Хитрый Циган

В давных часах в старом краю іхал собі газда фурком до Горлиц. На дорогі догнал корчмаря-жида из другого села так само на возику. Жид іхл дуже поволи, то газда пробовал обогнати його возик, но корчмарь не давал. Он все повернул возиком в тоту сторону, котром газда хотіл объіхати. Газда кричал “Гоп, гоп”, но то не помагало. Нарешті, съізжаючи с одной горкы, газда розогнал коня и кричит: “Гоп-гоп.” Але и тут корчмарь загородил йому дорогу, так фурка газды ударила до возика корчмаря и зламала колесо.

Корчмарь подал справу до суду, так газда іде засмученный на росправу. Встрітил цигана и взял го на фуру подвезти. Циган пытатся, чого газда такий смутный. Газда росповіл свою справу, а циган говорит: “Як придете перед сендзю, нич не отвічайте, хоц бы жид говорил, што хоче, то так выграте справу.” Газда подумал, же то буде найлегче, бо и так не было добрый до бесіды, особенно перед панами.

На росправі в суді корчмарь оповідат широко, як то было, як он іхал собі спокойно, а тот газда так, як збуй, ударил несподіванно до него фуром и наробил шкоды, мало што його самого и коня му не забил. А газда молчит. Судья выпытуєся його, ци то правда, што корчмарь говорил, но газда ани слова. Тогды судья каже, што тот человік глухий або німый, то не можна справы рішити, лем треба мати даякого свідка. Тут корчмарь не вытримал, лем гнівно показує на газду и кричит:

— Пане сендзьо, оно не глухе, оно не німе, бо там на дорогі оно все кричало на мене: “Гоп, гоп!”

Судья зараз выкинул справу из суду и признал правду газдови. А газда вернулся втішный до дому и все оповідал потом, же цигане дуже мудры люде.




[BACK]