО
ОБЕСПЕЧЕНИЯ ПРИ КАЛІЦТВІ И ТРУДОНЕСПОСОБНОСТИ

Новый закон 1954 року додал ище одну дуже важну поправку, котра дотычит молодшых робочих, а именно “заморожение” рекорду социального обеспечения в случаю каліцтва и трудонеспособности.

То относится до молодшых робочих, котрым ище далеко до пенсии. Взяти для приміра такий випадок, што робочий выробил означенный час на роботах под социальным обеспечением и єсть вполні обеспеченый, но потом дагде на 40-ом або 50-ом року свого житья попал в каліцтво або таку хвороту, што стал цілковито неспособным до роботы. Он не може податися о пенсию из социального обеспечения, доки не дойде до 65 літ житья. Але и потом при обрахунку його пенсии будут брати под увагу тоты рокы, коли он был без роботы, то його “средний місячный заробок” выйде малый, хоц попередно, коли он робил, його заробок был и найвысший. По новому закону можна при обрахунку пенсии откинути 5 найслабшых літ, но робочий, котрый стал нетрудоспособным, напримір, на 50-ом року житья и так останеся с 15 роками, в котрых ничого не заробил, то хотя йому откинут 5 літ, у него все таки ище останеся 10 пустых літ, на котры будут ділити то, што он заробил попередно, и так його “средний місячный заробок” сильно уменьшится, а с тым и місячна пенсия уменьшится. Вот тут приходит на помощь тото нове постановление закона о “заморожении” рекорду социального обеспечения. Такий робочий, котрый єсть цілковито неспособным до роботы протягом 6 месяцев, або в будучности стане так неспособным до роботы, то послі 1 января 1955 року може подати до админнистрации социального обеспечения просьбу, штобы його рекорд социального обеспечения был “замороженый”. Тогды його безроботны рокы не будут рахувати цілком, и коли он дойде до 65 літ, то получит таку пенсию, яку мал бы право получити в том року, коли стал неспособным до роботы. Значит, такий робочий може получити и найвысшу пенсию, хотя за попередных 15 літ перед 65-ым роком был без роботы, о скилько перед “заморожением” рекорду социального обеспечения он зараблял высокы пейды.

То має важне значение не тилько для самого робочого, но и для його фамелии, бо в случаю смерти такого робочого перед осягнением 65 літ жизни вдова по нем и малолітны діти будут оправнены до свойой части из такой суммы, яку мог бы получати померший в момент смерти.


ПЕНСИОНЕРЫ МОЖУТ ТЕПЕРЬ ЗАРОБИТИ
$1,200.00 РОЧНО И ПОЛУЧАТИ ПЕНСИЮ

В новом законі 1954 пенсионеры получили и тоту выгоду, што можут при свойой пенсии заробити больше, як попередно, без утраты своих місячных чеков из социального обеспечения.

Пенсионеры в віку выше 72 літ не суть теперь нияк ограничены в свойом заробку. Они можут припяти всяку роботу и зарабляти, скилько лем можут достати, а и так получати свою пенсию. А пенсионеры в віку ниже 72 літ можут заробити до 1,200 долларов рочно без утраты чеков из социального обеспечения. Но коли такий пенсионер заробит больше, то он утратит пенсию лем за гдеякы місяцы в року, залежно от того, скилько он заробил понад 1,200 долларов. Але єсли он заробит понад 2,080 долларов рочно, то стратит всі місячны чекы за тот рок.

Тоты постановления входят в силу 1 января 1955 року. Всі теперішны пенсионеры получат перед Новым Роком лично полны информации дотычно того, скилько они можут заробити без утраты пенсии, и што должны они робити, коли их заробок переходит тоту границу.

Тоты постановления относятся и до вдов и малолітных дітей, котры получают пенсию на основании социального обеспечения своих мужов и отцов. Остаєся в силі старый закон дотычно вдов, котры выйдут замуж. Така вдова тратит зараз пенсию из социального обеспечения свого первого мужа.


СОЦИАЛЬНЕ ОБЕСПЕЧЕНИЕ РОСШИРЕНО
НА ФАРМЕРОВ, СВЯЩЕННИКОВ, ПОГРЕБНИКОВ И ДР.

Новый закон 1954 года включил в социальне обеспечение ище около 10 миллионов такых людей, котры попередно не платили на социальне обеспечение.

Уж попередно под социальным обеспечением находились дробны бизнесмены, котры працували сами для себе в свойом предприятии, и гдеякы группы профессионалов. Они платили на социальне обеспечение раз до рока разом с доходовым податком. Но теперь по новому закону от 1 января 1955 года под социальне обеспечение придут фармеры, котры працуют на своих фармах и можут показати чистый доход не меньше, як 400 долларов рочно, а также священникы, погребникы, самостоятельны инженеры, архитекторы, счетоводы. На дальше из социального обеспечения будут выключены докторы, адвокаты, дентисты, ветеринары, оптометристы.

Тоты люде, котры працуют сами на себе, будут платити на социальне обеспечение раз до рока разом с податком от доходу.

Што до священников всіх религий, то новый закон оставляє им свободу приступити добровольно до социального обеспечения, або не приступати, но єсли они раз внесут заявление до окружного директора податкового уряду о свойом желании подойти под социальне обеспечение, то потом уж не можут выцофатися, лем мусят платити на социальне обеспечение, як и приватны бизнесмены, от свого доходу. Переважна часть священников получає жалование от приходов, но приходскы комитету и церкви не будут стігати священникам процент от их пейды и посылати на социальне обеспечение, лем каждый священник, як подойде под социальне обеспечени, буде обовязаный сам платити за себе.

Монахы так само можут податися на социальне обеспечение, штобы получати пенсию на стары рокы, но монахы, котры складают приречение бідноты в земной жизни, не можут податися на социальне обеспечение.

Социальне обеспечение было введено в США в 1937 году при Президенті Рузвельті. Потом законы о социальном обеспечении были несколько раз міняны, причом социальне обеспечение все больше росширялось и охвачувало больше народа. Сегодня, за малыми вынятками, майже всьо население США охвачено социальным обеспечением, и каждый, кто за молоду працує, надієся получити пенсию на стары рокы. За то всі ныні заинтересованы в том, штобы американский доллар не тратил вартость, бо иначе пенсия на стары рокы не мала бы великого значения.




[BACK]