Пан Превелебный и Циган — Иван Ставровский


Ходил бідный циган,
Обдертый и босый,
Голоден каждый день,
И вынашол штоси.

Ходил коло саду,
Черешни побачил,
Выліз он на строма,
Но пана не збачил.

А пан превелебный
Дуже россердился,
Полетіл на фару,
С пушкою вернулся.

Бідный, босый циган
О ничом не знає,
Лем черешни торгат,
Весело кушае.

Гордый пан прилетіл,
Пушку наставляє,
Повыше, пониже
В цигана стріляє.

А циган на стромі
Не зна што робити,
То начал жалостно
Пана так просити:

“Най будут так добры,
Най мя не стріляют,
Я им то заплачу,
Най запамятают.”

О несколько тыждней
Циган стал думати,
Же то уж треба долг
Пану отдавати.

Иде циган к фарі,
На двери клопкає,
За тоты черешни
Собі споминає.

С фары пан выходит
Кричит на цигана:
“Кого чорта хочешь,
Не нарушай пана!”

— Ой пан превелебный,
Та я памятаю,
За тоты черешни
Им тут долг отдаю.

Я тут пришол до них,
Хочу ся звідати, —
Десять фунтов злата
Сколько мат вартати?

А пан сребролюбец
Очы выставляє
И уж на цигана
Иншак споглядає.

Запросил цигана
В хату в середину,
И подає йому
Хорошу гостину.

Погостил и зачал
Цигана просити:
“Где же злато маєшь,
Хочу го видіти.

А циган взял калап,
Коло дверей стає
И превелебному
Такий отвіт дає:

— Я злата не маю,
Лем хотіл єм знати,
Ци на фарі можна
с вами вечеряти.


Иван И. Ставровский.

Примічание автора: То правдива история, а случилось то в селі, Шеметковцы, коло Свидника, в 1907 року. Пан преведлебный назывался Иштван Подгаецкий.



[BACK]