Алексий и Юлия Русиник

Алексий и Юлия Русиник, Akexej and Julia Rusinick
Юлия и Алексей Русиник.

Алексий Русиник походит из села Святковы Великой. Он родился 30 марта 1877 року, а до Америкы пришол в 1892 року. Он тоже прибыл в майнерску околицю, город Дженсвилл, коло Гейзелтону, в Пеннсильвании. Жена Алексия Русиника, Юлия, из роду Гошко, рожденна 27 октября 1888 року, походит из села Незнайовы, Яселького повіта. До Америкы пришла в 1900 року. Они женилися 6-го августа 1904 року уже тут в Кливланді, при теперішном настоятелі церкви, што на Старкведер, о. Капанадзе.

При майнах в Пеннсильвании Русиник был лем за короткий час, бо он был иншого настроєния и думал жити промыслом. Так из Пеннсильвании он переселился до Кливланду, а так до Чикаго, где пробыл 5 літ, и повернул назад до Кливланду. В свойом житью он переходил с бизнесу до бизнесу. Найперше он стал ассекурацийным агентом, потом корабельным агентом, был властителем гросерни, потом властителем гостиницы, а наконец основал похоронне бюро, котре уже пошло дуже удачно, и он теперь являєся управителем трьох похоронных заведений в Кливланді, знаных под именем Русиник-Юрч Фюнерал Гомес. Сам он уже не участвує в роботах активно, бо бизнес ведут його діти и спольник Юрч, то он жиє в красивой резиденции по дорогі с Кливланду в Норт Роялтон, О.

Они выховали трое дітей. Найстарша Анна выдана за доктора, очного специалиста Едуарда Голи. Сын Стефан управляє похоронным бюро, а наймолодша Олена выдана за зубным доктором из нашого роду Николайом Ференц. Всі они живут в Кливланді и околиці.

В день свого 50-льтия сами Русиникы устроили в свойой резиденции пышный банкет, на котрый запросили всіх знакомых, приятелей и родину, а тоже и публично запрошены были через газету члены Лемко-Клуба в Кливланді, котрого Русиникы состоят членами. Торжество выпало дуже величаво, весь дом и площа коло дому были переполнены народом с близка и с далека, и оно останеся памятным на все тым, котры там были присутны.

Русиник николи не занимал уряд в отділі Л.С., но он был первым человіком, котрый представил кливландчанам Д. Вислоцкого, коли тут начал организоваться Л.С., и єсть безпрерывным членом до сегодня.


Николай Цисляк.



[BACK]